I a força gent que pense qu’es terroristes son toti parièrs. Qu’açò ei ua luta entre era civilizacion e era barbaria. Que son ua còlha de hòls que solament vòlen era mort d’Occident. E dilhèu an arrason. Mès tanben i a quauques diferéncies que cau arremercar.

Es terroristes qu’ataquèren Paris èren de Daish —acrònim arabi entà Estat Islamic— e  vòlen qu’eth Califat que i a aué en Siria e Iraq arribe a tot eth Mond. Es terroristes qu’ataquèren Bamako son d’Al Qaida e se ben tanben vòlen qu’era religion musulmana sigue fin finau era soleta que i age ena Tèrra, ena sua luta díden que cau susvelhar de non hèr mau as auti musulmans. Aguesta, que poirie èster solament ua desparietat, ei eth reflèxe d’ua luta competitiva qu’Al Qaida e Daish an iniciat recentaments entre eri entà veir qui a era arrason.

E se ben i a fòrça mès diferéncies, es dus an copiat es metòdes der aute e mos parlen d’ua luta que non los dèishe pas ben ben coma aliadi. Es terroristes de Daish avien estat abans, en un moment o en un aute, en Al Qaida. Qu’ei un grop terrorista fòrça conegut pera sua luta contra Occident dempús er 11 de seteme de 2001, an qu’ataquèren Naua York e Washington. Eth còp volie provocar —e en açò siguec ua escaduda— era reaccion mès violenta des occidentaus: era invasion d’Iraq e era d’Afganistan. Siguec tota Euròpa —a excepcion der estat francès en aquera ocasion— e es Estats Units es qu’ataquèren. Entàs terroristes, tanta mès violència occidentau, melhor, tanta mès reaccion militara melhor.

Dempús siguec neishut Daish e se proclamèc eth Califat. Al Qaida diguec qu’açò ère ua distraccion, que calie pas aver encara territòri. E ara, es dus grops luten entà veir qui pòt avèr mès voluntaris, sòs e drets entre es extremistes musulmans.

Er atac a Charlie Hebdo siguec hèt per terroristes d’Al Qaida. Dempús alavetz que Daish en Euròpa avie decidit que calie hèr un atac mès gran, mès mediatic. Eth sòn cap en Euròpa, Abdelhamid Ahaaoud demanèc ara comunautat musulmana europèa d’utilizar toti es mejans possibles entà atacar as europèus “damb ua bala, un guinhauet, un coche, ua arròca”, tot ère de besonh entà iniciar ua crotzada de sang contra Occident.

Dempús d’aqueri atacs Al Qaida ditz ara qu’aqueth non ei eth camin corrècte. Que cau deféner as musulmani que demoren en Euròpa e que d’atacs d’aquera sòrta son tanplan un perilh entara comunautat musulmana. Dempús des atacs hèti en Paris, Al Qaida e Daish an aprigondit ena sua division. Per aquerò er atac de Mali.
 

Un atac dirigit a Daish

Quan es terroristes d’Al Qaida entrèren en otèl de Bamako, demanèren qui podie recitar eth Coran e qui non. Aquerò ère un messatge pensat entà Daish. Ère ua manèra de díder que calie contunhar es atacs contra Occident mès qu’eth camin ère un aute. Sustot calie deféner ara comunautat musulmana en ua guèrra qu’aqueri dus grops musulmans ja consideren a niveu globau: Mali, Argeria, Libia, Iemen, Indonesia, Pakistan, Iraq, Siria, Russia, Euròpa...

“Aitau ei com es musulmani aurien d’actuar” çò didie ua fiulada sus twitter pòc dempús der atac hèt en Mali. “Aurien d’apréner ua o dues causetes abans de lançar eth següent atac” contunhave eth madeish twitter.

E se ben es messatges lançadi en Internet de còps non son pro segurs, es servicis d’intelligéncia i trabalhen soent. E son aqueri madeishi es que diden qu’era desparietat d’actuacions d’Al Qaida e Daish d’abans, ei venguda ara ua rivalitat que poirie èster perilhosa lèu. “Tota era atencion ei sus Daish e Siria —çò ditz un agent der M16 anglés— mès es terroristes qu’an dat eth còp en Mali volien arrebrembar a Daish qu’encara son aciu, ena guerra contra Occident e qu’encara son importanti”.

Es diferéncies son donques tanben importantes. Se ben Al Qaida avie utilizat es atacs terroristes damb bombes en Iraq, un de sòns caps demanèc d’arturar es masèls pr’amor qu’ena luta tanben morien musulmans. E ara Al Qaida tanben lute peth territori, non coma Daish, vertat, mès que tanben ac hè en Iemen e en Siria.

Era excepcion de tot açò ei eth punt que mès mos deu importar as occidentaus;  ei qu’Al Qaida e Daish vòlen ambdús provocar ua subrereaccion, inspiracion e incitacion d’Occident que pogue hèr que cada dia i age mès e mès musulmans que luten contra Occident. Qu’ei coma es terroristes deth sègle XIX —es anarquistes— actuaven. Solament volien provocar sang e mès sang.

Atau avem qu’Al Qaeda còpie es vidèos des decapitacions de Daish e que Daish còpie es atacs terroristes d’Al Qaida. Mès es dus vòlen provocar ua crotzada d’europèus contra er Islam. Mos podem posar era qüestion s’ei açò çò que mos cau hèr, o dilhèu cau trebalhar entà hèr qu’aquera rivalitat pogue èster definitiva entàra nòsta pròpria seguretat e convenença.