Bandièra01 1180x150: Comuna de Tolosa

Opinion

Que n’i a pro d’estar mespresats!

Dàvid Grosclaude

Dàvid Grosclaude

Jornalista e politician. Participèt a la creacion dels primièrs programas de France 3, Ràdio País e La Setmana entre d'autres. Es delegat a la politica lingüistica en favor de las lengas basca e occitània al Conselh Regional d’Aquitània.

Mai d’informacions
Los signes de mesprètz de las parts de l’Estat de cap a la lenga nosta que’s segueishen e que’s multiplican. Dab lo darrèr d’aqueths signes, lo pro qu’ei pro! Qu’èi decidit de miar ua accion e que demandi lo vòste sostien. Qu’ei ua accion en favor de la dignitat et de la legitimitat deu noste engatjament per la reconeishença de la lenga occitana.
 
Que m’installi aqueste dia, 27 de mai, a l’Ostau de Region de Bordèu, sièti deu Conselh Regionau d’Aquitània, e que i comenci ua grèva de la hami entà denonciar l’arrefús de l’Estat de dar ua seguida a un projècte votat per las duas assembladas d’Aquitània e de Miègjorn-Pirenèus. Lo vòte que’s hasó a l’unanimitat que harà lèu un an, en junh de 2014!
 
Entà estar operacionau, aqueth projècte que necessita la publicacion d’un decret au Jornau Oficiau. Que s’ageish de la creacion de l’Ofici Public de la Lenga Occitana (OPLO). Que serà un organisme interregionau destinat a promòver ua politica en favor de la lenga occitana. Que serà virat de faiçon clara de cap au desvolopament de la lenga. Que cau arrestar la baisha deu nombre de locutors e har tot çò qui cau entà qu’aqueth nombre posca créisher. L’accion de l’Ofici Public que serà virada en prioritat de cap a las joenas generacions.
 
Que las deliberacions de duas assembladas regionaus e sian tractadas dab aqueth mesprètz no’s pòt pas acceptar. Qu’ei ua faiçon de dar arguments a tots los qui pensan que la politica se resumeish a har promessas shens las tiéner. Que diseràn lavetz se las decisions presas non son pas aplicadas? Quan duas regions e prenen la decision de miar ua politica en favor de l’occitan, lenga miaçada de disparicion, l’Estat qu’ei absent mes tanben que hica entravas. Que’s compòrta atau sus d’autes dossièrs pertocant l’occitan; la lista qu’ei longa.
 
Aqueth blocatge de l’Estat centrau qu’ei permanent quan s’ageish de tractar las questions de las lengas ditas regionaus. Qu’ei lo cas uei lo dia dab la refòrma deu collègi. Quin serà l’ensenhament de l’occitan e en occitan doman? Lo perilh de’u véder a desaparéisher qu’ei evident.
 
Qu’estoi sollicitat en 2013 entà participar au tribalh d’ua comission creada per la ministra de la Cultura. Aquera comission qu’a audicionat detzenats de personas e que remetó un rapòrt. Que caló quate mes d’amassadas. Lo rapòrt publicat que hè proposicions concretas e de bon aplicar. Non i a pas avut nada seguida. Qu’ei moneda publica desperdiciada e ua manifestacion mei de mesprètz.
 
Que tieni a díser que, com elegit delegat, qu’èi tribalhat a aqueth projècte d’Ofici Public de la Lenga Occitana dab lo sostien sancèr de la Region Aquitània, que sia lo president e los servicis, e en ententa sancèra dab lo men collèga de Miègjorn-Pirenèus.
 
Mentre que lo mandat deus conselhs regionaus ei a s’acabar, que pensi d’aver comptes à rénder. Que hèi cap a las meas responsabilitats d’elegit e cadun que’s dèu acarar a las soas.
 
Que i a un vertadèr blocatge e deu men punt de vista qu’ei sustot mesprètz. La mea accion qu’a per mira d’entercalhar l’Estat e particularament los sons servicis centraus. Que cau acabar un còp a de bonas dab aqueth mesprètz.
 
Que coneishetz lo men engatjament en favor de la lenga; que compti dab lo vòste sostien.
 
Mercés a tots. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

mathias G briva
19.

L'accion de David Grosclaude es d'una dignitat exemplaria.
Tot mon sosten e mon admiracion.

  • 2
  • 0
Gèli Grande Lairac en Agenes
18.

Car David Grosclaude

Lo Partit de la Nacion Occitana (P.N.O.) te pòrta tot lo seu sosten per aquesta accion coratjosa

Gèli Grande
Cò President del Partit de la Nacion Occitana

  • 6
  • 0
Chao viva Niça
17.

Grand respèct a D. Grosclaude per aquela accion fòrta, importanta e determinada.
Tot lo mieu sosten.
Fòrça, coratge e que se saupe da pertot!

  • 4
  • 0
antalya apraquital
16.

#15 Coma o t'explicavi soi respectuó dels ancians e vòli pas brutlar las prioritats, demai amb lo trabalh es malaisit de far

  • 1
  • 1
Emmanuèl Isopet
15.

#12 Esparavi que sias volontari. O sias pas ? Soi decebut.

  • 3
  • 0

Escriu un comentari sus aqueste article