Bandièra01 1180x150: Comuna de Tolosa

Opinion

Las leiçons de la revirada de Troadec

Quin decebement per los pòbles sens estat de l’exagòn francés! Lo breton Kristian Troadec a pas capitat a trobar las 500 signaturas requistas per se poder portar a l’eleccion presidenciala francesa. Totun, aquesta peripècia es una bèla escasença de ne tirar la leiçon per nosautres.
 
1/ Kristian Troadec es un òme de Bassa Bretanha e li còsta de convéncer en Nauta Bretanha (o Bretanha galò). Quand s’estúdia los pairinatges recebuts pel cònsol de Karaez, es clar que l’ultramajoritat de signaturas venon de Bassa Bretanha e particularament de Poher (lo parçan del centreoèst de Bretanha) o d’autres sectors de Morbihan o de las Còstas d’Armor pròches. Kristian Troadec a pas de discors pel país galò ni de discors per las grandas vilas bretonas. Pasmens es dins las vilas e dins lo país galò mai que mai que son la majoritat dels bretons, non en Poher rural. Cal que Kristian Troadec causisca s’es un grand menaire politic breton o sonque l’òme fòrt del (pichon) Poher, un pauc embolhaire.
 
2/ “Se ten Occitània, ten la clau”. Kristian Troadec avià causit un occitan, David Grosclaude, coma director de campanha. Totun a pas amassat pro de signaturas dins los territòris occitans. Sèt segon lo sit del Conselh Constitucional mes a jorn dimars. Totas en Dordonha o Aude!
 
Ieu, o tornar disi: Bretanha, Corsega, Catalonha del Nord, Bascoat, Alsàcia, sèm sonque de confètis! Bretanha es un gigant economic mas un nan territorial amb sos cinc departaments. Es matematic: Bretanha+Corsega+Catalonha+Bascoat+ Alsàcia=11 departaments. Occitània=39 departaments. Cal ben convenir que tot cambiament sus la question dels pòbles sens estat dins l’encastre de l’estat francés passarà per Tolosa o Marselha. Òm se pòt pas emparar de res sens Occitània! Que siá per amassar de signaturas per l’eleccion presidenciala o que siá per far passar una lei, a chasque còp aurem besonh del “gigant occitan”. Es atal!
 
Totun, pòdon pas far lo trabalh de conscientizacion nacionala en Occitània per los occitanistas.
 
3/ Las regions francesas son pas interessadas per un pròjecte regionalista o (un pauc) autonomista, quin que siá. Lo Kristian Troadec a trobat UNA sola signatura en Franca, dins lo departament de Somme (Picardia). Sabi que la campanha de signaturas de Troadec es pas un estudi precís del sentiment regionalista en França, mas, ça que la, es un exemple fòrt. Los bretons, occitans, còrses, catalans, bascos o alsacians podèm pas comptar que sus nosautres.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo raiòu Cevenas
2.

#1 Vesin Lachaud. O fau pas sovent de notar lo monde. Mès aicí avètz rason quand parlatz de contornament dau "Massís Septentrionau".
La montanha, atrape ieu qu'es oblidada per lo gròs dau movement occitanista. Mès benlèu que mancatz d'afecionats en cò vòstre, non sai. Se ne'n parlèt de la problematica qu'aigrejatz aquí, fai quauquas annadas a l'Estivada de Rodés.

Perquò, aprenètz aquò d'aquí : la region "Occitanie" vai s'encargar (a 50 % se me trompe pas) de las doas linhas istoricas de trins TER : Nimes-Clarmont d'Auvèrnha e Besièrs-Naussargas. L'Estat s'encargarà dau restant. E crese ben per una durada de 5 ans per començar. Detalhs de verificar pasmens sus lo site de la region "Occitanie" dinc lo grand rendut còmpte dals Estats Generaus dau Ralh e de l'Entermodalitat.

E per quant a vòstre article, Monsur Lécuyer, es bien virat e la conclusion es pas tòpia !

  • 9
  • 0
lachaud
1.

Ren se fara sens lo Massif Centrau. Los bretons damanden una façada vers la mar miejaterrana en fasant la liaison Nantes Lion Marselha que passeria au nòrd d'Occitania. L'ancien president de la region Limosin damandava una façada atlantica (una drubertura vers l'axe Peiteus-Bordeu). Totjorn contornar lo Massif-Centrau e jamai s'occupar d'aquela bola au mitan de la Franca dau sud. Mesme los occitanistes de Tolosa evitan d'en parlar.

L'òm pòd se damandar perque Troadec seria populari en Bretanha aupres daus maires e perque es ignorat dins lo massif Centrau qu'a los mesmes problems . En séparant lo culturel de l'economic los occitanistes se son copats de las populacions. Es pas jamai vist Grosclaude s'occupar de l'economic e dau Massif Centrau. Vau mielhs per un tolosan o un abitant de Montpeliér passar per Bordeu o Narbona per 'nar a Paris. Vau mielhs un maridatge emben la Catalonha qu'un maridatge emben lo Massif Centrau.

Jornalet se copa de la Revolucion que vei e que dich qu'i en a son cofle daus politics que jamai escotan lo pòple. Es temps de passar a un octave superior e revendicar un federalisme. Lo provincialisme, lo regionalisme n'i a pron que quò es totjorn se plejar sos lo centralisme d'un estat que pòd pus assegurar son unitat centralista.

  • 5
  • 4

Escriu un comentari sus aqueste article