CAPÇALERA2: AMICS DE JORNALET

Jornalet, gaseta occitana d'informacions

Dissabte, 22 de julh

Gerard Joan Barceló

Dijòus, 1.6.2017 03h00

Mos chars Alps que non sai


Comentaris 7 comentaris    
Dolent Fluix Bo Molt bo Fabulós (6 vòtes)
carregant En cargament


A l’escòla mos professors —qu’èran subretot de professoras— m’an agut explicat que França aviá de frontieras naturalas: un flume coma Ren nos separava d'Alemanha, de montanhas coma los Pirenèus e los Alps nos separavan d'Espanha e d'Itàlia. Amb lo temps me sio avisat que tot aquò èra ben inexacte: sus las doas ribas de Ren se tròba la meteissa cultura renana e alemanica, per exemple, sensa parlar dal fach que foguèc un temps que la frontiera "naturala" entre l'influéncia francesa e la germanica èra en realitat marcaa per los Vòges.
 
Nòstre imne Se chanta sembla de dire el tanben que las montanhas son de frontieras: obstacles a la realizacion d'un amor, se presentan amb una clara foncion separaoira. Totun, las culturas basca e catalana travèrsan los Pirenèus e una lenga coma l'aragonés es, coma o ditz amb rason lo lingüista Domergue Sumien, per la nòstra una sòrre. E sabèm ben que la cultura occitana se prolònja entrò a nòstras Valadas alpencas.
 
Al fons, los occitans avèm sovent de montanhas a nòstre orizont. Per los unes, son los Pirenèus o las Corbieras, per d'autres lo Massís Central, per d'autres enfin son los Alps. Penso que ieu, qu'ai pas solament viscut en Occitània, ai totjorn agut de montanhas per orizont. Las de Grenòble que me vegèron nàisser o las dal Dalfinat de mos ancessors mairenals, e nieus las de la Corsega de mon enfança e de mon adolescéncia. Tanben i a de montanhas dins mon orizont mental: la vila de mon paire, Blida, se situa al pè de l'Atlàs argerian.
 
Se me i chal pensar un pauc, creo que son als Alps que sio mai pregondament estachat. Chasque còp que i passo, me i sento a la maison, dal temps que los Pirenèus me rèstan un pauc misterioses. De ma plana rodanenca estant, constato que regardo mai vèrs lo levant alpenc que vèrs lo ponent vivarés.
 
De voses pirenencas o d'a l'entorn n'i a una molonaa aicí, a Jornalet, mas aüra me sembla que las alpencas se fan tròp discretas. Mos chars Alps que non sai, vos vòlo escotar.
 
 


abonar los amics de Jornalet
 



publicitat



Comentaris

1 de junh 20.48h

#6 "e dal sieu airal" (e non "airal" solet)


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

1 de junh 20.46h

#3 ajusto que sèm al mens dos de far la promocion de l'occitan vivaroalpenc airal sus Jornalet... Felip e ieu.
N'i a ren aitan per Alvèrnhe.
Es un problèma ja ancian dins l'occitanisme, un desequilibri desfavorable al nòrd occitan en general.


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

1 de junh 18.01h

#4 No problemo : 1531 e lo 14 de febrier/Slavanchà la gleiso".
La reviraa proposaa per lo paure Paul Meyer en 1905 es "s'est écroulée" (los Maurinencs serian puèi pas estats tant coljhons que de betre lor gleisa dins una chalancha per lo plaser de se pagar una lavancha). Dos problèmas amb aquesta inscripcion :lo premier es pas grèu, es la finala -o aqui ont encuèi es un - finau que s'auve. Lo segond, mai grèu : la fonccion gramaticala de la finala "slavanchà". Meyer pensa qu'es un part... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

1 de junh 15.03h

Tot aquò me rapèla de vielhs sovenirs qu'avian fach vibrar mon eime de neò-occitanista, bel temps fa d'aquò.
Apassionat d'escorreguda en montanha, aviai decidit de traversar los Alps de Briançon a Menton. S'ausissia encara occitan demest los pastres e abitants; quina emocion, per ieu qu'aviai, d'aquel temps, se pòt dire, sustot una coneissença empirica de la lenga de mon pichon canton d'Albigés, qu'aquela confrontacion amb de monde de tant luenh que compreniai tan plan!. Una amiga que... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

1 de junh 12.07h

Mercés, Gerard Joan, per aquest omenatge a las Aups que reschauda mon vièlh cuer. Bon, l'i deu puèi ben aguer un aupenc o l'autre que de quora en quora ven escriure suu Jornalet ; lo problèma vertadier es benlèu pas que pauc d'aupencs escrivon suu Jornalet. Lo problème es que d'aupencs qu'escriven dins l'absolut, n'i a puèi pas tant qu'aquò.


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

1 de junh 10.43h

#1 Vertat que n’en caldria eissir de l’arescle dels arlèris del clapàs e dels agremolits mondins…
(Te vas far pielhar dròlle) desconi un brigailh…. Bodíuuu !


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

1 de junh 09.41h

Aquí òi ! Ne'n manca de votz, de testimoniatges, d'articles pertocant lo Naut País d'Òc (Daufinat, Auvèrnha, Limosin). Jornalet, recercatz lo monde d'amont que poiriáun adurre lur pèira : siái segur que n'i a, benlèu mens, non sai, mès n'i a.
Lo Naut País Occitan deu venir una de las prioritats de l'occitanisme, culturalament e linguisticament !


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions