Bandièra01 1180x150: Comuna de Tolosa

Opinion

Ena recèrca d’un favor politic

Iñaki Delaurens

Iñaki Delaurens

Licenciat en Periodisme e Torisme. Damb er objectiu d’especializar-se en Nau Periodisme damb es ans, escriu tath Jornalet conscient dera importància der aranés en entorn sociau e comunicatiu dera Val d’Aran.

Mai d’informacions
Eth uart de casa
Les (25540), Val d’Aran
25 d’agost de 2012, Jornalet
President deth Govèrn Espanhòu
La Moncloa
Madrid


Estimat President deth Govèrn Espanhòu,
 
Damb fòrça plaser e en tot demorar era mia eleccion, escriui des d’aguest moment entà aufrir-me coma nau representant deth Consulat espanhòu en país d’12345 Oriental, perdut en immens ocean deth Pacific. È susvelhat qu’en aguesta destinacion i manque un representant dera grandesa e mitomania istoric-culturau der Estat dera tortilla de trufes, eth Chupa-chup e es aucides de taures. A mès, pensi que refusar era mia propòsta serie ua perilhosa pegueria, damb toti es respèctes. Voi díder non sonque entàs neishudi en lòc, se non entàs espanhòus que i viuen, trabalhen o, simplaments, passen es vacances.
 
Ara madeish me trapi ajaçat dessús dera èrba torrada deth mèn uart, a on hè pòqui ans sa mair-sénher semiaue trufes e anciam, victima dera calor qu’aguesti dies capvire era Val d’Aran en un paradís tropicau –ve, ja sò acostumat as nautes temperatures– jamès patida adès en país aranés –è dit país, volia díder “comarca”, non s’ofene–. Ath còp,  pensi en malerós destin des espanhòus en 12345 Oriental se non se prenen es mesures oportunes. Idèes coma era que l’è aufrit ues linhes mès tà naut. Uppsss, encara non le parlat deth mèn perfil professionau.
 
Sò de formacion universitària, mès entà èster politic non interesse quina –ne coma l’è atenhuda–. A dia d’aué, era mia situacion ei fòrça flexible –laguens d’un caumatge generau culpa des corbassi dera oposicion (coma a d’èster)– e enfoqui aguest ipotetic traslat damb notables expectatiues. Non me planhi guaire, ne lhèui era veu e sabi cuedar des colors que me dan de minjar. Damb tot, amagui un sentit umanitari que hè dera mia candidatura, era avienta entath cargue.
Sò conscient des penes economiques ath long e ample der Estat. A mès, aranesi e catalans reclamen mès sòs enes “sues” administracions, e que se parle era “sua” lengua enes escòles coma idiòma principau. Guarda que son sharramostits. Mès, luenh de toti es panagaries e apoltronadi, le remèrqui qu’ei urgent era seguretat internacionau des ciutadans espanhòus. Damb jo en Consulat, non calerà patir. Pensi recrear, enes sales repartides per 12345 Oriental, ua representacion teatrau de Don Juan Tenorio un còp ath mes entà aluenhar as toristes de rameres reincidents. È dit, teatrau… volia díder ua aucida de taures que l’agraden mès a vos. E portarè as mielhors artistes deth celh vermelh de tota Andalosia.
 
Coma aurà vist, çò que l’aufrisqui ei de besonh entà destacar, deuant de tot eth planeta, era sua magnitud estatau desdibuishada pera crisi. A mès, aguesta operacion non costarà mès d’un parelh de mil milions d’euros. Tot ua ganga de quate sòs entà un territòri coma eth sòn. Eth mèn jornau? Ua misèria entà un politic, qué le semble 4000 €/mes? Per jo perfècte.
 
Demorarè uns dies adès de partir ena recèrca, pes naues índies, d’un aute país sense Consulat –a veir se sone era flaüta–. Laguens de tretze dies me pòt trapar en petit uart dera familha. M’agradarie sauvar en secrèt aguesta correspondéncia enquia decidisque bèra causa. Peth moment, recebe un sincèr salut deth


sòn ironic e (paradòxalment) amic,



Iñaki Delaurens

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tarabàcola En amont
1.

Brau per l'article. Quora auvem e veiem ce que passa al nivèl dal piston entre las familhas e cèrcles de poier (poder) economic, politic, mediatic, universitari dins un estat, aicí pròche ò mai luenh, se polem dire qu'aquèl article es pron realista. Un filh de "bòna familha" escriuriá ben aiçò.

E mai las programacions culturalas d'un país a l'estrangièr, per far sa promocion e son espandiment intellectual, son discutiblas (nòu imperialisme institucional, propaganda torristica, realitat lingüistica e sociala trenchaa, discors pseudo univeralista e dubèrt...).

  • 5
  • 0

Escriu un comentari sus aqueste article