Bandièra01 1180x150: Comuna de Tolosa

Opinion

Quantes Fox News?

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
L’ahar es grèu. Una cadena americana de television, Fox News, estoc presa suu hurt en tot mentir aus telespectators sus un subjècte d’actualitat. Ende monde que s’interèssa aus mèdias, aquò’s pas una suspresa, mes bon, marca mau.
 
Un pretendut especialista “de la zònas de conflicte” aperat Nolan Peterson, un ancian sordat de l’armada americana, avèva commentat d’un biaish meslèu exagerat la situacion a París en seguida deus atemptats de genièr. Avèva muishat una mapa de la vila on se podèva véser zònas delimitadas d’una linha roja e qu’avèva aperadas no-go zones, sia parçans interdits aus non-musulmans, e barris “ dètz minutas en taxi de la tor Eiffel” on lo monde portava camisòts de Ben Laden. Avèva tanben avançat lo nombre de 16% deus Franceses a favor de l’Estat Islamic.
 
Lo bronc èra que lo barri de Montmartre o una part de l’arrondiment XX-au hasèvan part tanben deus camps de batèsta suspausats, çò qu’un quite torista corean podèva remercar tre son purmèr jorn de viatge.
 
Après protestacions de l’ensems deus jornalistas franceses (doncas parisencs) e una entrevista de la màger de París, Anne Hidalgo, on se demandava se calèva pas portar lo clam contra la cadena (clam qu’èra devengut una certitud, mercés a la revirada de CNN, …), l’ahar hascoc lo torn deu finestron e de la telaranha e lo jornalista se devoc desencusar publicament, en evocar un subjècte drin mesclat dambe son experiéncia de la vila en 2005 quan petèn las susmautas de banlègas. Bon, botèm …
 
Mes vaquí adara una question que nos podèm pausar a la vista d’una tau benalèja: e se Nolan Peterson avèva pas parlat de París, mes de Marselha? S’avèva descrits los barris nòrd de la vila, qui, lhevats uns jornalistas locaus, aurén remercat l’error e quina portada aurén avut lors protèstas?
 
Lo Petit Journal de Yann Barthès auré pas hèit un reportatge aquò dessús e tot seré passat shens de dobte tot lis. Sus France Info, la jornalista que relatava l’ahar se trufava de çò que son pròpri barri (lo XX-au) èra una d’aqueras zònas interditas ende Fox News, soi pas segur qu’auré reaccionat atau d’ausir parlar d’aqueste biaish de las Aigaladas o de l’Estaca deu capdulh provençau.
 
Cau díser tanben que los jornalistas franceses deus mèdias màgers (doncas parisencs) son pegats a contunhar sus la television deus USA, que pauc d’eths comprenon pas una auta lenga que l’anglés e que son a cercar nautats d’imitar vengudas de delà la Mar Grana.
 
Cada jornau televisuau o radiofonic a parlat de la tempèsta de nèu que podore arribar a Nava York, coma s’aquò arribava pas endacòm mes cada annada e mès hòrt. Resulta: una cinematèca de reportatges anonciaires e 15 cm de nèu …
 
Doncas, quantes Fox News convidan suus platèu quantes Nolan Peterson, especialistas autoproclamats ende parlar de quantes subjèctes deus escurs que pauc de monde pòt verificar?
 
Me brembi plan justament d’aver vist un tau reportatge sus la television russa i a unas annadas que semblava vertadèrament ad aqueste de Fox News, shens qu’aquò avosse pas neurit la cronica en França.
 
Me brembi tanben d’un subjècte sus Katowice, vila de Polonha que coneishi plan, que sembrèc un bèth ser sus Arte una sucursala de camp de concentracion tan la vida i pareishèva trista e mauaisida, lavetz qu’es un deus lòcs mès dinamics d’un punt de vista culturau deu país sancèr.
 
E de qué pensar d’aqueste coble estatjant deu Quebèc qu’avèva descobèrt Tolosa a la television canadiana capvath un reportatge sus las hemnas trucadas peu marit? Per astre, quitament dens condicions aquestas, avèvan trobat lo lòc hèra beròi e decidit de s’i vénguer installar.
 
Moralitat de la fabla: se cau maufisar 1/ deus especialistas de la television 2/ deus reportatges sensacionalistas que’vs muisha una realitat … de pas créser 3/ deu finestron en generau.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

antalya apraquital
4.

#3 Alavetz cap de problèmas! e abans de díser qu'es messorguier assabenta te un briu. pr'aquò ça que la lo reportage de Fox new es exagerat aquò es segur. Mas aquò balha pas lo drech d'arrefusar de vèire una certa realitayt.

  • 1
  • 0
gilós pietadós
3.

#2 ont vius Antalya ? as déjà pausat un pè dens aqueths barris òrres dont parlas, end'èster tant entresenhat ?
es ridicule, messorguèir e dangeirós de hèser passar messatges d'aquera mena.

  • 0
  • 0
antalya apraquital
2.

SEgur que per èsser un briu entrensenhats val milhor legir la premsa estrangièra que non pas françesa.!
D'aqui totas las televisions del mond an passat en bocla aquelses imatges d'un bus de torista que se fasian despolhar dabans la la torre eifel!
E de tot biais es verta que i a des quartiers ont val milhor pas passar, se vòs pas d'embrolhas, e quel cal plan estremar lo pòrta moneda o l'esmarfòn. SE dias una femna es enquera piéger...
Alavetz fox-news segur a fach mai que bona pagèla ... Pr'aquò i vertats que son pas bona de díser ençò dels dels Potonorses que plan segur i van pas jamai dins aqueles endrèits. Segur tanben que tota la tricalada de la television francesa es d'una desinformacion espectaclosa.

  • 1
  • 1
Cristian FORMENT AGEN
1.

Sèm prevenguts ! Ara, abandonem-nos inocentament a imaginar çò qu'un racionalista auriá referenciat pel 1), pel2), pel 3). Damb SA moralitat de la fabla, enquèra que i sèm bravament dins l'actualitat.

  • 4
  • 2

Escriu un comentari sus aqueste article