Bandièra01 1180x150: Comuna de Tolosa

Opinion

Èi tastat ende vosautes: lo Congrès Internacionau de Joens d’Esperanto

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Dens l’encastre de nòsta rubrica “consomacion” e “conselhs d’estiu”, èi tastat ende vosautes lo 71n Internacia Junulara Kongreso, sia Congrès Internacionau de la Joenessa d’Esperanto. Ongan se debanava a Wiesbaden, Alemanha, e 300 personas deus 5 continents i èran inscriuts.
 
Bon, solide, cau a la debuta au mens un drin parlar o comprénguer la Lenga Internacionala, se que non sentiratz un pauc de frustracion de poder pas comunicar dambe lo monde a l’entorn. Pr’amor que la comunicacion es l’enjòc màger de l’encontre e constituís lo plaser purmèr.
 
Me digaratz qu’estudiar aquò preng un shinhau de te mps, mes un amic men comencèc d’aprénguer en octobre e miava en deceme un cors de dança dens aquesta lenga davant un public internacionau. Solide, es un exemple drin extrème, mes la regularitat e l’intelligéncia de la lenga vos permet de’vs ac virar plan lèu. E coma totis èran un jorn començant, las errors son plan perdonadas.
 
A maugrat de títou Junulara , l’edat es pas tan important qu’aquò, èi jo medish plan passat lo limit de’m poder díser “joen”, mes un camisòt au lòc d’una caravata vos permet de’vs mesclar aisidament aus participants.
 
En dehòra deu programa oficiau de conferéncias de la jornada e de concèrtes deu ser (aquò que bremba bravament l’Escòla Occitana d’Estiu!!), trobaratz especialitats tipicament esperantistas, coma:
 
— L’ Amasloĝejo, sala bèra on se pòt lotjar per un prètz mendre au lòc d’una cramba dambe leit. Se cau hè seguir lo matalàs, una bona enveja de víver amassa e l’idèia de dromir un còp tornat a casa. De amaso (lo pilòt, lo molon), loĝi (lotjar) e -ejo, terminason deus lòcs.
 
— Lo Gufujo, cramba tranquilla on se pòt béver un tè o una infusion dinc a tard dens la nueit. Lo lum es adocit, se tròban candelas sus las taulas e a còps un concèrte acostic improvisat s’i debana. De gufo, la cavèca, e -ujo, terminason deus contenents.
 
— Lo Libroservo, indispensabla libraria on se pòdon crompar libes mes tanben los darrèrs discs produsits en esperanto. De libro, lo libe, e servo, lo servici.
 
— L’ Interkona vespero, serada d’encontre on los participants an los purmèrs escambis au parat de jòcs e danças coma per exemple una cèrcle circassian. De inter, entre, koni, conéisher, -a terminason deus adjectius, e vespero, la serada.
 
— La Bambumado, tradicion de veng de Belgica, mena de dança deu tapís gigant sus la musica de la Bamba que pòt s’esperlongar 45 mn e a la quala pòdon prénguer part dinc a un centenat de personas se cau. De bambo, la Bamba, -um, terminason universala e pas precisa, e –ado, accion, fòrça comparadera au “-ada” occitan.
 
— La Krokodilo, esperantista que parla sa lenga pròpia dens un encontre esperantista. Pr’aquò estoc creat lo vèrbe krokodili, sia “parlar sa lenga” e la krokodilejo, lòc dedicat un moment donat au plaser de parlar la lenga que’s vòu. L’origina de l’utilizacion du nom de la bèstia es desconeguda.
 
— Diboĉi, vèrbe pro generau que significa “hèr quicòm de pas tròp convienent, mes tan agradable …” coma, solide, engolir bièra o seksumi, que vos deishi endevinar, ara que coneishètz la terminason -um.
 
En tot saber que la Junulara Kongreso de l’an que veng se debanarà dens la bèra vila de Wrocław en Polonha, vos demora pas que 12 meses end’encapar las 16 règlas de gramatica de l’Esperanto, sia 1,33 règla per mes. Soi solide que podètz.
 
 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article