Bandièra01 1180x150: Comuna de Tolosa

Opinion

Una deputada assassinada

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
La deputada trabalhista Helen Joanne “Jo” Cox estoc assassinada lo 16 de junh de 2016 a Birstall (Nòrd d’Anglatèrra) supausadament per Thomas Mair un òmi de 52 ans. Uns testimònis dison que l’an ausit cridar “Britain first!” au moment de la hèita, çò que mia los enquistaires sus la tralha d’un murtre politic. Autes testimònis, per contra, dison qu’an pas ausida la frasa. Lo suspècte, de tot biaish, sembla aver ligams dambe movements politics de dreta extrèma, e uns jornalistas descriven lo pertrèit d’un òmi que seguís un tractament psiquiatric. Vaquí on ne sèm au moment quan escrivi aquestas linhas, benlèu l’enquista aurà progressat au moment de lor parucion e lo perpaus d’aqueste article serà vengut shens nada validitat, es lo risc de la cronica setmanèra.
 
Es mauaisit d’ac escríver atau, mes un sentit de malaisèr me prengoc quan ausiscoi aquesta informacion. A uns dias d’un escrutin sus la preséncia de Bretanha Grana dens l’Union Europenca e a un moment quan los sondatges balhavan lo brexit vencedor, aqueste murtre òrre pòt cambiar las cartas deu referéndum. Eveniment que s’escad au “bon moment” (caleré mílhor díser: ad un moment estrategic) o azard totau? Dejà lo dimenge los sondatges muishavan un revirament de l’opinion publica britanica.
 
S’ètz un policièr que mia l’enquista sus un murtre, la règla purmèra es de pas deishar nada tralha abans d’estar convençut au 100% que mia enlòc.
 
Mes d’un aute costat, se consideratz que’s pòt agir d’una temptativa de manipulacion de l’opinion, podètz vos hèr pegar lèu l’etiqueta de “complotista” e tot çò qu’i es ligat (fascista, antisemita, psicopata), sustot se l’escrivètz dens una cronica sus un jornau en linha au lòc de’n referir pas sonque aus vòstes amics dens un estanquet a l’entorn d’un pastagà.
 
Aquò rai, cau assumir, pensi clarament qu’i a una possibilitat de haut o baish 50% que sia una embrolha politica que mira a cambiar la resulta de la consulta. Notatz tanben que demòra, segon jo, 50% de las possibilitats que’n sia pas.
 
Deisharèi totun aus complotistas vertadièrs e professionaus de trobar “irregularitats” dens los testimònis, los rapòrts oficiaus o sus las vidèos de l’arrestacion. Aquestas irregularitats s’explican sovent fòrça simplament.
 
Totun, mon atencion estoc apelada i a pauc per una hèita drin estranha, una mena de rebomb istoric, senhalada per un article dens Libération deu 17 de junh. L’assassinat d’aquesta deputada britanica nos bremba un aute assassinat, dens condicions pro similaras.
 
Lo 12 de seteme de 2003, au bèth miei d’una campanha (!) per un referéndum (!) sus Euròpa (!) e l’adesion de Suèda a la zòna de la moneda unenca, una joena deputada d’esquèrra umanista e pro-europenca, Anna Lindh, mair de dus dròlles, favorabla au “òc”, estoc assassinada per un suedés de soca sèrba dens un centre comerciau. Vos èi hèit gràcias de totis los (!) que senhalan los punts comuns entre los dus ahars.
 
Tot escàs après lo murtre, los sondatges avèvan muishat un reviradís de l’opinion publica a favor deu “ja”, mes fin finala, lo “nej” avèva ganhat.
 
Pensi que la question centrala, au bèth miei deus elements de totis com per exemple s’a cridat o pas ende senhar sa hèita, es de saber se un assassinat politic manipulat es impensader en 2016 dens un país europenc democratic. Es la clau de la soscadissa e cadun a lo dret de pensar çò que vòu.
 
Se la responsa es de “òc”, lavetz la possibilitat que sia un ensag ende hè’s revirar l’opinion demòra sancèra.
 
Se la responsa es de “non”, cau díser qu’es un deus eveniments deplorables que’s pòt pas evitar a còps dens una societat modèrna.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan-Marc LECLERCQ
4.

#3 I a pas degun que dobta qu'es possible d'estar a l'encòp de dreta extrèma e d'aver problèmas psicologics, poderí me trufar en díser que justament, au contrari, seré benlèu pro costumièr ...
Per contra, se quauqu'un vòu miar una manipulacion sus l'opinion, causiré abans tot un tipe qu'a lo perhiu : de dreta extrèma e qu'a problèmas psicologics, justament.

I a pas degun tampauc que dobta que l'azard existís dens la vida.

  • 0
  • 0
ja la rapieta
3.

#2
>Lo suspècte, de tot biaish, sembla aver ligams dambe movements politics de dreta extrèma

Dins lu bilhet de Conspiracy « Emmanuelle Duverger est-elle au courant qu'un texte signé par Christophe Servan et instillant l'idée d'un complot a été publié sur le site qu'elle dirige ? A-t-elle prévu de signaler aux lecteurs de Boulevard Voltaire qu'il est non seulement tout à fait possible d'être à la fois néo-nazi et sujet à des troubles mentaux, mais également que Thomas Mair, l'assassin, était un partisan de longue date de la National Alliance (NA), l'une des principales organisations néo-nazies américaines et que la police britannique a retrouvé à son domicile des symboles nazis et de la littérature d'extrême droite ? »
https://www.splcenter.org/hatewatch/2016/06/16/alleged-killer-british-mp-was-longtime-supporter-neo-nazi-national-alliance

Aimatz beleu vos pausar de las questions per lu plaser, mas ad un momint, fau ‘restar e prener sa medecina.
Mas, non, sei be colha, qu’es un site anglès, adonc son los servicis especiaus de la reina qu’escriveten l’article.

>Totun, mon atencion estoc apelada i a pauc per una hèita drin estranha, una mena de rebomb istoric, senhalada per un article dens Libération deu 17 de junh. L’assassinat d’aquesta deputada britanica nos bremba un aute assassinat, dens condicions pro similaras.

Lu asard es ‘na chausa qu’eisista dins la vita, i a que d’avieisar la nivolada dins los ciaus. Voler veire daus liams ente son pas es lu prumier pas endevers las rumors, lu complòt :
https://www.youtube.com/watch?v=pvfgjDxDmi4

Coraladament,
JP Bertrand






  • 0
  • 0
Joan-Marc LECLERCQ
2.

#1 Un còp de mès, un debat suu debat.
Imposible de'n parlar tranquillament, mes un còp de pè en tòca dambe çò qu'escrivoc lo Hialat Voltaire : ?
Escrivi sovent sus la manipulacion, doncas sabi çò qu'es de destornar un debat en citar una auta causa d'una auta sorça end'associar un biaish de pensar a un personatge pauc simpatic au passatge (lo Menard). Sèm pas dens la soscadissa, dens l'escota de l'aute, l'escambi d'idèas, mes dens la polemica de basa, que discutís pas, que vòu pas que destrùser los autes que pensan diferentament.

Jo serí mès content de legir arguments concrèts qu'explicarén qu'èra pas qu'un azard meslèu qu'una critica que critica lo hèit de'n parlar.

  • 1
  • 1
JP la Rapieta शम्भल
1.

>Vaquí on ne sèm au moment quan escrivi aquestas linhas, benlèu l’enquista aurà progressat au moment de lor parucion e lo perpaus d’aqueste article serà vengut shens nada validitat, es lo risc de la cronica setmanèra.

Es mauaisit d’ac escríver atau, mes un sentit de malaisèr me prengoc quan ausiscoi aquesta informacion.
_____
Dins 'queu cas, i a mas de far un articulet sus los margauds tras la tiala que non far la propaganda per los confusionistes !
Qu'es pas la prumiera cronica d'aqueu acabit, aura, sabe(m) de que pensolhar sus las meschaëntas fonts de quauques cronicors dau jornau.

http://www.conspiracywatch.info/Assassinat-de-Jo-Cox-Boulevard-Voltaire-souffle-le-chaud-et-le-froid_a1618.html

JP Bertrand

  • 4
  • 1

Escriu un comentari sus aqueste article