CAPÇALERA2: Entèsta drecha, convergéncia occitana-fixa

Jornalet, gaseta occitana d'informacions

Divendres, 28 d'abril

Joan-Marc Leclercq

Dimars, 21.3.2017 03h00

Avisatz-vos a las gojatas emploridas


Comentaris 2 comentaris    
Dolent Fluix Bo Molt bo Fabulós (2 vòtes)
carregant En cargament


Qué de mès esmavent qu’una joena gojata emplorida? Ren, benlèu.
 
Dempuèi bona pausa se passeja sus la telaranha un filmòt que muisha una gojata coreana que hè un devís sus un empont, apelhada en costume tradicionau de son país. Çò que ditz es tarrible, e l’auditòri sancèr, tot coma los qu’espian lo filmòt, pòdon pas reténguer unas lagremas, tan l’istòria condada es òrre. Vaquí uns extrèits:
 
“Corèa deu Nòrd es un país de pas créser. I a pas qu’una cadena de television. I a pas internèt. Sèm pas liures de cantar, díser, portar o pensar çò que volèm. Nat líber, nada cançon, nat jornau, nat film d’amor. Soi nascuda en 1993 e estoi panada a la neishença. Ad aqueste moment los Nordcoreans se morissèvan en tot cercar la libertat desesperadament. […] Quan avèvi 9 ans, èi vist la mair d’un amic executada publicament. Son crimi? Aver espiat un filme de Hollywood. […] Lo jorn quan m’escapèi de Corèa deu Nòrd, èi vist ma mair forçada per un corratèr* chinés. Me mirava a jo, avèvi pas que 13 ans. Ma mair se daishèc forçar ende’m protegir. […] Quan traversèi l’èrm de Gòbi, avoi paur tot lo temps. Pensavi importar pas a degun dens aqueste monde, que sonque las estelas èran dambe jo. Mes a vosautes, qu’atz ausit aquesta istòria, vos mercegi fòrça. “
 
Solide, l’efèit es immediat. Cadun pòt pas qu’estar còrtocat per çò que conda aquesta berogina gojata, sustot quan ditz “que’u caloc enterrar son pair a 3 oras de la nueit” o causas atau.
 
En hèit, aquesta transfuga coreana se sona Yeon Mi Park (박연미) e parla au parat deu som de l’organizacion One Young World a Dublin en 2014. Cau saber qu’aquesta organizacion s’amassa un còp l’an e representa un encontre de joens leaders, es una mena de “Fòrom de Davos” de la navèra generacion.
 
Aquò se poderé estancar aquiu, avossen pas uns petits haginats de la telaranha compilat totas las entrevistas que Yeon Mi balhèc a numeroses jornaus. Podèm aquí mercejar lo siti In the Now que remerquèc mantunas contradiccions dens l’istòria. Un còp la gojata entèrra son pair era medish, un còp lo pair es incinerat.
 
A l’Irish Independent, condèc que devoc subervíver dambe sa sòr totas soletas (e trobar mangiscla dens la montanha: radics, bèstias de totas, graulhas …) après que lors pairs estossen empresoats, mès declarèc a la BBC qu’estón arcuelhidas en çò de l’oncle e de la tanta.
 
In the Now hè remercar que Shin Dong Hyuk, un aute famós tranfuga corean, avoèc que parts de son líber-testimòni “Escapada deu Camp n°14”, qu’estoc un escaduda au nivèu de las vendas, èran faussas.
 
Lavetz, pr’amor una tala cobertura mediatica es assegurada a testimònis que s’averan estar dobtoses? Am ací duas responsas:
 

1/ Corèa deu Nòrd es trencada deu monde, los mèdias son en recèrca de tot çò que pòt semblar una informacion suu país, e son prèsts de pagar pialats de moneda a qui que sia que’n posca parlar. Se parla de 500$ per una ora. Es temptant, ad aqueste prètz, d’inventar istòrias end’interressar son public. Am ací l’exemple de Misha Defonseca e son best-seller “ Subervíver dambe los lops” qu’estoc adaptat au cinèma abans que la vertat sus una invencion totala de l’istòria e deu personatge estoc provada.
 
2/ Aqueste filmòt nos bremba, ailàs, l’ahar deus incubators de Koweit City. Lo testimoniatge tanben lagremós d’una joenòta que condèc que, infirmièra a Koweit City, vesoc “de sons uelhs pròpis” soldats iraquians getar los nenets per tèrra ende panar los incubators. Pauc de temps mès tard, nos sèm assabentats qu’èra en hèit la hilha de l’ambaishador de Koweit aus Estats-Units, país que preparava la purmèra invasion, a la quau l’Estat francés se junhoc.
 
Se sèm en preséncia deu cas n°2, aquò’s meslèu inquietant. Voleré díser que los USA preparan una ataca sus Corèa deu Nòrd e vòlon obténguer l’assentiment de la populacion en tot utilizar los mejans costumèrs de la manipulacion. Per astre, es pas tan aisit qu’aquò.
 
 

* tèxte originau: a chines broker.



abonar los amics de Jornalet

 
 
 
 



publicitat



Comentaris

21 de març 17.59h

Es benlèu mai aisit de saber çò que se passa en Occitània......


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

21 de març 08.25h

Dificil de saber çò qui s'i passa, en Corea deu Nòrd, si los qui testimonian an interés a exagerar....


Valora aquest comentari:   votar positiu 2   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions