Bandièra01 1180x150: Comuna de Tolosa

Opinion

​​​​​​​Concors de cançons a Wrocław

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Totas las idèas son de bon prénguer, non pas? Vaquí quicòm de soscar.
 
Se debana a Wrocław, vila deu sud de Polonha, en Baisha-Silesia (Breslau deu temps d’Alemanha). Los esperantistas de la vila an agut l’idèa d’organizar un festenau de la cançon en Esperanto. Un concèpte simple, una accion aisida d’organizar sense tròp de còstas e end’una resulta pro espectaculara.
 
Sufís pas que d’aver sustot una bèla sala ende la remesa deus prèmis. Lo monde que prenguen part son pas especialament esperantofònes, mes lo vam end’aprénguer una cançon dens la lenga es fòrt.
 
Los concorses de cançon son tostemps estats una escaduda, quitament au finestron on son meslèu numeroses. Soi pas personalament estrambordat per las competicions, mes cau díser qu’un concors interèssa mès de monde que non pas un simple concèrte amator. Totis pòden prénguer part e totis se póden hèr remercar.
 
A la debuta, aquò que hè cinc ans, los candidats estón pas que quatre. Ongan, estoc pas mens de 130 cantaires que’s son presentats, solista e cantèras.
 
La seleccion, lo dissabte, s’esperlonguèc de 10 òras deu matin a 4 òras deu vrèspe, dambe duas pausas. La jurada, compausada de dus tolosencs, d’un alemand, d’un neozelandés e d’una polonesa, caumèc pas. Atribuiscoc prèmis ende las categorias: mens de -18 ans, + 55 ans, 18-55 ans, cantèra -18, cantèra + 18.
 
La remesa deus prèmis se debanèc l’endeman au Centrum Kultury e hascoc vénguer unas 200 personas e la premsa locala.
 
Cau començar de pensar a un Prèmi de la Cançon Occitana. Se los Oscars, los Césars, los Lions d’Aur, las Victòrias de la Musica, etc ... servissèvan pas de ren, existirén pas mès. Es lo parat de hèr drin de brut pro aisidament a l’entorn d’una profession o d’una cultura.
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article