Bandièra01 1180x150: Comuna de Tolosa

Opinion

Lo rugbi deu Sorelh Lhevant

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Quan se pensa au jòc de rugbi de XV, cau plan díser que ne’s pensa pas tostemps de tira au País deu Sorelh Lhevant. E totun. L’archipèl que possedís la sesau federacion deu monde segon lo nombre de licenciats après, dens l’òrdi: Anglatèrra, (716 000), Africa deu Sud (464 000), França (262 000), Australia (190 000) e Nòva Zelanda (142 000) mès abans Irlanda e Argentina. Mès aquò n’ei pas lo sol paradòxa. Lo nòste jòc beròi i arribèc pro de d’ora e los purmèrs club eston creats abans los celèbres clubs occitans istorics coma l’Estadi Tolosenc o l’AS Besièrs.
 
La vasuda deu rugbi au Japon correspon a ua èra navèra aperada “La restauracion Meiji”, moment de la caduda de la dinastia deus shoguns e deu retorn deu poder de l’emperador. La capitala nacionau estoc lavetz ad aqueste parat arrebatiada Tòquio e lo país que’s mudèc en grana poténcia mondiau.
 
Qu’èm en 1868. Los grans pòrts, Kobe, Yokohama, se dubrisson au comèrci ed arcuélhen vaishèths estrangèrs. Aquera darrèra vila que vasoc ua importanta ciutat cosmopolita on eston lèu organizats encontres d’espòrt peus despatriats europencs, mei que mei britanics. Los Japonés, eths, ne s’acontentèvan pas sonque d’espiar aqueras estranhas caras de lua tumà’s en tot passà’s ua bala ovau hèita de pança d’aulha dens un jòc comprés com estant ragubī.
 
Coma de costuma, lo monde universitari que joguèc un ròtle primordiau dens l’espandiment deu jòc. Dus professors vasuts dens l’archipèl, un anglés e un japonés, Ginnosuke Tanaka e Edward Bramwell, tanlèu tornar de Cambridge on s’èran acabats los estudis, qu’apitèn ua equipa de rugbi au còr de l’universitat de Keio qui’s hascoc atau en 1899 lo purmèr club japonés. Que calerà totun aténguer duas annadas enqüèra abans de véser lo purmèr encontre contra ua seleccion d’estrangèrs de Yokohama. Aquera data deu 7 de deceme de 1901demorarà istorica ja sia la pesuga des·hèita 35 a 5.
 
D’ara enlà, lo jòc mei beròi deu monde s’espandiscoc dens lo mitan universitari, sostengut per la quita familha imperiau. Après las universitats vengoc lèu lo temps deus licèus de s’aviar dens la benalèja. Dens las annadas 20, l’archipèl comptava dejà mei de licenciats que non pas Gualas, Escòcia e Irlanda totas amassa! L’equipa de l’universitat de Waseda que hascoc en seguida ua virada en Australia e la de Doshisha en Manchoria (Lòc meilèu susprenent entà se n’anar en virada dab ua veishiga ovau, mès ne cau pas desbrombar qu’èra lavetz territòri aucupat per Japon)!
 
Lo 30 de noveme de 1926 ua estapa de mei ei afranquida dab la creacion de la Federacion Japonesa de Rugbi. Lo purmèr president n’estoc pas ni chic ni briga lo princi Yasushito Chichibu eth medish, hrair de l’emperador Hirohito. Lo son sosteng au jòc estoc primordiau e en 1947, que balhèn lo son nom a l’estadi de Tòquio: lo Chichibunomiya Ragubī-jō, on se pòt véser ua estatua deu “princi esportiu” atau qu’estoc enchafrat, en tienguda rugbistica.
 
En 1931, l’equipa nacionau ei creada, las colors causidas: que jogaràn dab un camisòt arrajat blanc e rotge e atau lo purmèr encontre se pòt debanar, serà lo 31 de genièr contra Canadà. L’equipa enchafrada las “Flors de Cerièr” ganha la soa purmèra sortida dab un planchòt de 9 a 8!
 
Puish las annadas 40 n’eston pas brica favorablas au jòc: après la presa de poder de Fumimaro Konoe, lo regime fascista, au contra de çò qui’s debanèc en Italia, èra ostile au rugbi a maugrat deu sosteng de la familia imperiau. Espiat coma ua practica estrangèra, lo ragubī estoc ua pausa arrebatiat tokyu (luta contra la bala) entà paréisher mei japonés. La guèrra que’s hascoc seguir la màger part deus jogadors deu país qui eth, estoc amantat d’un tapís de bombas americanas e las infrastructuras eston arroeinadas. En 1943, tot s’estanca, pas nat encontre n’ei possibile dens l’empèri.
 
Mès los japonés son coneguts per aver un temperament valent e ponhastre, e tanlèu 1945 lo jòc torna suus prats arreconstrusits a la prèssa. Lavetz que comença lo periòde de las enterpresas. Las granas firmas japonesas qu’apitan la lora equipa e un campionat corporatiu vatz, parallèlament au campionat universitari. La purmèra societat campiona  deu Japon estoc la Kotobank. Toshiba, eth, crea lo son club en 1948.
 
En 1963 estoc creat un campionat nacionau mesclant a l’encòp las mei bonas equipas universitàrias e d’enterpresas. Lo nivèu que pugèc. En 1968 la Federacion Asiatica de Rugbi que vengoc a la lutz e, en 1969, la navèra Copa d’Asia ei ganhat peu Japon a casa. La competicion serà emportada 15 còps peus Japonés dinc a quan se cambièc en Tornei de las Cinc Nacions Asiaticas (Japon, Corèia deu Sud, Hong Kong, Kazachstan e Gòlfe Persic). Las resultas de l’equipa nacionau se melhoran: 1968, Victoria contra los All Blacks juniors. 1971: Japon 3 - 6 Anglatèrra.
 
Dens las annadas 70, lo campionat japonés que’s dubriscoc aus gaijin, los estrangèrs venguts de las isclas deu Pacific: Tonga, Fiji, Samoa. Lo paradòxa japonés ei que lo campionat de las firmas comerciaus èra un campionat … amator! Los jogadors èran emplegats de la societat sponsora mès qui’i tribalhavan vertadièrament.
 
Ei per aquò que l’Empèri deu Sorelh Lhevant prengoc per las annadas 90 un retard fatau suu professionalisme, e la participacion a las purmèras copas deu monde eston mauaisidas, dab sustot ua des·hèita istorica contre Navèra Zelanda en 1995 sus l’escòre de 145 a 17.
 
En 2006 s’organiza un campionat miei-professionau. Las resultas de las Flors de Cerièr que’s melhoran, sustot au nivèu deu Tornèi de las Cinc Nacions Asiaticas (Victòria suus Estats-Units).
 
Adara, lo Japon que’s hè enlà de cap tà un avenidor clarinós, qu’estoc recentament elegit a l’organizacion de la Copa deu Monde 2019. Demòran enqüèra sheis annadas tau país tà poder pujar au mei haut nivèu e desarrapar benlèu ua qualificacion en quart de finala.
 
Crotzam los dits entà qu’aquesta valorosa nacion de rugbi posca beneficiar deu frut deus sons esfòrç e de l’esperit combatiu qui an eretat deus lors antics.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article