Bandièra01 1180x150: Comuna de Tolosa

Opinion

En delai de la sola consciéncia ecologica (III): Aran e lo torisme verd

Maime Caillon

Maime Caillon

Engenhaire de formacion, militet dins mai d'una associacion ecologista dempuei sos 19 ans.

Mai d’informacions
Lo darrier article de la seria serà consacrat au programa presentat per Unitat d’Aran dins lo document “Amassadi entà auançar” de son 5esma congrès en abriu de 2008 . Queu document presenta un biais de desvelopament que d’autres país occitans podrián voler segre: l’economia toristica. Adonc, me sembla util d’en analisar lo contengut d’un punt de visda ecologic. Lo paragraf “Miei ambient e pagesia, ua naua perspectiva” nos interessarà mai que mai.
 
D’en prumier, balha un objectiu ambiciós per çò de l’environament: “arténher un nau equilibri ambientau que mos permete créisher sense suberpassar era capacitat de carga deth nòste territòri”.
 
Puei nos explica qu’Aran basa “era sua economia ena explotacion des recorsi naturaus pr’amor deth torisme majoritàriament”. Qu’es çò que fan tanben d’autres país occitans, en desvelopar çò que se ditz lo torisme verd, mai que mai de l’activitats esportivas d’ivern coma d’estiu.
 
Dins queu tipe d’economia lo paisatge es fòrça important. E veiquí lo liam entre environament e los paisans. Per Unitat d’Aran, lo ròtle daus paisans “ei clau entara gestion e conservacion deth paisatge, e damb eth miei ambient e es sòns besonhs”.
 
Qualas son las consequéncias per la capacitat de charja environamentala daus territòris d’una tala economia? L’activitat toristica implica daus desplaçaments importants que seràn fach en veitura per júnher la Val d’Aran. Lo pes environamentau es pas tant los d’una populacion suplementària sus lo territòri coma l’impacte de sa venguda. E mai la rarefaccion daus produchs petroliers e l’aumentacion de lor pretz podriá geinar lo desvelopament economic d’Aran. Limitar son atraccion toristica a un locau mai o mens large – per exemple son airau culturau (Occitània, Catalonha e benleu Aragon) – seriá necesari per limitar l’impacte environamentau daus transpòrts.
 
Darrier punt: limitar la foncion daus paisans a la conservacion dau paisatge es una error. La foncion prumiera que deu conservar l’agricultura es la de noirir la gent. Mai que mai dins las zònas ruralas. De segur, qu’es pas incompatible emb la conservacion dau paisatge. Mas qu’es important de poder conservar una sobeiranetat alimentària, per que l’aprovisionament en Aran siá mens dependent dau còst daus transpòrts e daus cors mondiaus de de la denada alimentària.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article