Bandièra01 1180x150: Comuna de Tolosa

Opinion

Dos ecologistas au govern

Maime Caillon

Maime Caillon

Engenhaire de formacion, militet dins mai d'una associacion ecologista dempuei sos 19 ans.

Mai d’informacions
Dos ecologistas au govern
 
François Hollande ganhet l’eleccion presidenciala francesa lo 6 de mai passat e son prumier ministre, Jean-Marc Ayrault, formet un govern emb los partits politics qu’avián un acord emb lo PS: Euròpa Ecologie Los Verds e lo partit daus radicaus de mança. Adonc, dos ecologistas i participan: Cécile Duflot, secretària nacionala d’EELV, coma ministra de l’Egalitat daus territòris e dau Lotjament mai Pascal Canfin, especialista de l’economia verda, ministre delegat au Desvelopament - lo daus país dau Sud. Lo ministeri de l’Ecologia, dau Desvelopament duradís e de l’Energia (MEDDE) fuguet balhat a Nicole Bricq, anciana vicepresidenta de la comission de las finanças dau Senat marcada au PS. L’an pas balhat a un ecologista per doas rasons. D’en prumier, los ecologistas vòlon mostrar que son capable de gerir d’autres domenis que lo de l’ecologia. Puei perque l’energia fai partida de las competéncias dau MEDDE, energia mai que mai nucleara en França. 
 
Quala serà lor influéncia sus la politica governamentala? Podem supausar que la lei de decentralizacion venenta serà l’òbra de la ministra de l’egalitat daus territòris. Podem esperar qu'i metrà un pauc de las ideias de son partit: mai de poder per las regions e una plaça per las lengas dichas regionalas. De veire çò que farà de las metropòlis dau projecte de Sarkozy, qu’Hollande era pas contra. Per lo demai - l’ecologia, la santat, los transpòrts, l’energia - podem mas esperar en la fòrça de persuasion daus dos ministres e daus parlementaris ecologistas que seràn elegits en junh. 
 
Coma ecologista occitan, serai attentiu a quauques punts precís de la politica governamentala:
- la seguda balhada aus permés d’exploracion e d'expleitacion daus gas e òli d’eschiste que l'acòrd PS/EELV prevei d'abrojar
- los transpòrts mai que mai ferroviaris e los arbitratges entre las LGVs e los liasons localas (TER, transpòrts urbans) per çò de la participacion financiera estatala tras una estructura novela "France Infrastructures"
- lo nuclear perque Hollande sembla pas voler respectar l’acòrd PS/EELV en barrar nonmàs la centrala alsaciana de Fàssene 
- la gestion de la sauvatgina, perque tant lo lop qu’es a se tornar installar en Occitània dempuei Itàlia coma l’orsa pirenenca pausan la question de l’equilibri entre proteccion de la biodiversitat, activitat pastorala e torisme mai la de las cooperacions transfrontalieras entre occitans.
 
Tornarai sus quilhs punts quand l'actualitat zo necessitarà o per far lo bilanç de la participacion ecologista au govern francés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Faidit Comuns
8.

#7
Comprèni.

Es vertat que los ecologista aparisenquits se devon trufar de las lengas coma ieu de mon primièr parelh de caucetas. Son los de RPS qu'en enfortit aqueste tèma.

Curiosament, autant fasiái fisança a na Jolt coma persona intègra, autant na Duflot ne sèmbla èsser una vertadièra bèstia politica, fin finala completament a l'aise dins lo sistèma.

Veirem ben,mas francament soi per EELV e la lor dinamica. Solament, comenci de conéisser la musiqueta. Ane, se cal aplaudir dins los meses que venon i serai, mas se cal fiular, i serai tenben.
:-)

  • 1
  • 0
Maime Limòtges
7.

Faidit, quand EELV ditz qu'es per lo federalisme diferenciat mai las lengas dichas regionalas, crese qu'es mai que mai una concession a lors aliat regionalistas. Una bona partida daus militants d'EELV deven pas saubre çò qu'es e mai se foten de las lengas dichas regionalas. Mas l'ideia de descentralizacion es plan dins lors testas. Mai que mai balhar mai de poder a la region e far disparéisser los departaments.

De notar que lo lotjament es surtit dau ministeri dau desvelopament duradís per 'nar dins queu ministeri de l'egalitat daus territòri : pòt èsser per una estapa de mai dins la descentralizacion en balhar a las collectivitats localas quela competéncia (o mai de competéncia dins queu domeni, sabe pas exactament çò qu'an desjà).

Adonc, veiram ben çò que se passarà, ne'n tornarem parlar. Sei pas optimista mas espere de veire.

Matieu, Duflot e Canfin participen au govern perque n'i a un acòrd per las legislativas entre lo PS e EELV. Son aquí per aplicar çò qu'es dedins.

  • 2
  • 0
Faidit Comuns
6.

Veirem ben de tot biais...
Vertat es qu'es un chic un procès d'intencion, mas quantes de còps nos a engantat, mentit la classa politica? Aquò fòrça un pauc lo pessimisme.

Enfin, francament, aimariái milhor poder dire dins qualques meses que m'èri enfadat per pas res. Desiri prigondament que capite. Donarai un pauc de temps al temps. Avètz rason.

Anem, serà un nòva experiéncia per ieu: venir un occitanista optimista

Mahmut: mea maxima culpa: èra un pauc sexista de dire que qu'urosament que ten un polit cuol per compensar. La nocion de compensacion pel cuol es masclista, de vertat. Per contra es verai que ten un polit cuol e i a pas cap de vergonha a èsser polida! ;-)


  • 3
  • 0
Matieu Castel Amians
5.

#3 Faudrà bessai esperar que foncionèsse aqueu Ministèri per saupre sa finalitat non ? D'autant mai que, a çò que me sembla, EELV ganhèt pas la presidenciala e donc, Duflot es estada nomenda per aplicar lo programa de Hollande.

L'egalitat dei territòris, en de mai, lo fau pas comprene coma une question de region solament. Quand parlan de territòri, parlan tanben d'espacis que se diferencian per son estructura. Per exemple Vila / balèga / campètre / periurban / ZAC, etc...

En de mai, parlan pas d'un solet territòri, un e indivisible mai ben "dei territòris". Ja es un progrès non ?

Me sembla que li fas un marrit procès d'intencion per ara (mai sabi pas çò que serà l'avenidor nimai !)

  • 4
  • 0
Mahmut
4.

Faidit, tròbi ton comentari un pauc sexista, m'enfin ..

Pensi efectivament que Duflot ei un animau politic qui l'interèssa pas que de se plaçar.

Per contra, l'istòria de l' "egalitat territoriau" ei un faus procès me sembla. Egalitat ei pas contradictòri dab decentralizacion, pòt estar comprés com egalitat de dret per exemple.

Vederam plan çò que volerà o poderà har en aqueth ministèri ..

  • 3
  • 1

Escriu un comentari sus aqueste article