Bandièra01 1180x150: Comuna de Tolosa

Opinion

La cigonha blanca

Pèire Pojada

Pèire Pojada

Nascut en agost de 2001, es afogat d’ausèls dempuèi 5 ans. Es creator e autor del sit auselum.

Mai d’informacions
La cigonha blanca (Ciconia ciconia) es un ausèl plan grand de mai de 1m de long e mai de 2m d’envergadura. La cigonha es un ausèl fòrça conegut e aimat. La cigonha blanca, coma son nom o indica, es majoritàriament blanca e pas negra coma sa cosina la cigonha negra (es pas una farcejada, exitís vertadièrament, mas malurosament es plan rara). A lo còl, lo ventre, l’esquina e la mitat de las alas blancas. Coma los autres ausèls de sa familla, los ciconiiformes, la cigonha es una cambaruda. A un long bèc, un long còl e de longas patas.
 
La cigonha es un ausèl que viu dins los endreits desgatjats e umids. Se noirís de peisses, de granhòtas, de colòbras, de crustacèus, etc. Li arriba quitament de manjar de pichons mamifèrs, coma de ratinhòlas o mai rarament de mostèlas. Son metòde per “caçar-pescar” es de caminar dins los camps e los prats (sas longas patas li permeton de caminar dins d’èrba nauta) e d’arrapar un pauc tot çò que tròba amb son grand bèc plan ponchut. Quand nisan en colonia, es plan corrent que se noiriscan tanben en grop. Quand nisan en vila o al bòrd d’un lac, se’n van sovent en planant, coma los rapinaires, fins a un prat qu’i an la costuma de se noirir.
 
Las cigonhas, son d’ausèls migrators que parton cada annada en direccion d’Africa eqüatoriala. Lor migracion fa mai o mens 10 000 km e dura entre 4 e 7 setmanas. La migracion se fa en grop e en seguissent un trajècte plan precís: siá passan pel destreit de Gibraltar, siá per la Turquia e la Mar Roja. Passan per aquelis dos endreits per çò que vòlon pas passar per dessús la mar, qu’i a gaireben pas de corrents ascendents. En efièit, las cigonhas utilizan los corrents ascendents per volar e utilizan pauc la fòrça de lors alas. (Los corrents ascendents son de bofiòlas d’aire caud que se crèan sul sòl e coma son mai caudas que l’aire de l’entorn, pujan; coma pujan, d’unis ausèls ne profièitan en planant a l’interior de la bofiòla, per pujar mai naut e se daissar lisar sus qualques quilomètres apuèi).
 
 
Per mai d’informacions sus la cigonha e sus ausèls podètz anar sus: Auselum.wordpress.com.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article