Bandièra01 1180x150: Comuna de Tolosa

Opinion

Ensenhament de l’occitan au licèu de Brinhòla

Reinat Toscano

Reinat Toscano

Escrivan, poèta e professor d'italian e occitan. Autor d'una Gramàtica niçarda

Mai d’informacions
Au licèu de Brinhòla, l’ensenhament de l’occitan a ren d’un lòng fluvi tranquille! Ren de ben originau, per dire la veritat: totjorn la sansonha que coneissèm, que fa que ren se pòu metre en plaça ni mantenir que que siegue sensa la bòna volontat administrativa: problema d’oraris incompatibles, informacion deficienta ò pas facha, opcion pas mencionada dins lu dossiers d’inscripcion... Avèm ja tot vist deis empachas possiblas...
 
En setembre de 2013, noveu Provisor, aparentament dubèrt: recampi en catastròfa 9 escolans de 2a e, miracle! Tròbi una ora comuna per n’aculhir 5! Obtenèm 1 ora per setmana e capitam de metre en plaça un projècte pedagogic: una senhaletica en occitan, que lei promiers elements son pausats en decembre: “Sala dei Professors”, “Secretariat dau Provisor”, “Secretariat dau Provisor Adjonch”. Mai en janvier, au retorn dei vacanças, plus de senhaletica! Cu l’a arrancada? Lo Provisor Adjonch que s’es planhut au Provisor d’èstre pas estat avisat? Lei secretàrias, qu’avián clarament mostrat sa desaprobacion au moment de l’installacion? De professors, que d’únei s’èran declarats clarament còntra en nom de la Lèi Toubon? Quauqu’un d’autre? Mistèri... E pas question d’aver la permission de contunhar lo projècte...
 
Costat informacion, lo Provisor mandèt una letra ai Collègis dau sector per informar leis escolans de 3a, en prepausant mon intervencion dins lei classas. Deguna responsa... Saupèri lo perqué quora venguèron au Liceu per un acamp lei professors principaus de 3a: per la màger part, l’informacion li èra pas arribada. E aquélei que l’avián aguda (pegada en sala dei professors sensa deguna explica) l’avián pas legida... Tant que lei collegas èran aquí, n’avèm aprofichat per faire una novèla distribucion d’informacion (desplegant, acompanhat de la brocadura “L’occitan, qu’es aquò?”).
 
Passèron quàuquei setmanas. Quora pausèri la question a d’escolans de 3a vengut en visita de descubèrta au Liceu, degun aviá ausit parlar de provençau... M’aquò, se comprèn facilament que, en setembre de 2014, 1 escolan solet (sobre pauc ò pron 1700) s’èra marcat. E coma lo Provisor Adjonch aviá ja recuperat l’ora de provençau per completar mon servici d’italian, inutile de seguir la demanda dau Provisor de cercar de volontaris...
 
Arribam en janvier. Lo Provisor me tòrna demandar d’alestir una letra per informar lei Collègis. Me demanda se pòdi ajónher lei logòs d’associacions ò d’organismes, istòria de donar mai de pes au corrier. Leu dich, leu fach: lo Jornalet respònde de òc immediatament, coma Prouvènço d’Aro, Aquò d’Aquí, lo CIEL d’òc e l’IEO. Mai pas lo Felibritge, perqué lo cors de provençau dau Liceu es pas una accion dau Felibritge ni d’un Felibre... D’aitant mai que l’Escòla felibrenca locala, dins la drecha linha dau “Couleitiéu”, a totjorn mes d’empachas au trabalh fach au Liceu, per exemple en disent a la cantonada que faliá pas marcar seis enfants perqué èra pas de provençau que s’ensenhava! Coma se lo Capolier Pèire Fabre aguèsse acceptat d’inscriure seis enfants dins un cors onte se siguèsse pas pres en còmpte la grafia mistralenca!
 
La letra, doncas, la farai, e veirèm ben...
 
A! Oblidavi: aqueu Liceu onte de gents vòlon pas vèire la lenga d’òc ensenhada pòrta lo nom de ... Raynouard. Çò que rèsta d’eu se deu revirar dins son cròs en vesent pariera situacion!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Reinat TOSCANO LO VAU
7.

#6 Gramací per aqueu comentari.
Lo problema dei collegas, es que per la màger part son opausats à la lenga nòstra (en nom de la democracia e de l'egalitat!), ò alora son favorables quand fa ganhar d'oras per mantenir un pòste e sensa opinion quand i a pas besonh de se batre per un pòste (mon afectacion oficiala es en italian, es à dire que cada ora de provençau que pòdi faire desgatja automaticament una ora d'italian, quand l'occitan es dins mon orari, çò qu'es pas totjorn lo cas...).
Veirèm ben çò que l'IEO podrà faire dins lei collègis. Devi tambèn intervenir dins mon vilatge, que siéu estat sollicitat per lo Carneval de 2016 (per faire cantar leis enfants en provençau) e desespèri pas de faire acceptar un "imne" en occitan per nòtra famosa Fiera de la Saussissa (1era dimenchada de setembre).

  • 2
  • 0
Un legeire Cevenas
6.

Coneisse bien vòstres escrichs. Me plason vòstre estile mai vòstre parlar.

A despart d'aquò, sens mai far d'alòngui sus vòstra escritura qu'es pas lo subjèct aicí, vos dise pas qu'una causa : "Gramecí e òsca per la pena que prenètz, per vòstra accion en favor de la lenga !".

La situacion es complicada dinc l'ensenhament public, malerosament...
Coratge, demoressiatz pas sol dinc vòstra òbra, cercatz-vos de sosten en cò de vòstres collègas,
en esplicar bien la rason e lo ben de vòstra desmarcha.

La lenga es dinc son país, legitima. Es un dever de li laissar una plaça.
Autrament, es lo contrari de la filosofia que se'n reclàmon la maja part dals ensenhaires en França.
Chau descolonizar los esperits mai l'ensenhament, pedagogicament.

Après... la ierarchia... i a d'òbra !
Gramecí un còp mai , Monsur Toscano. O fasèm pas pro de grameciar lo monde que se bolégon.

  • 0
  • 0
Reinat TOSCANO LO VAU
5.

Quàuquei nòvas... Dos collègis an respondut à un corrier de l'IEO, per dire que son demandaires d'informacion. Aquò es una bòna nòva... Mai díson que li agradarié qu'aquesta informacion siguèsse facha, en mai de l'IEO, per lo professor dau Liceu... Un dei collègis a demandat au professor (=ieu) per l'intermediari d'una collega amiga. Perqué pas per la via ierarquica? An pas reçauput la famosa letra d'informacion? Perqué lo problema es que lo provisor dau Liceu es estrechament estacat à la via ierarquia e s'intervèni directament provòqui una guèrra entre eu e ieu... Ai avisat l'encargat de mission, per qu'intervengue per demandar una explica ai collègis...

  • 1
  • 0
Reinat TOSCANO LO VAU
4.

Ai pas vist la letra mandada, mai aparentament sembla que siegue arribada... Sensa deguna responsa oficiala, evidentament... Solament una responsa oficiosa, d'un collègi que vòu estudiar la possibilitat de durbir l'opcion l'an que vèn (se m'encargui dei cors, causada aisada, evidentament, entre mei cors d'italian au Liceu, de la 2a a la Terminala + la seccion professionala e lei BTS, mei cors d'occitan per l'IEO e autreis activitas...). Mai ren d'oficiau per lo moment... (doncas ren de solide).
Pas de responsa, nimai, de mon Provisor, a cu ai demandat de faire votar l'adesion dau Liceu au Fòrum d'Òc. Veirem au Conseu d'Administracion venent, que leis elegits dau personau s'i son declarats favorables...

  • 0
  • 0
simplet
3.

A veire lo pauc de comentaris, a creire qu'autra part tot es excellent -au contrari de çò qu'es presentat aicí- o alora qu'interèssa degun??

  • 2
  • 0

Escriu un comentari sus aqueste article