Bandièra01 1180x150: Comuna de Tolosa

Opinion

Per la creacion d’una federacion occitana de rugbi

Sèrgi Viaule

Sèrgi Viaule

Poeta e prosator, e mai se se definís mai coma legeire que coma escrivan. Foguèt director de la revista 'Occitània' pendent 30 ans. Es ara collaborator de Lo Lugarn, la revista del Partit de la Nacion Occitana (PNO).

Mai d’informacions
D’aquesta passas, d’unes valents son a soscar a la creacion d’una federacion occitana de rugbi. Amb eles, siem nombroses a i pensar. Benlèu cada dimenge de matin en nos rasant abans d’anar a l’estadi? Ça que la, siem talament preses pel militantisme al quotidian que, sovent, podem pas tot far a l’encòp. Siem de longa a pesar e destriar nòstras prioritats. Tenem malusorament pas la dona d’ubiqüitat. Per ne tornar al sicut que nos interessa, totòm sap que la gestion d’un club esportiu, per tan amator que siague, demanda un trabalh d’equipa coordonat e constant. Necessita una disponibilitat e una energia de las consequentas. Es un engatjament social important.
 
Coma plan maites ai sovent soscat a un tal afar. La primièra question que se pausa en Occitània es aquesta: quin rugbi?: lo de XIII o lo de XV? A l’ora d’ara lo XV es plan mai espandit, plan mai viu e plan mai mediatisat. Emai se, vertat, dins l’istòria esportiva de nòstre país, aquò’s pas totjorn estat lo cas. Rai! la causida se pòt pas far sonque sus l’estat actual de mediatizacion de l’una o l’autra forma de rugbi. Nos cal ensajar de véser çò qu’es la demanda sociala actuala e tanben determinar çò que seriá pus aisit per nautres de metre en plaça.
 
Sus aqueste sicut soi un pauc embestiat per çò que soi de cultura tretzista. Foguèri jogaire as Albi dins las annadas setantas. A n’aquela epòca lo rugbi lo mai espectaculat èra lo XIII. Del temps qu’al XV los rubiaires se trigossavan pesugament d’una tòca a una mesclanha e d’una mesclanha a una tòca, al XIII, la cavalariá, mai o mens leugièra, èra deslargada. L’espectacle i èra plan pus viu qu’al XV. Mas, jos l’amicala pression dels paises anglo-saxons e mai que mai jols imperatius del professionalisme, lo quinze a evolucionat. Es vengut tan viu e tan plasent que lo XIII. Soi ara quitament convençut qu’es, dins sas fasas de jòc, mai diversificat que son fraire lo XIII. Devem, atanben reconéisser qu’es d’ara enlà mai popularisat que son concurent. Dins l’amira de la creacion d’una federacion occitana de rugbi, tal valdriá mai causir la practica la mai encorada dins la populacion. Subretot que nos caldrà ben convencer, s’aquò ne vira, d’unes pichons clubs a quitar la Federacion Francesa de Rugbi per nos rejúnher. Essent la densitat del XV mai sarrada, me pensi rasonable de reténer aquela mòda de jòc.
 
L’idèia de crear una federacion occitana de rugbi es plan pus judiciosa que de començar per crear una equipa nacionala, coma o faguèt l’Associacion Occitana de Fotbòl en 2004. D’efièch, per bastir seriosament un edifici cal començar per betonar d’apavesons estadissas e duradissas. Se pòt pas començar un ostal en pausant la teulada. Çò que fa l’Associacion Occitana de Fotbòl es plan d’un punt de vista simbolic, mas son equipa es completament fòra-sòl. Dins quina disciplina d’espòrt collectiu que siague, tant que i aurà pas un campionat occitan organizat e mestrejat per una federacion occitana, se poirà pas parlar de representacion esportiva nacionala dins aqueste espòrt.
 
Me pensi que per enfaciar la creacion de federacions esportivas avem jols uèlhs un exemple viu en Occitània: lo de las calandretas. Lo rapròchament pòt susprene, mas l’exemple es significatiu. Imaginatz a la fin de las annadas setanta la creacion de las primièras escòlas immersivas dins un Estat tant jacobin que França! D’ont mai que, contrariament als espòrts, tocavem aquí a un pilar de la politica assimilacionista de la republica. Tocavem quitament a un tabó jacobin. Malgrat aquò, capitèrem a crear cinquanta cinc escòlas e collègis (es pauc o pro la chifra d’aquesta dintrada 2014). Los militants de  las calandretas faguèron, e contunhan de far, un trabalh social e politic remirable alprèp de la populacion e dels elegits comunals e territorials. Una gasanha que deu servir de modèl a la creacion eventuala d’una federacion occitana de rugbi (mas tanben, plan solide, a la creacion d’autras federacions esportivas que l’esquèma d’intervencion sociala es, mai o mens, lo meteis).
 
En meteis temps que crearem —s’aquò se fa— una federacion occitana de rugbi; cresi, e mai soi solide, que nos caldrà crear qualques clubs. Es plan mens complicat, çò me sembla, de crear un club de rugbi dins un vilatge o una vilòta que non pas de crear una escòla. A priòri, la demanda sociala es potencialament mai aisida de trobar per s’amusar amb un balon que non pas per ensenhar en lenga nòstra. A la gròssa, per crear un club de rugbi basta pas que de trapar un vintenat de jogaires e un desenat de bailejaires. Cal tanben, ça que la, anar sollicitar la comuna per aver un estadi. L’autrejament d’unas talas installacions deuriá pas èsser causa insusmontabla. Los creators de calandretas vos dirán que lo pus malaisit, a la debuta del procèssus, es d’enançar una dinamica.
 
Se volem far país, l’idèia de la creacion d’una Federacion Occitana de Rugbi va de se. Avem pas res d’esperar de la federacion francesa, empetegada qu’es dins una ideologia tricolorista. Nimai la realizacion d’un tal projècte me pareis pas utopica. Per començar, bastariá pas que d’aver un desenat/dotzenat de clubs per organisar una primièra espròva de campionat occitan. Plan solide, se podiem n’aver maites, seriá plan melhor. Mas cal èsser realistas e saber començar per la debuta; lo Pont de Gard s’es pas bastit en una nuèit! Amb qualques clubs que se porián crear ex inhilo, se poriá tanben convéncer qualques clubs actualament afiliats a la F.F.R. de rejúnher la F.O.R.. Segur que los sols clubs que poriem eventualament raliar a la F.O.R. serián de clubs qu’evoluïsson actualament en serias dels campionats regionals. Rai! es logic que lo nivèl rugbistic siá famós tre la primièra annada. Mas amb lo temps e la multiplicacion dels clubs aderents, lo nivèl, forçadament, pauc a cha pauc, se melhorarà.
 
Quin impacte social poriá aver una tala iniciativa dins lo pòble occitan? Quin acuèlh recebriá la creacion d’una federacion occitana de rugbi en parrallèl e en concuréncia de la F.F.R.? Siá ditz en passant, qu’espeliga una federacion occitana e podem comptar sus d’unas personas de las instàncias nautas de la F.F.R. per far d’anti-jòc. Mas dins los comitats se poriá qu’agessem drech a d’aurelhas atentivas. Lo que jòga pas, risca pas de ganhar!
 
Soi convençut que la creacion e la perennizacion d’una federacion occitana de rugbi seriá un biais popular de far prene consciéncia de lor identitat occitana als afogats de la boshiga ovala. E perqué pas? de far venir de monde a l’occitanisme. De tot biais, gerir un club de rugbi afiliat F.O.R., seriá ja un engatjament nacionalista occitan. Lo monde occitan d’ovalia es en partida tricolorizat, mas benlèu pas qu’en susfàcia. Se ne vira, bastariá pas que l’ofrida d’una occitanizacion de la practica per provocar de vocacions. Amb aquò avem l’avantatge de poder far remarcar als afogats de la planeta rugbi que d’autras nacions, pel moments sens Estats, participan al campionat europèu del tornèg de las sièis nacions.
 
Demòra que tot es encara de far. Los projèctes son una causa, lor realizacion n’es una autra.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Cristian FORMENT AGEN
6.

"Amb eles, siem nombroses a i pensar. Benlèu cada dimenge de matin en nos rasant abans d'anar a l'estadi." En meteis temps, òm pensa a de perorasons utilissimas per "se faire mousser."
Cal ben assumir sa posicion de miei diu gromand d'idolatres !

  • 7
  • 2
antalya apraquital
5.

E quora se fa lo Recampament de las Entrepresas Occitanas per far rampèu al Medef......

  • 4
  • 1
Gèli Grande Lairac en Agenés
4.

Car amic Sergi Viaule

I èri ne pòdi testimoniar
La Federacion Occitana de Rugbi o F.O.R. existis.
Es estada vertadierament creada dissabte 11 d'octòbre de 2014 a Tolosa e los seus estatuts redigits en occitan tant coma en francés seràn despausats d'aqui gaire de temps a la prefectura de Garona Nauta.
Ara es pas mai una idèa ..... es una realitat que cal far viure e conèisser.

  • 5
  • 3
Cristian FORMENT AGEN
3.

#1 N'ei pas : credó ; qu'ei : credoi.
N'ei pas : qu'èi tot hèit ; qu'ei : qu'ei tot hèit.
Dab las meas excusas.

  • 3
  • 3
Cristian FORMENT AGEN
2.

#1 J.M. Leclecq, article de dimèrcs.

  • 3
  • 3

Escriu un comentari sus aqueste article