Bandièra01 1180x150: Comuna de Tolosa

Opinion

Retorn sul micromecenatge

Terric Lausa

Terric Lausa

Faguèt d'estudis d'occitan a l'Universitat de Montpelhièr. Militant occitanista e aimador de la frairança occitano-catalana.

Mai d’informacions

Tèxte legit

Lo 7 d'abrilJornalet, en collaboracion amb l'associacion dels Amics de Jornalet (que ne soi clavaire), a lançat una campanha de micromecenatge, o dit autrament de finançament collectiu. Pendent 44 jorns cadun a agut la possibilitat de portar una soma de moneda, segon sa volontat, segons sos mejans. La tòca èra de poder recampar los sòus per pagar l'albergament del sit internet del jornal e per crompar un ordinator nòu de qualitat professionala. Unes noranta personas participèron. La soma neta que recebèt Jornalet foguèt de 4447 €. L'objectiu d'arribar a 3600 € largament foguèt atengut e passat. Cada jorn los chècs arribavan amb de messatges de simpatia e d'encoratjament, d'aqueles messatges que fan plaser a l'alma. Tant m'an esmogut los donators coma los que nos escrivián per dire que moralament sostenián l'accion mas qu'avián pas los mejans de donar, quitament 10 èuros.
 
Aqueste micromecenatge reüssit es una escaduda collectiva. Es la victòria del pòble del país occitan e catalan.
 
Fa qualques meses Los Amics de Jornalet aviam escrit a totas las collectivitats territorialas d'Occitània, valent a dire a cada president dels Conselh Generals e dels Conselhs Regionals del país per demandar una petita ajuda per la premsa nòstra, per Jornalet. La mitat nos respondèron pas e per l'autra mitat s'escampèron de la question en tot pretextar que podián pas ajudar una associacion non domiciliada dins lor territòri. Una collectivitat nos respondèt ni de òc ni de non, mas nos mandèt per emplenar un dorsièr de 20 paginas qu'auriá descoratjat un expèrt-comptable. Çò que devem comprene amb aquestes comportaments es que las collectivitats territorialas occitanas de l'estat francés an pas volgut donar cap d'ajuda financièra a Jornalet.
 
Fin finala aquestes refuses se son mudats en bona capitada amb lo micromecenatge. Çò que los elegits an mespresat, lo Pòble Nòstre o a entendut totalament e a respondut. Aver viscut aquesta aventura m'a convençut que lo sistèma de collectatge de fons per micromecenatge es un acte revolucionari. Lo micromecenatge es la fiscalitat del combat. Es la fiscalitat de l'insomission. Es una fiscalitat justa ja qu'es pas obligatòria e que cadun dona coma o vòl.
 
Cada occitan ten lo dreit de demandar de comptes als poders publics e politics que distribuïsson las subvencions. Las subvencions sortisson dels nòstres impòstes, valent a dire de nòstre pòrtamoneda. Se los elegits comprenon pas la necessitat de finançar la lenga nòstra e son desvolopament, lo pòble que ten rason, se pòt substituir a la poténcia financièra publica amb una expansion dels micromecenatges dins totes los camps de la matèria occitana. Mas dins aqueste cas a qué nos servís de pagar tant de talhas?
 
L'estat francés occitanofòb e las siás sucursalas territorialas an ben comprés que la moneda es lo nèrvi de la guèrra e an mes en plaça un sistèma de subvencions de complasença. Avián pas previst que lo pòble se sap organizar. Lo micromecenatge reüssit de Jornalet es una victòria a l'encòp concreta pel jornal e simbolica per tota la resisténcia occitana.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Panamondin
2.

Lo micromecenatge es al finançoment ço que lo sufragi univesal es a la democracia.

  • 0
  • 0
Guilhèm Thomàs Tolosa
1.


Mandi una autra forma de micromecenatge que benlèu poiriá interessar lo jornalet :

https://www.patreon.com/

Es un sistèma diferent, ont cada creator pòt èsser sostengut per de "patrons". Cada patron qu'es interessat pòt sostener un creator en li balhant un soma cada mes. Los contenguts creats son alara mai o mens liures, depend alara dels privilèges balhats pels creators als patrons.

Ben, es benlèu mai complicat qu'aquò. Mas jèti la pèira.

  • 2
  • 0

Escriu un comentari sus aqueste article