Per Occitània i a la costuma de far de carn rostida, a l’ast o al forn. Se fan pas mai d’animals entièrs, levat lo cas d’una granda fèsta, mas s’i rostís de tròces de buòu o de vedèla, e tanben de pòrc. Son pas de plats jornalièrs, de segur, mas sòlon venir a taula per las fèstas e tanben qualque dimenge. Los rostits, a l’ast o al forn, daissan anar totjorn un pauc de suc, que, generalament, asagarà las pèças, mas tanben d’unes d’aquel suc ne  profièchan per far macarrons. Son de macarrons que s’aprèstan d’una manièra plan simpla: solament los cal bolhir, n’escampar l’aiga e i apondre lo suc de rostit. Mas son extraordinàriament gostoses, lo suc de rostit es un concentrat de carn fòrça intens e convertís los macarrons en un plat plan desirable. Quand i a pas de suc de rostit, d’unes o fan amb de bolhon del buòu a l’estofada, qu’es tanben un suc de primièra.

 
Macarrons amb suc
 
Ingredients (per 4 racions): 300 g de macarrons, suc de rostit (de vedèla, de buòu, de pòrc), pebre e sal.
 
Preparacion: d’en primièr emplenaretz d’aiga una ola e la daissarem sul fuòc. Salarem e, lo bolh pres, i apondrem los macarrons. En tornant levar lo bolh rebaissarem la flama e daissarem bolhir a fuòc doç. Qualques minutas aprèp los remenarem per que s’arrapen pas al cuol e, al cap de dotze o tretze minutas d’ebullicion, quand seràn cuèches, o tirarem del fuòc e n’escamparem l’aiga. I apondrem un veirat de suc de rostit (passat pel colador) e una esposcada de pebre e o tornarem menar al fuòc, puslèu doç. Remenarem un pauc, daissarem que se tòrne calfar tot, tirarem del fuòc e servirem. Cal  daissar que se refregisca un pauc abans de manjar.
 
Variantas: se i a pas de suc de rostit, i a la costuma de ne far amb de bolhon de buòu a l’estofada; servisson alavetz de garnidura o de segond plat, après lo buòu. En Peiregòrd d’unes fan còire un parelh de tomatas amb los macarrons e, en acabant, las chaplan dins lo mortièr e las apondon dins l’ola a l’encòp amb lo suc. Al País Niçard d’unes i apondon un sautat de tomata e de campairòls, tendres o eissuts.
 

Autras denominacions: 

Macarrons maquerrons macarrònis (italianisme)

Amb, emb, dab...

Suc chuc jus