La ratatolha es un plat de legums que se fa en País Niçard e es, de segur, un plat de prima-estiu, qu’es lo moment que se pòdon trobar los legums als òrts. Se prepara amb de tomatas, de cebas, de pebrons, de merinjanas e de cocordetas, valent a dire: amb tot çò que se pòt trobar al mercat en aquelas sasons, encara que, uèi lo jorn, òm tròba de tot pendent tota l’annada. Es un plat fòrça presat e i a tanben la costuma d'i apondre de polet, e amb aquò ven un plat fòrça mai consistent e gostós, un plat per se lecar los dets.
 
 
Polet amb ratatolha
 
Ingredients: 1 kg de polet, 2 cebas, 2 pebrons, 2 merinjanas, 1 cocordeta, 500 g de tomatas maduras, alh, pebre, òli e sal.
 
Preparacion: d’en primièr capolaretz lo polet e, en acabant, pelarem las cebas e las talharem dins la longor. En seguida, tirarem lo pecol de las merinjanas e dels pebrons e o atalhonarem tot. Puèi trencarem lo pecol del coget e lo coparem en rodèlas. Fin finala pelarem las tomatas e las capolarem, e pelarem tanben mièja dotzena d’alhs. Quand tot serà prèst getarem un bon rajòl d’òli dins una caçòla e la daissarem sul fuòc, pas gaire fòrt. Quand l’òli serà caud i metrem lo polet e lo saurengarem. Remenarem de còp en còp e, quand serà rossit de tot costat, lo tirarem del fuòc e lo daissarem de costat. I apondrem alavetz la ceba e los alhs e o saurengarem un pauc, a fuòc doç. Abans de prene color i apondrem los pebrons, las merinjanas e la cocordeta e farem coma abans. A mitat saurengar i apondrem las tomatas. Salarem e pebrarem, remenarem de quora en quora e, al cap d’una estona, quand mancarà un ¼ d’ora per traire del fuòc, i tornarem metre lo polet. Daissarem confir fin finala, tirarem del fuòc e servirem.
 
Variantas: i podèm apondre un ponhat d’olivas negras (decloscadas), de branquetas de jolverd chaplat o de brins de safran. O podèm perfumar amb d’èrbas nolentas (baselic, laurièr, ferigola, romanin).