Bandièra01 1180x150: Comuna de Tolosa

Opinion

Lo pastís de noses

Vicent Marqués · La bona taula

Vicent Marqués · La bona taula

Cosinièr e escrivan, presenta dins aquesta tribuna çò de melhor de la cosina populara occitana.

Mai d’informacions
Las noses son abondantas dins fòrça endreches del país e una brava partida de la produccion finís als molins, que ne fan un òli fòrça apreciat, mai fruchat que cap d’autre, indispensable dins qualques preparacions tradicionalas, o per aprestar las ensaladas. Es apreciat sustot dins las regions de Peiregòrd, Lemosin, Auvèrnhe e Roergue, ont i a los cultius mai grands, e aquelas regions an tanben la costuma de far un pastís qu’es un  plan bon bescuèch amb de noses. La preparacion es simpla e consistís a montar de glàrias en nèu e las barrejar amb lo sucre, la farina e las noses. En acabant s’enforna e se trai quand es conflat e s’es daurat un pauc per dessús. Es un pastís mofle e delicat, amb la sabor de las noses trencadas. Tanben ne fan en Valentinés.
 
 

Pastís de noses


Ingredients: 150 g de farina de pastissariá, 150 g de noses trencadas, 150 g de sucre, 5 uòus e burre.
 
Preparacion: d’en primièr montarem las glàrias en nèu e, en acabant, batrem los mujòls amb lo sucre fins que la barreja prenga una color blanquinèla. I apondrem alavetz las glàiras e o barrejarem sens prèissa. Puèi apondrem la farina pauc a cha pauc, o barrejarem e, fin finala, i apondrem las noses e o barrejarem tanben. Alavetz oncharem amb de burre (fondut) un mòtle redond de pastissariá (de l’òrle naut), i vojarem la pasta fins a mièja nautor e o enfornarem, a 200º. Al cap d’aperaquí trenta minutas, quand serà daurat un pauc per dessús, o trairem e o daissarem refregir.


Variantas: d’unes i apondon una envolopa de levam en pols. I podèm metre las noses trencadas o chapladas.
 
 
Variantas regionalas
 
— Auvèrnhe: lo podèm far amb d’amidon en luòga de farina. D’unes, un còp freg, o copan pel mièg (ne fan dos disques) e lo farcisson amb de confitura d’avajons. Lo podèm decorar per dessús amb mièjas nòses (qu’abans aurem passat per un siròp concentrat d’aiga e sucre).
 
— Lemosin: d’unes o fan amb d’amidon luòga de farina. I podèm apondre un bocin de burre. Un còp freg, lo podèm recobrir d’una sisa de chocolat (d’unes o garnisson per dessús amb de bessons de notz); d’autres lo decoran amb de crèma montada (e ensucrada).
 
— Peiregòrd: D’unes i apondon un rai d’òli de noses (o un bocin de burre), una culhierat de sucre vanilhat o un veiron d’aigardent. Un còp freg, lo podèm recobrir d’una sisa de chocolat (d’unes o garnisson per dessús amb de bessons de notz)
 
— Roergue: i podèm apondre un culhierat de mèl o un bocin de burre. Lo podèm far amb d’amidon en luòga de farina.
 
— Valentinés: i podèm apondre un bocin de burre o un veiron de ròm. Podèm canviar lo sucre contra de mèl.
 
 
Autras denominacions: tartra de noses (Lemosin, Auvèrnhe). Pastís de noses es una denominacion correnta en Peiregòrd i Valentinés.




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Vicent Marqués
2.

#1 Mercés plan per la informacion!

  • 1
  • 0
Quentin Caors
1.

Manca Carcin dins la lista, ne fasèm tanben entre Peirigòrd e Roergue ^^

  • 1
  • 0

Escriu un comentari sus aqueste article