Bandièra01 1180x150: Comuna de Tolosa

Opinion

Los macarrons coma boletas

Vicent Marqués · La bona taula

Vicent Marqués · La bona taula

Cosinièr e escrivan, presenta dins aquesta tribuna çò de melhor de la cosina populara occitana.

Mai d’informacions
Pendent son expansion del nòrd d’Itàlia estant, fa qualques sègles d’aquò, los macarrons passèron pel País Niçard e per Provença e, pauc a cha pauc, conquistèron las taulas de la gent mai golarda e s’espandiguèron encara al delà, fins qu’arribèsson en Peiregòrd per i demorar. Aquela sòrta de pasta es coneguda en tota l’Occitània occidentala, segur, mas dins la cosina de l’ostal s’emplega rarament, e solament coma pasta de sopa. A l’ora d’ara, coma podiá pas èsser d’una autra manièra, s'aprèstan de sietadas de macarrons per totes los cantons d’Occitània, mas son pas de plats tradicionals, son los meteisses que se pòdon trobar de pertot, d’ascendéncia presomptivament italiana. En Peiregòrd los fan amb de boletas de carn, que devon bolhir amb de bolhon de carn, lo meteis bolhon qu’i bolhiràn après los macarrons. Es un plat plan gostós.
 
 
Macarrons coma boletas
 
Ingredients: 300 g de macarrons, 300 g de carn de vedèla (capolada), 300 g de magre de pòrc (tanben capolat), 2 uòus, 2 carròtas, 2 cebas, 1 tomata madura, alhs, jolverd, ¾ de l de bolhon (de carn, de pol, de galina) e sal.
 
Preparacion: d’en primièr pelarem e chaplarem un parelh d’alhs e, en acabant, chaplarem  qualque rameta de jolverd. Puèi après, botarem la carn capolada dins una escudèla, i apondrem los uòus, los alhs e lo jolverd, o salarem, o barrejarem amb las mans, ne farem de boletas de la pagèla d’una notz e las daissarem dins una sièta. Pelarem après las cebas (i farem dos talhs en crotz), las carròtas e la tomata e o botarem tot dins una ola. I apondrem lo bolhon (que benlèu aurà ja de sal) e o daissarem sul fuòc. Lo bolh pres, i botarem las boletas e, en tornar levar lo bolh, rebaissarem la flama e o daissarem bolhir a fuòc doç, amb l’ola cobèrta. Mentretant, emplirem amb fòrça aiga una autra ola e la daissarem sul fuòc. O salarem e, lo bolh pres, i botarem los macarrons. Quand tornarà levar lo bolh, rebaissarem la flama e o daissarem bolhir a fuòc doç. Al cap de set o uèch minutas d’ebullicion, quand los macarrons seràn cuèches o gaireben (segon la qualitat de la pasta, lo procès pòt èsser mai long o mai cort), los tirarem del fuòc e los colarem. Quand farà mièja ora que bolhiràn las boletas, las tirarem del fuòc e las metrem dins un plat. Ne tirarem tanben los legums (que getarem) e tornarem menar l’ola sul fuòc, solament amb lo bolhon qu’i serà demorat. Lo bolh pres, i metrem los macarrons e, quand tornarà levar lo bolh, rebaissarem la flama e o daissaram bolhir a fuòc doç. Al cap de cinc minutas, quand los macarrons seràn cuèches e demorarà pauc de bolhon, o tirarem del fuòc e o servirem. Metrem fin finala las boletas pel dessús e o servirem.
 
Variantas: las boletas pòdon portar qualque raspadura de muscada; d’unes las fregisson amb de grais d’auca, abans de las bolhir.
 
 


abonar los amics de Jornalet
ma

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan-Pèire Soulié
2.

S’amaga un messatge politic d’actualitat darrièr « los macarrons coma boletas » ? :)

  • 0
  • 0
Ge Cairon Florentin d\'Albigés
1.

"Macarrons coma boletas"? d'ont sortis aquel "coma"?

  • 0
  • 0

Escriu un comentari sus aqueste article