Bandièra01 1180x150: Comuna de Tolosa

Opinion

Caminada e retirada

Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions
Aqueste dijòus, farem un còp de mai lo torn dels baloards de Carcassona per protestar contra lo projècte d’organizacion prevista de las dintradas en retirada. Coma plan sovent, probable que nos i traparem los costumièrs abonats dels passa-carrièras, valent-a-dire dempuèi quauquas annadas las personas ja retiradas – e quand ères mèstre d’escòla, i aviás dreit aprèp 37 ans e mièg de servici: çò que te fasiá retirar sul còp dels 55 ans! Coma avèm pas res a faire e que i a pas la jornada de paga de pèrdre, podèm plan passar un momenton a nos passejar e a nos rebrembar qui sap d’unas manifestacions de 1968, de las manifestacions viticòlas de las annadas 70, de quauque temps de cauma contra Juppé o Sarkozy,… Esperarem que los obrièrs de las entrepresas qu’an barrat, los emplegats en tele-trabalh, enfins, las expressions actualas de la classa obrièra siaguen per carrièras (e que d’unes se sovenguen pas pus que dins un gèste pèc, votèron pel Recampament nacional lo còp passat, e aquò cal francamentaver lo front —e res darrèr lo front—perba faire).
 
L’accion collectiva se satelliza en comportaments individuals e, benlèu, enquatre fotografias suls rasals socials en plaça de la fraternitat del desfilat ont as tot lo temps – en mai de cridar quauque eslogan, mas a nòstre atge, se cal pas tròp forçar la votz – de parlar de la doberturade la pèsca, de la caça del singlar o de la partidas de rugbi passadas e a venir… Lentament e irremediablament, las paraulas de L’Internacionalas’escafan de nòstras mementas e cadun de presicar per sa parròquia.
 
Del sistèma per la retirada, ne vos dirai pas grand causa, levat qu’es evident que cal èsser contra. Pòdon sortir totas las chifras que vòlon e totas las corbas d’evolucion possiblas e in-imaginablas, nos daissarem pas prene a aquela podra de perlinpimpim.La retirada a 65 ans per totes èra una avançada, cap un jorn la retirada a 60 ans, mas fan tornar partir los relòtges dins l’autre sens. Coma i a de caumatge, doncas demensen mens de trabalh, es en tota logica que se demanda a los que trabalhan de ne faire mai e atal aumentar lo nombre de caumaires. Encara que de plaças, te ne vos trapan en considerant coma vièlh un obrièr o un emplegat que va sus sos 50 ans. Un còp a la pòrta, lopauròt o lapauròta poirà correr darrèr sas annadas d’escotisson per partir a l’atge convenent. Probable que compten crear d’emplecs per aqueles retirats novèls de clavar dins d’EHPADS o de residéncia-seniors en fasent plan atencion de los metre dins un aquarium e sustot fòra de la vida vidanta e de la vida sociala. Cadun a sa plaça e lo capitalisme poirà contunhar de virar!
 
Per çò qu’es de virar, aqueste dijòus de vèspre segur que lo farem lo torn dels baloards de Carcassona. Ara, per saupre, se lo temps de la luta finala ven d’espelir, es plan un autre afar que per ne saber lo perqué e lo cossí, e ben!, cal pas èsser… bornat!
 
 
 
 
Retirat Roch
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article