CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Dimars, 22 d'octòbre

Alem Surre-Garcia

Dissabte, 27.12.2014 03h00

Nadalet renovelat


Comentaris 2 comentaris    
Dolent Fluix Bo Molt bo Fabulós (4 vòtes)
carregant En cargament


Detz ans fa qu’avem, amb J.M. Hernandez, contaire e meteire en scèna, lançat dins l’encastre de la Comunautat de comunas de la val d’Agot e del país de Lautrec (Albigés) , una experiéncia culturala qu’aviám pas pensat durèsse fins a uèi. En 2014, avem propausat a la populacion de realizar un Nadalet, una mena de pastorala a la provençala o a la gascona. La tradicion albigesa e lauraguesa amb sa fabricacion especifica de santirolets (los santons) s’èra perduda, alevat aquela dels cants de Nadal represes cada an per las coralas.
 
L’esquèma teatral cambia pas e mai l’aguèssem pron laicizat de tal biais que l’accion se passa totjorn   abans la naissença del pichon: al delai del pech, dins un vilatge nomenat Betelem, un nenet prodigiós es a nàisser dins una grèpia, entre un biau e un ase. O vos cal tot daissar, sègre l’estela e portar al pichon qualques presents originals o precioses.
 
Quatre annadas de longa, escriguèri la peçòta davant de trapar la relèva demest los participaires. L’escomesa es estada bèla:
 

— adaptar los ròtles e los dialògs a l’atge e a la personalitat de cadun: de dètz a otanta ans! Ongan èran una vintenada  e las demandas de participacion benevòla se multiplican!
 
— reprene los personatges tradicionals  (l’ase, lo biau, los Rèis, lo ravi…) e n’inventar d’autres en relacion amb las preocupacions del monde contemporan (ecologicas notadament)
 
— prene en compte l’actualitat locala, aquela de la Comunautat de comunas, la nacionala o l’internacionala quora de necite
 
— far comprene l’interés de la lenga e de la cultura occitanas  e restablir una cèrta dignitat e fiertat.
 
Per çò de la mesa en scèna, l’escomesa de J.M. Hernandez, aquò’s de menar los participaires (que son pas d’actors professionals) al respièch minimal de las exigéncias scenicas. L’espectacle sens èstre professional, dèu pas èsser de patronatge. Cal trapar l’equilibri.
 
La resulta es pron susprenenta. Venem de festejar lo desen anniversari de Nadalet dins sièis comunas d’Albigés e Nadalet s’es acabat a Sant Pau davant una sala comola.
 
Aquí çò capitat fins ara:
 
— apropriacion intercomunala e intergeneracionala
 
— ligam social enfortit, reconegut fin finala pels elegits. I participan tant los enrasigats coma los novèls venguts d’onte vengan, del nòrd de França, de Magreb o d’endacòm mai. Un biais concret de practicar la convivéncia. La preséncia del Secors Popular assegura cada serada la transmission de joguina als pichons  de las familhas necessitosas
 
— ligason entre çò local e çò universal, entre çò tradicional  (pastorala) e çò modèrne: sem pas mai al sègle XIX!
 
— valorizacion de la lenga occitana, acceptada per totes e dau mai emplegada. Amb l’ajuda de la Calandreta de la Vaur.
 
Esperam qu’aquela experiéncia de democracia culturala e linguistica s’espandiga e rescontre las autras experiéncias occitanas novelairas coma aquela pastorala dels Mainats del costat de Morlans. Bon vin caud, bon Nadal e bona annada plan granada!
 
 
 
 
 
_____
*un polit libreton es estat editat per lo desen annversari de Nadalet 



publicitat
BANER1-2-3: DGPL DICTADES



Comentaris

28 de decembre 10.49h

Osca per tot aquò!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

27 de decembre 12.41h

Un brave trabalh d'òbras e de fe. De multiplicar. Cal daissar la paraula al pòble . Ont se pòt trapar aquel libreton ?


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Alem Surre-Garcia

Alem Surre-Garcia logo rss

Cargat de lenga e cultura occitanas alprèp del Conselh Regional Miègjorn-Pirenèus de 1989 a 2006. Traductor, escrivan, poèta, assagista, autor dramatic, conferencièr o organisaire d'esveniments culturals.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions