CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dimenge, 17 de novembre

Alem Surre-Garcia

Dissabte, 15.9.2012 03h00

Mureth 2013, quin messatge?


Comentaris 6 comentaris    
Dolent Fluix Bo Molt bo Fabulós (5 vòtes)
carregant En cargament


Commemorar amb pron de tissa doas desfachas, la de Mureth coma la de Montsegur, pausa problèma. Ja un article titolat  Des vaincus qui honorent leur défaite a prepaus de Mureth, paregut dins lo jornal Le Temps en 1913,  se n’èra un pauc trufat . Seriám dins una cultura sentimentalista, victimista, vèire miserabilista? Quina es la part del masoquisme dins l’afar  que nos seriá estat transmés per d’unes istorians miègjornals del sègle XIX, sempre lèstes a plorar lo martiri e la pèrdia de la  Patria romana? Una patria que se seriá sacrificada per d’interesses superiors, l’aveniment de França e los dreches de l’Umanitat, en aver assajat, , de defendre, nosaus primièrs, la libertat d’èime e de pensada. Pensariám atal far nàisser en nòstra favor la compassion universala dins un mond clafit de violéncias? Nos cal tirar al pus lèu d’aquela androna. Nos tirar d’una pensada binària, per melhor capir la mecanica universala de la dominacion/sotmession.
 
La civilizacion occitana d’aquel temps, coma tota autra civilizacion a quina epòca que siá, manca pas de contradiccions. Nos podem pas embarrar dins  una idealizacion que nos menariá a pensar que representam absoludament lo bon drech e la legitimitat, e que sem nosaus lo chuc e lo muc de l’Umanitat. Aquò’s lo domèni de l’ideologia francò-francesa. Basta de vèser cossí l’istoriografia francesa escafa sas contradiccions (masèl de 14-18, Indochina, Madagascar, Argeria…) per defugir tota responsabilitat seuna. Sempre se presenta coma la nacion del bon drech fàcia la barbaria dels autres.
 
Mureth 2013, quin messatge? Una cèrta irredusibilitat istorica que menariá de la formacion d’un Estat transpirenenc a l’Euròregion actuala? Segur que la civilizacion occitanò-catalana s’es pas arrestada a la batalha de Mureth: l’istòria de la literatura e de las arts (l’arquitectura notadament) nos pròba alencòp una contunhetat e una capacitat de transformacion.
 
Lo messatge seriá d’afortir la pluralitat linguistica, culturala e societala dins l’Union europèa?
 
E doncas contribuir a l’escritura d’una istòria europèa descomplexada rapòrt a las frontièras, mai en fàsi amb las societats, las lengas e las culturas?
 
Mureth 2012: Las inscripcions en occitan sus la lausa e l’obelisc i son illegiblasn, e per anar las vèser, aquò’s mai que peligrós: cal afrontar un giratòri, un vira-l’ase coma dison d’unes, una isla, un “isolat”. Tot un simbòl! Tot en demorar dins l’encastre d’aquel temps, per de qué pas puslèu commemorar la reconquista de Tolosa per los comtes Ramon VI e Ramon VII (venguts de Catalonha per lo Pòrt de Salau) e la mòrt de Simon de Montfort en 1218. Se probariá atal la capacitat occitana de se reprene.
 
Mas çò melhor, coma es estat fach amb lo festejar de las libertats comunalas de Tolosa, la révolution de janvier 1189 coma la nomenèt Pierre Gérard, que demòstra una capacitat d’invencion societala, seriá, çò me sembla, de festejar las lias e patzerias, aqueles tractats pirenencs que son a la basa de la bastison europèa: escafada de las frontièras estatalas, democracia de basa, liura circulacion dels òmes e de las merças, afrairament e patz…
 
Mureth 2013: avem d’aclarir lo messatge.



publicitat
BANER1-2-3: DGPL AN LAFONT



Comentaris

16 de setembre 23.26h

Mercés e òsca sénher Surre Garcia per la vòstra analisa, avèm pas mai lo dret de nos enganar per lo futur de nòstre pòble, prepausi dempuèi plan de temps de far de la data de la mort de Simon de Montfort tuat per d'occitanas un 25 de junh, la nòstra fèsta nacionala en començar la velha amb los fuòcs de Sant Joan !
Es ora de nos organizar, i a ja una debuta d'ensaj sus:
http://fpl.forumactif.com/t5927-per-una-festa-nacionala-occitana#43617


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

16 de setembre 21.41h

Que soi content de legir aqueste article ! Mercés sénher Surre-Garcia, qu'aviai l'impression que la vila d'Epinal e sos imatges èran situits al còr d'Occitània ! Avèm pas besonh d'idealisar o de victimisar nòstra istòria per que sia extraordinària e a l'encòp dramatica...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 de setembre 22.57h

Occitània, país dau pacte occitano-catalano-aragonés ?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

15 de setembre 22.54h

Gasconha, region occitana !


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

15 de setembre 21.34h

MURÈTH, vila gascona!


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

15 de setembre 11.26h

Non cal pas festejar Mureth, ni Montsegur, que niflan l'ataüc, , mas la DEBUTA del pacte d'allegéncia occitano-catalano-aragonés.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Alem Surre-Garcia

Alem Surre-Garcia logo rss

Cargat de lenga e cultura occitanas alprèp del Conselh Regional Miègjorn-Pirenèus de 1989 a 2006. Traductor, escrivan, poèta, assagista, autor dramatic, conferencièr o organisaire d'esveniments culturals.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions