Adishatz,
 
Prumèr, deishatz-me me presentar:  M’apèri Amelia, èi 18 ans e soi auèi ua escolana de l’escòla Boulle a París. Quan èri au collègi de Samatan puish au licèu de l’Isla de Baish, èi avut la chança d’estudiar, en LV3, una beròia lenga deu pòble que partatja valors deu còr e qui resona encara dins l’esperit d’aqueras que saben la comprénguer. Aquera lenga, qu’es l’occitan.
 
Si divèvi objectivament tornar sus çò qu’aquesta matièra m’a portat, dirèi espontaneament la confiança en se-medish. En efèit, los mons diferents professors d’opcions m’an ajudat a gausar prénguer la paraula e exprimar las mias idèas, capacitats que me son essencialas dins los mons estudis e tanben dins la vida vidanta e qu’èi pas que plan pauc desvolopat dins las autas matièras mès generalas.
 
Apuish, dirèi que dins aqueste periòde de cambiaments e de quista de repèris qu’es l’adolescéncia, l’occitan a en partida contribuat a me hargar la mia identitat que rend fièra de la mia region, apèi la mia pròpria personalitat gràcias a las valors e aus ideaus que carreja.
 
Puish, desbrumbarèi pas de soslinhar los nombroses ligams qu’èi podut crear gràcias a aquera matièra: los mons camaradas de classas, las gents deu mon vilatge pendent hèstas gasconas, los pichons au carnaval occitan mès tanben d’escolans d’autes païses qu’eres tanben cresen en l’importància d’aquesta lenga.
 
Enfin, acabarèi en precisar que los mons corses d’opcions e los mons professors son estats longtemps  l’unica rason que m’a butat a contunhar d’anar en cors pendent près de dus ans. Aquestas quauquas oras per setmana son estadas las mès bèras de las mias annadas liceanas e sens eras aurèi tot simplament tot deishat càiger. Au jorn d’auèi, gràcias a eras èi avut lo bac dambe mencion e m’i soi escaijuda a dintrar dins l’escòla deus mons sauneis.
 
Son pas sonque frasas que sortishen de las nòstas bocas, es ua declaracion d’adesion a la nòsta region e au nòste país, es tota la fiertat d’estar çò qu’èm  e çò que seram que clamam dins la lenga deus trobadors que cantavan autescòps l’amor. 
 
Èm monde passionats per la nòsta lenga e la nòsta lenga es ua lenga passionada: Nos batem per amor entà la nòsta cultura e entà la sua difusion au collègi e au licèu.
 
 
 
 
Amelia