Bandièra01 1180x150: Comuna de Tolosa

Opinion

L’occitan, deman...

Pòt arribar que d’occitans viran dempuèi d’annadas en redond suls vira-colhons. Me dirètz, son pas los solets! Temps es vengut de dobrir de camins, rotas e autòrotas novèlas per assegurar un avenidor cultural e linguistic a Occitània. Per aquò far, vaquí lo plan que foguèt decidit e votat per las pus nautas autoritats de nòstre país e que dintrarà en aplicacion tre lo 1r de genièr de 2021 à mièja-nuèch e que s’acabarà... a la mascolhonat quand t’ai vist...
 
Art 1: Serà procedit a una analisi menimosa del biais de parlar dels òmes e de las femnas d’Occitània granda. Occitanas e Occitans se veiràn pausar una nièra (una puça) jos la pèl, al nivèl de la garganta. Aital, se sauprà qual emplega vertadièrament la lenga dins la vida vidanta. Los que parlaràn occitan de longa reçaupràn una indemnitat de 135 euros, cada jorn. E benlèu qu’en Occitània, dins quauquas annadas, aurem soncament de miliardaris mercé a la lenga d’òc! L’òm pòt totjorn somiar!
 
Art 2: Al nivèl politic, serà als territòris de prene lors afars en carga. Se passarà de la democracia “passida” a la democracia “viva”. Una consulta numerica serà organizada cada còp que nescite. Ges de demanda serà escafada. Caduna e cadun, amb l’ajuda de son telefonilhet, esmartfòn o tauleta, deurà votar. Serà obligatòri. La minoritat silenciosa a viscut. Lo que votarà pas, pagarà una esmenda de 135 euròs.
 
Art.3: Dins totas las escòlas, collègis, licèus, universitats,... totes los corses se debanaràn en occitan e en francés a paritat orària. Las escòlas bilingüas e las calandretas seràn generalizadas e lors ensenhaires pagats lo doble. Totes los tèrmes angleses seràn fòrabandits e remplaçats per de mots occitans e franceses. Los oras balhadas actualament per ensenhar l’occitan o seràn deman per l’anglès.
 
Art 4: Per butar mai en abans l’economia, totes los produches sortits d’Occitània deuràn èsser tilhetats (etiquetats) en lenga occitana e costaràn 20% de mai. Los restaurants deuràn aprestar de pitança tirada de l’environ amb l’eslogan “Manjatz coma cal, Manjatz local!». Los menuts seràn escriches en lenga d’òc. Aital: “Belles de Fontenay, aromatisées au vinaigre basmati et huile d’olive vierge romarin et ail.” devendrà “Trufas en ensalada.”
 
Art 5: Per desenvolopar la cultura, un plan massiu de creacion s’èra botat sus pè acompanhat d’un budget del doble d’aquel de l’armada americana. Cada setmana una pèça de teatre o un film serà a l’aficha. Per èsser prodelats, cantairas e cantaires deuràn prepausar al mens 50% de lors cançons en lenga occitana, Cabrèl comprés. Al fenestron, la sèria Un plus grand soleil devendrà Un, dos, tres solelh,... e Plus belle la vie,Puta de vida! De mòstras gigantas, sus maites sicuts occitans, seràn alestidas dins totes los musèus d’Euròpa.
 
Art 6: Cada setmana, sus totes los luòcs de trabalh, se debanarà una fèsta de convivéncia, prètz e paratge (un CPP). Cada mes, una fèsta CPP seràn organizada dins totes los vilatges e las vilas d’Occitània. Los que, per malastre, vendrián pas a la vòta deurián pagar sul pic una esmenda de 135 euròs. Una ajuda financièra serà prevista pels psiquiatres e psicològs que podrián èsser pertocats pel caumatge.
 
Art 7: [Aquel article( o d’autres) vos es reservat. Enriquesirà aquel plan. A vos de l’escriure e de lo mandar al Jornalet que se farà un plaser de lo publicar. Es aquò tanben la participacion!]



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

cissonet occitània
2.

Per far d'umor sul devenir d'Occitània e de sa lenga aimi ben aquela :

"Lo nòstre passat es tarrible. Lo nòstre present es catastrofic. Urosament qu'avem pas d'avenidor !"

Bona annada :) !

  • 1
  • 0
Franc Bardòu
1.

Lo dictator que me voldrà ficar una piuça informatica jos la pèl a interès de m'adormir a distància per i pervenir. E la m'arracanrai al cotèl se o cal, per me deliurar d'una insanitat insofribla. E mai foguèsse per m'escotar parlar occitan ! E amb lor telefon mobil, me pòdon esperar milanta ans : non teni pas una permanéncia telefonica…

Aquò dit, 135€ cada jorn qu'emplegui d'occitan : despuèi trenta, seriái ric…

Podèm remembrar a l'umorista tuopista çai-sus que, "la minoritat silenciosa", a las darrièras eleccions presidencialas, non èra luènh d'èsser la majoritat silenciiosa. E personalament, degun non me forçarà a causir entre la rèba e lo colerà…

  • 5
  • 3

Escriu un comentari sus aqueste article