Bandièra01 1180x150: Comuna de Tolosa

Opinion

Lo rescaufament de la planeta

Agost de 2021: 50°C dins las carrièras.Quina calorassa!
 
Ieu, dins l’apartament climatizat 20°C. Al burèu climatizat 20°C. Dins la veitura climatizada 20°C. Mas per passar de l’apartament climatizat 20°C a la veitura climatizada 20°C traversi la carrièra 50°C. Per passar de 20°C a 50°C e de 50°C a 20°C. Quina susada! Quina susada!
 
I a preissa d’aver una clim personalizada! Amb una camiseta climatizada, de bralhas e de bralhetas climatizadas, de calcetas e de calçuras climatizadas. Per arribar a 20°C! Sens oblidava lo ventilator de nas e de boca acrocat a las aurelhas! Que seriái polit l’estiu en plena canha a me passejar per carrièra amb mon ventilator de cara! Aquò me fariá ni freg, ni caud!
 
En plena canha anèri veire mon amic lo pastre a l’estiva. El, susava pas! Espandit a l’ombra fasiá la dormida, climatizat per son parapluèja de pastre. E totas sas fedas chorravan a l’ombra. Los chins tiravan una lenga, una lenga coma de buòus… Es temps de climatizar los chins, las fedas, los buòus, los aucèls, ….
 
Sul camin del retorn, seguiguèri una rota bordada de fraisses, de las fuèlhas passidas,… Eles, tanben, paures fraisses, robes, euses, faus, castanhièrs,… quora veson passar totas aquelas veituras climatizadas devon se dire, devon se dire: “Perqué nosautres sèm pas climatizats?” Mas aquò fa ni freg, ni caud a degús!
 
Pareis que la mar de glaça recula. Que la mar recula aquò o compreni! Es pas “vague” dins ma tèsta! Mas que la glaça recula! Aquela empega! Francament, avètz vist, vos, de glaça recular. De veituras recular sus la glaça n’ai vist! De lisaires – des patineurs - sus la glaça, recular, n’ai vist! Mas de glaça recular, jamai!
 
O puslèu si, quora botas los glacets dins l’aiga del pastís. La glaça recula, fond! E puèi, es pas lo glacet qu’avança o que recula, es ieu! E per empachar la glaça de fondre, cal la congèlclimatizacion. Per empachar la banquisa de fondre, es temps de congèlclimatizar l’Artic e l’Antartic e a i èsser la mar de glaça! Aquò fariá pas caud mas freg!
 
Soi segur que Daikin, Samsung, Hitachi, Mitsubishi e n’oblide... i an pensat! Lo rescaufament: un mercat avenidor!
 
Un mercat avenidor quora caldrà climatizar tota la planeta Tèrra! Aquí òi!



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pierre lachaud
1.

Si aves copneigut una températura de 50°C dins la partida d'Occitania ente demoras, me, que sei dins lo Limosin, ai coneigut de las températuras pus freschas. En aust 2021 la temperturas son damoradas en dejos de 30°C e ai memse notat qu'aust 2021 era un dos mes lo mens chau dempuei quauques annadas.

  • 1
  • 0

Escriu un comentari sus aqueste article