En 2022 se passarà talamai d’eveniments que podèm pas dins l’encastre d’aquel article los nomenar totes. Es doncas una causida plan personala que vos prepausam.
 
Tre lo 1r de genièr França prenguèt la Presidéncia de l’Union Europenca. Serà aremplaçada lo 1r de julhet per Chequia.
 
Se festejarà los 400 ans de la naissença de Molièra, nascut lo 15 de genièr a París. Espepissaires, criticaires, analisaires de tota mena seràn de sortida per crubelar l’òbra del mèstre grand. Libres e espectacles vendràn paisselar aquel anniversari. Segur, se festejarà lo sejorn de Molièra en Occitània.
 
Del 4 al 20 de febrièr se debanaràn los 24en Jòcs Olimpics d’ivèrn en China. Seràn seguits pels Jòcs paralimpics del 4 al 13 de mars.
 
Per parlar masqueta, Venècia carnavalejarà del 19 de febrièr al 1r de mars. A Niça batèstaran flors del 11 al 27 de febrièr. E lo carnaval de Limós, un dels mai long o benlèu lo mai long, entrincarà lo 23 de genièr per plegar lo 3 d’abrial.
 
Lo torn primièr de l’eleccion presidenciala en França se tendrà lo 10 d’abril, lo torn segond lo 24 del meteis mes. Lo torn primièr de las eleccions legislativas francesas se debanaràn lo 12 de junh e lo torn segond lo 19 de junh. Aital aurem los 577 deputats novèls de l’Amassada Nacionala Francesa.
 
Lo 1r de julhet lo Torn de França bicicletarà de Copenaga al Dinamarca e desbicicletarà lo 24 de julhet suls Camps-Elisèus a París. Ganharà Occitània per: ..., Mende, Rodés, Carcassona, Foix, Sant Gaudens, Peyragudas, Lordas, Castèlnau-Magnoac, Caus, La Capèla-Marival, Rocamador,...
 
Los campionats del monde de natacion, qu’aguèron pas luòc en 2021, son previstes del 13 al 19 de mai a Fucuoca al Japon. Los XIIIen campionats del monde d’atletisme, desprogramats l’an passat, seràn aculhits per Eugene als Estats-Units del 15 al 24 de julhet.
 
Los 17 e 18 de setembre, las jornadas europencas del patrimòni faràn descobrir los joièls de França, d’Occitània e d’endacòm mai...
 
La IX ena copa del monde de rugbí feminin se tendrà en Nòva-Zelanda del 8 d’octòbre al 12 de novembre de 2022. Del 12 al 16 d’octòbre, sul velodròm de Sant Quentin-en-Ivelinas en França, se pedalarà pel campionat del monde de ciclisme sus pista.
 
Egipte aculhirà la CÒP 27 a Charm-el-Ckeikh del 2 al 18 de novembre. Qatar organizarà del 21 de novembre al 18 de decembre de 2022, la XXII ièma edicion de la copa del monde de buta-bala.
 
Podèm pas acabar sens nomenar lo bicentenari de la naissença de Loís Pastor nascut lo 27 de decembre de 1822. Escasença de festejar la recèrca scientifica e medicala. Faguèt espelir lo vaccin contra la ràbia e butèt mai en abans las règlas d’igièna basicas e de ten-te luènh.
 
Es que la marrana empacharà pas lo debanament de totes aqueles eveniments e de ben d’autres? Es que cargarà encara mai l’annada tota o la descargarà? Aquí la demanda. Ben aluserpit la o lo que uèi o podriá dire!