CAPCALERA: la botiga

Jornalet, gaseta occitana d'informacions

Dimenge, 16 de mai

André Clement

Dissabte, 17.4.2021 03h00

Despòcha ta lenga!


Comentaris 4 comentaris    
Dolent Fluix Bo Molt bo Fabulós (10 vòtes)
carregant En cargament





Lo mes passat n’aguèri un confle d’aver ma lenga dins la pòcha. Decidiguèri de la sortir e de m’encaminar far de crompas al Clapàs, a Montpelhièr.
 
Mancavi de calçuras. Endralhèri la botiga “Seram”, espinchèri menimosament las noveltats. Vaquí qu’una vendeira se sarrèt. La saludèri per un “Bonjorn!” Me respondèt sul pic: “Que dites- vous?” I tornèri: “Plan lo bonjorn!” M’agachèt e me faguèt: “Excusez-moi, je ne comprends pas l’anglais!” Botèri ma lenga dins ma pòcha, passèri al francés. Ela, moqueta, se desencusèt “Je ne suis pas d’ici, vous savez! Je viens de Bretagne.” Crompèri mas calçuras, mercejèri e perseguiguèri mon camin.
 
Deviái puèi anar crompar un parelh de bralhas en çò d’ «Escarrut». Aguèri pas rodat un briconet al entorn dels penjadors que ja un serveire se sarrèt. Sortiguèri tornamai ma lenga: “Plan lo bonjorn!” Me faguèt: “Bienvenue!” “Pòdi ensajar aquel parelh?” “No problem!” Un còp fòra de la cabina: “Me va plan. Lo preni!” “Parfait, monsieur!” Me sarrèri de la caissa. Ensaquèt la bralha dins la pocheta. Puèi: “Sans contact!” Ieu: “Òc!” El: “En vous remerciant!” Ieu: “Plan mercé a vos! Adieusssiatz!” El, tot content: “Merci plan! Bonne journée!”
 
Me cal passar, ma lenga totjorn sortida, a “l’Ostal de la premsa” per crompar lo jornal.
 
“—Bonjorn, avètz reçauput lo Charlie?” Lo tipe escarquilha los uèlhs. Es susprés mas se laissa pas anar. “Bonjour, il est pas arrivé uèi. Il arrivera benlèu demain!” A l’escotar parlar s’ausís qu’es Clapassièr. A pas degut espelir suls Camps Elisèus aquel d’aquí! “E lo Rit Encadenat, l’avètz?” “Oui, es aquí!” Sortiguèri 5 euròs. Me tornèt la moneda e me faguèt “Plan mercé!” “Plan mercé a vos! Bona jornada!” e dins un risolet, fieròt, me respondèt: “Bouno journado!”
 
Pòdi pas acabar mas crompas sens passar a la librariá Saupràn. Coma escampavi un uèlh a las darrièras sortidas occitanas del moment, vaquí que se sarrèt un vendeire. Coma ai totjorn la lenga sortida de la pòcha, li faguèri: “Bonjorn, avèz un molon de noveltats?” E el: “Bonjorn, avètz vist... avètz vist... un eveniment... de gramaticas novèlas.” “Las avètz legidas?” “ Non! Per tot dire fulhetadas!” “Vos pareisson bonas?” “Me semblan bonas mas sabètz soi pas un especialista de l’occitan estandart!” Lo mercejèri per sas esplicas. Coma soi fòl de gramaticas las crompèri totas doas. Davalèri pagar e gandiguèri l’ostal tot contenton d’aver despochat ma lenga.
 
E sul camin del retorn me diguèri que benlèu serà pus aisit deman pels joves, coma pels mens joves, de far societat en occitan a costat del francés, de l’inglés... se totas e totes an o avián la volontat e lo coratge de despochar lor lenga!
 
 
 
abonar los amics de Jornalet
 
 


 
 



publicitat
BANNER1: IEO 30 MARPOC



Comentaris

25 d'abril 17.05h

És ço que cal far.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

17 d'abril 14.23h

Òsca!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

17 d'abril 06.47h

En general, le monde d'òc se conoissen a l'accent, als occitanismes, que tènen a l'edat, l'endreith, le mitan social. Tot aquò es le mot de passa furtiu.
Quand se vei que la seria " un solelh tan bèll " escafa tota occitanitat del Clapàs, aquò tinda fals, e sente a la purificacion etnica.
E ont son les Clapassièrs? E de que dìsen?
Le monde de la comedia es enebit d'accent regional, au sabètz?


Valora aquest comentari:   votar positiu 10   votar negatiu 0
Respondre comentari replica Comentari inadequat   Formulari d'abús de comentari

17 d'abril 04.39h

Enòrme ! Sufís de pas grand causa fin finala, òsca !


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Las mai...


Mai d'articles

Archius




D'autres articles


Jornalet, gaseta occitana d'informacions