Bandièra01 1180x150: Comuna de Tolosa

Opinion

De Rocavion a Clarmont au Mondiau dau Japon

Un pessuc d’istòri... a la naissença dau tornei dei “Four Nations”, lo Board avié chausit leis espacis lenguistics per crear leis equipas: englés, galés, gaelic d’Escoça, gaelic d’Irlanda. D’aquèu temps, aquelei four nations eron dins un solet estat.
 
Ailàs, quora lo Board a convidat la França per lei “Five Nations”, a pas considerat que lei país de lenga d’Òc (ente lo rugbi èra fòrça mai espandit) si meritavon una equipa nacionala a l’egau d’Escòcia, Galas (Cymru), Irlanda. Venguet puei Itàlia per lei “Six Nations”.
 
Ansin en setèmbre, leis Occitans de Rocavion faràn lo tifo per l’Itàlia e aquelei de Clarmont per la França.
 
A Roma e a París avem de monde que fan lei fierts tre que leis equipas nacionalas fan de belugas. Bastava d’ausir lei jornalistas lo jorn de la victòri de França au mondiau de foot en 18.
 
Mai en 2019, au Japon, Italians e Francés si duvràn tenir chuto, estènt que sensa una intervencien chanuda de la “Boana Maire”, leis uns e leis autrei s’arrestaràn a la fin dei partidas de pola.
 
Dins la pola B, leis Italians jugaràn contra la Nòva Zelanda e Sudafrica, ren qu’aquò! Sabèm que li aurà que dos qualificats. Urosament ganharàn contra la modèsta Namibia per començar lo dimenche 22 de setembre, faràn pas fani.
 
Dins la pola C, lei Francés sauràn tre lo 21 contra leis Argentins se pòdon esperar jugar lei 1/4 de finala. Leis Inglés faràn promièrs de la pola, probable.
 
Si podèm demandar perqué siam renduts a faire tapissarié contra les anglosassons dei dos emisfèris.
 
En Itàlia, lo rugbi resta un “pichon” esport luenh darnier lo calcio. En mai d’aquò, lei melhors jugaires italians son estats sampalhats dins lei melhors clubs d’Euròpa, coma Parisse au Stade Français, Castrogiovanni au RC Tolon...
 
En França, lei melhors jugaires  mondiaus venon coma de moscas sus lo mèu per ramassar lei melhoras pagas dau monde e lei joines jugaires locaus lei regardon jugar assetats sus lei banquets deis estadis. Leis clubs amators de Fédérale 1 (tresena divisien), elei tanben crompon de Blacks, de Sudafs, d’Argentins, de Romanés, de Georgians... e d’Italians.
 
Convendrié de limitar lo nombre de forestiers per cada club, arranjarié tanben lei país d’origina dei dichs forestiers. Lei melhors Georgians juegon totei foara Georgia. Aquò bessai si farà avans lo Mondiau 2023.
 
Mai ara ne’n siam au Mondiau 2019; si faudrà levar d’ora per si tancar davant sa telé. Au Japon, emperi dau Solèu Levant, lo solèu a 7 oras d’avança e nautrei aurem bessai quauqueis assais de retard.
 
 
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Reinat LO VAU
1.

Ai legit que Parisse a signat a Tolon...

  • 2
  • 0

Escriu un comentari sus aqueste article