Centurions

Andrieu Abbe

< precedent | seguent >

Dimenge, 3.10.2021 03h00

Centurions

Pas cap de comentari

(2 vòtes)

En cargament

Régions et Peuples Solidaires

URL corta

Cu m’auriá dich qu’un jorn auriam una equipa de base-ball a Ròcabruna, nomenada “les Centurions”, referéncia a l’elita dei legiens romanas... E pasmens an juegat dimenge 25 davant ieu còntra z-Ais, sus l’estadi vesin de la sala comunala ente si votava. Lo “ieu” era justificat estent qu’eri lo solet espectator. “Juguem en Campionat Regionau m’expliquet en francés un deis entrenaires Centurions. Avem començat l’an passat e marcha pron ben. Siam 3ens darnier la reserva de Niça e lei Sestians. Mai la promiera de Niça juega dins lo campionat professionau e lo nivèu dau club es tròup aut per nautrei”. Si son bolegats lei Rocabrunencs, emb son “MMXI” escrich sus l’esquina, data de la naissença dei dichs Centurions. La referenci ai Romans es legitima; sus lo territòri de nòstra comuna que tòca Frejús avem trovat lei vestigis d’una villa romana. Lei reglas dau base-ball m’escapon e lo temps mi faiá fauta, sabi pas s’an ganhat contra lei Sestians, ai partit avans la fin.

Dau temps que ieu jugavi me lei cadets rocabrunencs, lo fotbal e lei bòchas eron lei doei solets espòrts dau vilatge. Vengueron puei lo rugbi e vint autreis espòrts. Leis activitats dau muscle si mondializon au païs, per aquelei dau cervèu es pas parier. Podrai escriure una autra cronica sus lo subjècte.

Eri vengut votar RePS, sensa vòlha e sensa enveja, en sachent qu’anaviam drech a la desfacha. M’eri permés d’escriure sus lo siti de la tela que per faire entre 0,5 e 2% si presentar era bessai pas una necessitat. Ma prediccien era optimista. A Ròcabruna RPS (Regiens e Pòbles Solidaris) faguet 0,46%, doei còups mièlhs qu’a Frejús (0,23) e uech qu’a Sant Rafèu (0,06). Lo “vòte utile” explica per una part lo naufragi... votar utile era bessai una solucien. Per tot Sud-Est parvenguet a 0,75% gràcias a Corsega ente François Alfonsi e RePS fagueron de belugas: Bastia, 1er emb 26,2%, Corte 2nd 19,41%, Ajaccio 3en 16,53%. Lei 26 centurions de la lista Région et Peuples Solidaires si pòdon consolar emb aquèla victòria insulària. Lei veterans que lei sostenián son despichats.