Bandièra01 1180x150: Comuna de Tolosa

Opinion

Barolo

Avans qu’anessi en Piemont emb lei responsables provençaus de la cooperacien agricòla, l’an passat, mi cresiáu que lo barolo era un cepatgi italian.. A fogut qu’arrivessiam dins la cooperativa de Barolo per que m’avisessi que m’eri enganat! Dins lo país d’Alba, província de Cuneo, “Terre del Barolo”, coope de quatre cents viticultors, fa lo vin d’apelacien Barolo emb lo cepage nebbiolo. Barbera e dolcetto son tanben de cepatgis cavilhats a Barolo... m’eri fach una mescladissa de tot aquò e pasmens lo vin m’interessa. Si pòu produire de barbera a Barolo mai pas de barolo a Barbera. M’avetz comprès?
 
M’enganavi dau meme biais emb lo Picpoul. L’i a vint ans d’aquò, mi pensavi que Picpol era un terraire dau Pic Sant Lop (Eraut), era la presenci de “pic” que m’aviá mau endralhat. Non, picpol es un cepatgi que fa un vin blanc gostós qu’acompanha ben leis ueitres, muscles, clauvissas.
 
Mai lei vins de cepatgis fan de l’avans, mai sarà malaisat per lei consomators de destriar cepatgis e terraires... aquò portarà prejudici ai productors “d’Apelaciens d’Origina Contraròtlada”. Un productor australian que fa 200 ectolitres de l’ectara de vin de merlot vò cabernet es avantatjat faci a-n un productor francés d’AOC qu’a pas lo drech de faire mai de 40 ectos de l’ectara.
 
Convendriá de permetre ai clients de reperar a la promiera ulhada lo nom d’un cepatgi sus una etiqueta. Lo mai aisat sariá de definir au nivèu mondiau una color, lo blu perqué non, per escriure, merlot, cabernet, gamay, tokay, barbera, vermentino... e de gardar lei colors tradicionalas per escriure lei noms de terraires. Un jorn vendrà bessai.
 
 
 




 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi! 31
1.

I a ambigüitat quand le vin es mònocepatge, tal coma en Austràlia o endacòm mai.
La mençon dels cepatges es obligatòria en UE, mas pas necitament sus l'etiqueta faciala.

  • 0
  • 0

Escriu un comentari sus aqueste article