CAPÇALERA: OPLO Licèu
CAPÇALERA2: Botiga

Jornalet, gaseta occitana d'informacions

Dissabte, 23 d'octòbre

Andriu de Gavaudan

Dissabte, 18.9.2021 03h00

A l’extrème Èst, i a quicòm de novèl…


Comentaris 5 comentaris    
Dolent Fluix Bo Molt bo Fabulós (2 vòtes)
carregant En cargament





Boys will be boys vòl dire, per los que parlan pas encara la lenga de Shakespeare, que los dròlles seràn totjorn de dròlles amb lors qualitats e lors defauts e qu’es aital!
 
Ne podèm dire autant dels Estatsunidencs: Los Estatsunidencs seràn totjorn d’Estatsunidencs! Los que, per diferentas rasons, s’interessan a n’aquel grand país o podèm verificar cada jorn.
 
La nacion mai poderosa del planeta, encara per un brieu, velha, mai que tot, a sos interèsses e als interèsses de sos ciutadans.
 
Per malastre, los païses que forman l’Union Europèa ne son pas encara convencuts, persuadits que son qu’aqueste grand fraire que los protegís desempuèi tant de temps —al mens desempuèi la fin de la segonda Guerre mondiala— daissarà pas l’ostal comun per anar veire enlòc mai se l’èrba seriá pas mai verda…
 
Sens parlar de Trump que pensava que los Estats Units despensavan trop de moneda en Euròpa per protegir quicòm mai que sos terrens de gòlf, lo president Obama aviá ja mostrat son interès pel continent asiatic a l’alba de venir la part mai importanta del planeta amb una China venguda l’avitalhaira indefugibla del “mond occidental”.
 
En daissant Afganistan en un cluc d’uèlh, Biden ven de n’acabar amb vint ans d’una guèrra que disiá pas son nom —es pas lo luòc aicí de ne jutjar!— e de far una causida sens téner compte dels aliats europèus al dintre de l’Otan.
 
En organizant, qualques jorns aprèps, AUKUS, una aliança amb lo Reialme Unit [K] e Austràlia [AU]— que ven de rompre l’acòrd de crompa de sosmarins a França per ne crompar als Estats Units— la mesa es dicha! Los Estats units [US] se viran cap a la part del planeta que lor sembla mai vital per lor economia e per lor seguretat.
 
L’Union europèa sembla tota suspresa de la “brutalitat” estatsunidenca; e, en mai d’aquò, la cancelièra alemanda pren sa retirada après sètze ans a la direccion dels afars alemands. Aquò tanpauc es pas una suspresa… mas l’Union es aital; gaireben desempuèi l’alargament a vint e sèt estats, es venguda la campiona de la procrastinacion en matèria de defensa almens!
 
Una politica de defensa es quicòm que còsta car e, levat França que se crei encara una poténcia granda, èsser protegit pel grand fraire estatsunidenc èra plan comòde. Los païses màgers de l’Union, fins ara, an pagat una contribucion fòrça modèsta a l’Otan e parlèm pas dels autres, los paÏses pichons… A calgut téner compte del pès de l’istòria de cada estat… Un país coma Alemanha sap çò que ne vira de la militarizacion d’un país e, après la guèrra, es damorada longtemps sens armada; quitament ara, sos sordats son engatjats pas qu’excepcionalement en defòra del país… per rasons evidentas.
 
Tant que l’Union europèra n’aurà pas un “numèro de telefòn” unic pels afars estrangièrs, per la defensa, etc. serà sonque un nan politic que pesarà de mens en mens dins l’acarament entre las nacions e entre las regions grandas del planeta.
 
Ne sèm a un moment clau amb d’òmes politics populistas e sens escrupuls: Putin, Xi Jinping o l’èx-president Trump que son de la meteissa traca e an discípols coma Bolsanaro en Brasil o Orban en Ongria, etc.
 
L’Euròpa de las nacions amb cadun sa politica cor a sa pèrda e se res càmbia pas, nòstres politicians poiràn lèu dire: “L’an passat, èrem al bòrd del precipici; ongan, avèm fach un grans saut en dabans!”
 
 

abonar los amics de Jornalet

 



 
 
 
 



publicitat
BANER2: OPLO liceu



Comentaris

21 de setembre 21.44h

#4 Las elèits e los dirigents franceses se vesan totjorn coma los mèstres del Mond ; aquel erguèlh desmesurat los buta a creire que los actuals e vertadièrs mèstres del Mond (los Estats Units e lor primièr cèucle) los consideraria coma d'egals. Es lor fantasme e s'i cròcan, en van.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

21 de setembre 12.29h

#3 Es susprenent de veire qu’après tant d’escarnis, un grand país coma França aja pas comprés..


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

19 de setembre 14.27h

I-a quicòm que los franceses an totjorn pas comprès e que las elèits francèsas que nos govèrnan fan mina de pas comprene : es la dispausicion estrategica del Mond estremada pels Estats Units en 3 cèucles.

Dins lo primièr cèucle i-a los païses amb quals òm es en plena fisança e amb quals i-a al nivel estrategic un escambi total d'informacions. Son los païses vertadièrament fraires que fan partida de la familha anglo-saxona, que comunian dins la mèsma lenga e tènan las mèsmas r... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

18 de setembre 15.39h

#1 Rockefeller e non pas *Rockfeller. En anglés se ne hètz pas soar la lettra qui avetz desbrombat lo monde ne comprenen pas de qué parlatz. Qu'argumenta dens lo sens de l'origina occitana deu patronim. Non pas har enténer la vocau atòna marcada "e" qu'es lo signe d'ua contaminacion peu francés.


Valora aquest comentari:   votar positiu 2   votar negatiu 3
Respondre comentari replica Comentari inadequat   Formulari d'abús de comentari

18 de setembre 06.49h

L'òm se trompa un brave pauç si l'òm pensa que lo monde es dirigeat per daus estats independents. Lo monde obeit a una alliança de las fortunas las pus grandas dau monde ente l'òm tròba daus Rotschild e daus Rockfellers. Es eus qu'an l'argent e que fan la pluja e lo brave temps. Tot lo monde, tots los estats, tota l'organisacion de l'ONU, tots los partits politics, ecologics, umanitaris, socialisme, comunisme, dreicha son una sucursala d'aqueus miliardairas mesme si prenam lo chamin de l... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Andriu de Gavaudan

Andriu de Gavaudan logo rss

Autor de la cronica occitana setmanièra al Petit Bleu de l’Agenais desempuèi 1978 e editorialista de La Setmana fins que quitèt de paréisser

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions