CAPCALERA: PAIS INVISIBLE
CAPÇALERA2: AMICS DE JORNALET

Jornalet, gaseta occitana d'informacions

Diluns, 6 de febrièr

Andriu de Gavaudan

Dissabte, 12.11.2022 03h00

Optimisme mesurat!


Comentaris Un comentari    
Dolent Fluix Bo Molt bo Fabulós (4 vòtes)
carregant En cargament


Las eleccions de la mi-mandat als Estats Units devián fornir la pròva evidenta que los democratas èran pas que d’usurpaires… e portar al la representacion federala una ondada sens precedent gràcias a la vision de l’èx líder “messianic”…




Coma a l’acostumada, soi plan embestiat per causir lo topic que tot jornalista deu trobar per atraire lo legeire e lo far rire, plorar e soscar a l’encòp. Me’n chauti, soi pas jornalista!
 
Empacha pas, sèm dins una passa informativa que me daissa perplèxe dins la mesura que, coma o dison los especialista, s’inscriu dins la durada.
 
Fasèm lo torn de la question… non pas lo torn que seriá un pauc longàs mas prenèm qualques exemples… las crapulas en primièr, perqué pas?
 
L’òme de Mòscou e sos sòmis d’un empèri rus novèl. Après qualques incursions dins d’ancianas republicas sovieticas que daissèron lo mond occidental sens reaccion levat qualques condemnacions verbalas e qualques fronziments de las ussas,  se pensèt que, fin finala, poiriá jogar mai gròs… e decidiguèt d’engolir Ucraïna mas s’èra trompat de chai! Los Ucraïnians mòstran un patriotisme que quitament nòstra societat occidentala globalizada i aviá pas pensat.
 
Per nòstre elèits, patria o nacion son pas que mots vuèges de sens; los utilizon dins los discorses oficials quand micros e camèras son presents per relevar la paraula a destinacion dels bedigasses que sèm… Las personalitats concernidas i creson pas mai desempuèi un brave brieu…
 
L’èx-òme de Washington, l’èx-numèro 45, ven en segond mas auriá pogut èsser lo primièr tanben. Es lo primièr president en foncion —non, lo segond…  que n’i aguèt un autre, pareis— qu’ensagèt de far un còp d’estat… a la chut-chut d’abòrd e ubèrtament quand demandèt a sos partisans d’anar al Capitòli… çò que faguèron . Pendent los quatre ans de son mandat mentiguèt o faguèt d’aproximations mai de 30 000 còps; a impausat un vocabulari que degun i èra pas acostumat, al mens dins una democracia vertadièra. Los mots fake-news o vertats alternativas an eissamat de’n pertot sens pagar de dreches d’autor !
 
Contunha sas atacas contra las institucions estatsunidencas e sos representants amb coma bona rason que foguèt la victima d’enganas orgnanizadas per sos adversaris politics.
 
A vampirizat lo partit republican e los quites tenòrs an esposat sas teorias del complòt permanent contra el, lo GOP —grand old party— e lo país.
 
Las eleccions de la mi-mandat als Estats Units devián fornir la pròva evidenta que los democratas èran pas que d’usurpaires… e portar al la representacion federala una ondada sens precedent gràcias a la vision de l’èx líder “messianic”…
 
Lo tsunami previst s’es redusit a una èrsa ridicula que poiriá veire los democratas en minoritat dins las assembladas mas an pas subit una desfacha e lo president en exercici se’n tira amb las onors…
 
L’òme de Beijing ven de se far sacrar emperaire de China e sas intencions serián a pauc près identicas a las del Moscovita: tornar fargar un empèri perdut en causa dels Occidentals angleses e franceses principalament a l’epòca de lors empèris respectius.
 
Dempuèi ans, mena una politica bellicista e agressiva mas l’aventura russa e subretot la reaccion dels Estatsunidencs lo poirián far moderar sas ambicions ubèrtament revindicadas.
 
Per el coma pel Moscovita, la pèrda de milierats de vidas umanas es pas un problèma mentre que pel “mond occidental” ne va autrament.
 
E nosautres? Euròpa trasteja e de mai en mai de democracias europèas coneisson la temptacion d’un regim “illiberal”, es a dire amb una fòrta tendéncia autoritària e un replegament sur de pretendudas valors nacionalas…
 
Polonha, Ongria e ara Itàlia…
 
França, en paraulas al mens, seguís una dralha , a mon avís, dangierosa. Los discorses de not’ bon président, los del ministre de l’Interior mas tanben los de qualques líders de la drecha extrèma a l’esquèrra de l’òme de l’eissarpa roja son pas per nos prometre un avenidor luminós…
 
La situacion economica, en seguida de la guèrra en Ucraïna, es pas bona e anam patir… Sola consolacion, sèm pas solets dins l’afar !
 
Alara, que far? Podèm totjorn profiechar de las petitas causas de la vida vidanta e somiar a un monde mai bon…
 
Acabarai en empruntar a una “pensada” legida sus Internet: ”Corrètz, corrètz aprèps vòstres sòmis… Se se realizan pas, auretz al mens gardat la linha!”
 
 
 
 
abonar los amics de Jornalet
 
 


 



publicitat
BANNER1 - OPLO erasmus



Comentaris

12 de novembre 10.46h

Plan bona cronica mas m'es encara avìs que l'òme de l'eissarpa roja es pas tan dangeiròs coma la drecha extrèma. Es pas qu'un sómi tan plan…


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OC Brigada

Perfil

Andriu de Gavaudan

Andriu de Gavaudan logo rss

Autor de la cronica occitana setmanièra al Petit Bleu de l’Agenais desempuèi 1978 e editorialista de La Setmana fins que quitèt de paréisser

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions