CAPCALERA: PAIS INVISIBLE
CAPÇALERA2: mot amagat

Jornalet, gaseta occitana d'informacions

Diluns, 6 de febrièr

Andriu de Gavaudan

Dissabte, 3.12.2022 03h00

Tristesa e vanitat del poder…


Comentaris Pas cap de comentari    
Dolent Fluix Bo Molt bo Fabulós (5 vòtes)
carregant En cargament


US Government




Me demandetz pas perqué mas en metent mon fondament sus la cadièra, aviái enveja de cantar: “Diluns de matin, l’emperaire, sa femna e lo princilhon son venguts a l’ostal per me tocar de mans, etc.”
 
E pensi pas aver legit res de res sus ges d’emperaire recentament levat, benlèu, sus l’emperaire de China que, doas setmanas a, reprenguèt lo primièr ministre de Canadà quand se crosèron per escasença dins lo bastiment ont se teniá de rescontres internacionals… me soveni pus çò qu’èra!
 
Aureolat de son sacre, el que, abans, semblava aver los pòts fendilhats que l’empachavan de sorrire, se daissèt anar, impromptu e a la vista de totòm, a cridar un cap d’Estat…
 
Enfin, vesètz coma los neurònes vos demandan pas totjorn vòstre avís e vos fan passar de buòus en vacas…
 
Tornat a l’ostal, a calgut que s’acarèsse a qualques problèmas domestics… coma la revòlta de milions de ciutadans que n’an lor confle d’èsser, desempuèi mai de tres ans presonièrs dins lor ostal, lor immòble, lor vila… La propaganda del Partit comunista chinés, malgrat la susvelhança permanenta e intrusiva, arriva pas a suprimir tota protestacion dins aquel paradís oriental… An quitament capitat de contornejar la censura en prenent una fuèlha blanca del format A4 coma signe de revòlta…
 
Idèa originala… Après tot, lo papièr foguèt inventat en China dos mila ans a…
 
Las autoritats iranianas assassinan la joinessa del país mentre que lo mèstre del Kremlin descoratja las analisis e que, ieu sabi pus, se cal considerar que se pren pel tsar reincaranat o per son conselhièr de l’ombra, Raspotin!
 
Sos sòmis sanguinaris li an pas levat lo somelh ça que la e sembla decidit a perseguir lo pantais d’una Russia somiada que los Soviets faguèron cabussar en 1991…
 
Es a dire qu’es la calma complèta de’n pertot?
 
Que non pas, not’ bon président s’es descargat sus sa primièra ministra dels pensaments exagonals per poder agir, çò pensa, sus prolèmas del planeta.
 
Après qualques ans, comença de comprene que l’engèni exagonal a besonh de l’ajuda dels autres per se poder espandir. Los Alemands son reguèrgues, los Italians, levat la pizza…, los Castelhans levat la paella pas de comptar! E los Angleses —mot abusiu per Britanics—, son… angleses…
 
Alara s’es virat cap als Estatsunidencs per ensajar de far avançar sas idèas. Es ben conegut que França es una poténcia granda nòstre president e un fum de Franceses o creson— e que son punt de vista deu èsser pres en consideracion. Lo president Biden l’escotèt civilament mas refusèt de cambiar de tòs a prepaus de sa politica “America first”.
 
Nos tornarà, nòstre president, e se declararà urós d’èsser estat escotat… A, la votz de França!
 
Vesètz, i a setmanas aital ont res es ni blanc ni negre mas tot es gris, quitament Ucraïna que son de mai en mai nombroses a voler que signe una alta-al-fuòc.
 
Lo patriotisme e l’abnegacion son valors essencialas en temps de patz unicament, ça dison!
 
 
 
 
abonar los amics de Jornalet
 
 


 



publicitat
BANNER1 - OPLO erasmus



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OC Brigada

Perfil

Andriu de Gavaudan

Andriu de Gavaudan logo rss

Autor de la cronica occitana setmanièra al Petit Bleu de l’Agenais desempuèi 1978 e editorialista de La Setmana fins que quitèt de paréisser

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions