CAPÇALERA: MARPOC
CAPÇALERA2: mot amagat

Jornalet, gaseta occitana d'informacions

Dissabte, 2 de julh

Andriu de Gavaudan

Dissabte, 21.5.2022 03h00

Los bastards en quista de puretat!


Comentaris 3 comentaris    
Dolent Fluix Bo Molt bo Fabulós (12 vòtes)
carregant En cargament





Dison que son los vièlhs que se passejan sus FB quand van sus la tela… An rason, ne’n soi! Ça que la, soi pas un productiu; legissi màgerment la “literatura” dels uns e dels autres e es pas triste. Per seguir la mòda, m’èri enregistrat sus doas o tres autras rets socialas; pensavi que los bresolhadisses de l’auselon m’agradarián mas coma compreniái pas briga coma foncionava, ai escampat l’auselon e doas o tres autras apps tant que i èri.
 
Soi abonat a quelques mèdia electronics, franceses e estrangièrs, per me téner al fial de çò que se passa mas, per trapar las novèlas occitanas, ai pas gaire que FB.
 
De novèlas occitanas, n’i a… Ai legit —mas sètz al corrent— qu’un centenat de candidats “regionalistas” se presentavan a las eleccions legislativas e me’n regaudissi. Nòstra lenga pòt e deu servir a tot e pertot. E pèrdi pas mai mon temps a explicar l’utilitat de far trabalhar la lenga per autra causa que los esclòps del rei Ceset o la gonèla de sa femna se n’a una.
 
Donc, un pauc pertot en país d’òc (Occitània lingüistica) son qualques valents a refusar los diktats dels partits que, a l’unanimitat, plaçan lors missi dominici per dire que poscan èsser elegits… Es al mens çò que pensan. L’òme de l’eissarpa roja o diguèt ans a: “Me pòdi presentar pertot dins l’exagòn; soi pertot en çò men e soi legitim!”
 
Quitament se un deputat a una vocacion exagonala, las gents aiman —o mailèu aimavan, semblariá— de conéisser son deputat al lòc d’aver un tipe fòrasòl que s’estona d’aver pas una gara a portada de man, un servici d’autobusses per se desplaçar o la 5G sus son telefonet quand es pas mai pròche de la glèisa del vilatge.
 
Alara cal felicitar los que, en proclamant que son d’un endrech o d’un autre e que te fan petar la lenga occitana autan plan coma la francesa, son candidats a las eleccions.
 
Mas soi malaürós de legir dins los comentaris dels legeires las asenadas abitualas sus la denominacion de la lenga, asenadas que venon pas d’un arlèri coma lo que n’èi ja parlat mas d’un tal o tal que se proclama Gascon o melhor Vascon  e que repotèga qu’es una vergonha d’èsser colonizat per aqueles Occitans qu’asira! E çò qu’es valedor per Gasconha l’es per las autras regions d’Occitània.
 
Aquel mot, Occitània, es ara un trapèla desempuèi que qualques embonilhològs que se dison occitans an ajudat la presidenta de la region novèla Tolosa-Montpelhièr a far un hold-up sul vocable; l’aurián batejat, per exemple, “Occitània centrala”, pensi que  lo mond aurián comprés; i a totjorn un centre e, a l’entorn, i a quicòm mai diferent del centre. Non, aqueles piòts —que son pas nombroses e gaire occitans de mon punt de vista— se son comportats —e se compòrtan— coma los Estatsunidencs que modestament (!) s’an pres lo nom d’un continent: America per eles… los autres, petaçatsvos!
 
La quita Provença existís pas mai que sos dirigents son de la meteissa generacion que la de Nino Ferrer que cantava “On dirait le Sud” e an pres lo nom en plaça de “Provença”. Los piòts!
 
Dimècres passat, la sala dels Illustres de la comuna d’Agen festegèt un autor que coneis son Gensemin coma pas un e que ven de publicar un libràs amb fòrça citacions de segur dins la mesura que lo libre es en francés…
 
Lo cònsol màger e la presidenta del conselh departamental faguèron lor omenatge en françés en felicitant l’autor. Seriá estat inconvenent de far pas restontir “lo gascon” de Jansemin —es aital que l’apelava— e l’editor del libre, a la suspresa generala diguèt un trentenat de vèrses de Mos sovenirs avant de far son devís en francés. Èra benlèu pas la faiçon de dire de Jansemin… L’important es la poesia de nòstre poèta dins sa lenga.
 
Jansemin declamava sos vèrses en Occitània mas taben a Lutècia davant mond qu’èran pivelats per sa paraulas sens comprene un sol mot. Los candidats d’en cò nòstre,quala que siá la region, se baton per representar un parçan que coneisson sens jamai confondre velocitat e precipitacion. Sabon que la lenga coma los noms de lòcs —que los PTT d’un còp èra escafan meticulosament— fan partida de nòstre èsser, de nòstre èime, de nòstre país.
 
E n’i encara de pro aluserpits per lor reprochar d’èsser pas vascons… A, la puretat de la raça quand nos tenes!
 
Per acabar farai parlar un mòrt, l’Ives Roqueta, de la region de Besièrs, qu’aviá costuma de dire que” los Occitans [èran] la raça mai pura de bastards” que i aviá sus la tèrra.
 
Aital siá!
 
 
 
 
 
 abonar los amics de Jornalet
 



publicitat
BANER3: Ràdio Occitània



Comentaris

23 de mai 13.54h

#2 lo « tu » es andriu de Gavaudan ?
Compreni pas la remaeca…
Coma disiál’autre soi dubèrt a la discussion … se compreni…


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

22 de mai 20.52h

Qu'ètz vosautis, Grosclaude e tu, qui datz ad aqueth comentari lo sens descrivut ací. Que ditz simplament l'identitat occitana n'ei pas equivalenta a la qui cred- a tòrt o a rason - estar la de la soa region: l'identitat vascona. Non son pas la personas qui son mirats per l'adjectiu " envasidors", mes l'identitat militanta -occitana- qu'acertenan.
Aquera afirmacion - s'ei vertat- qu'ei mortau per l'occitanisme en Gasconha e donc que botatz en tocha en invocar lo vièlh òmi de palha racial... Legir la seguida


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

21 de mai 09.07h

A lo regionalisme qu'es polit! Es lo messie qu'avem besonh per cambiar la mentalitat de tot lo monde.
L'òm pren sas distanças emben la politica. Tots dau vermolus, los medias tots vermolus.e l'òm a pas tòrt. Nòstre sem lo Regionalisme, sem Don Quichote. Prenam nstra chavau blanc e una lança per anam a Paris tornar establir la bona paraula.

La França d'uei es pas aquò. I a pus de democracia e los dirigeants politics, scientifics, medecins, jornalistes, juristes son tenguts d'obeir si... Legir la seguida


Valora aquest comentari:   votar positiu 1   votar negatiu 7
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Andriu de Gavaudan

Andriu de Gavaudan logo rss

Autor de la cronica occitana setmanièra al Petit Bleu de l’Agenais desempuèi 1978 e editorialista de La Setmana fins que quitèt de paréisser

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions