Bandièra01 1180x150: Comuna de Tolosa

Opinion

Cobrifuòc

Bernat Bergé

Bernat Bergé

Conegut coma lo “Bernat contaire” es escrivan e contaire de contes e ensenhaire retirat

Mai d’informacions
En se’n tornant d’una visita a un amic qu’èra pas fieròt, lo Guston e lo nebot avián volgut far una desvirada, per véser una ocasion.
 
— Serem tornats a sièis oras? aviá demandat lo Guston.
 
— Òc ben, aviá respondut lo nebot, lo G.P.S. marca l’arribada a cinc oras e mièja.
 
Mas la discutida durèt, e quand tornèron aviar, lo G.P.S. anonciava sièis oras cinc.
 
— Risca d’èsser justet?
 
— Nani, te’n fagas pas, vau quichar un bocinèl.
 
E partiguèron d’un saut que faguèt fiular las envelòpas e que peguèt lo Guston al sièti.
 
L’agulha del comptador pujava e lo Guston, palle, balbusejèt:
 
— Mas anam pas tròp aviat?
 
— Nani, soi pas qu’a detz al dessús de la limita.
 
— E lo G.P.S.?
 
— Baissa, baissa!
 
Mas aquò durèt pas longtemps: un tractor que tirava una remòrca de lenha èra en pana, sus la rota, la circulacion èra alternada, E foguèron obligats de s’arrestar.
 
Quand tornèron partir lo G.P.S. balhava sièis oras quinze. Lo nebot quichava un bocin mai, lo Guston resignat, demorava mut. Mas la paur o çò qu’aviá begut, al cap d’un moment, li faguèt gausar:
 
— Digas, se te podiás arrestar, cresi que me vau pissar dessús.
 
Lo nebot daissèt escapar un renèc, mas coma coneissiá los problèmas urinaris de l’oncle, s’arrestèt tanlèu que podèt. Lo Guston s’afanava autant coma podiá, mas aquò durava! La darrièra gota a pena tombada, tornèt sautar dins la veitura que bombèt sus la rota, mentre que se tornava braguetar. D’aprèp lo G.P.S. avián perdut cinc minutas de mai.
 
Lo Guston sarrava las dents, vesiá los despassaments riscats, las regas blancas rosegadas, las prioritats refusadas, que lo nebot, pivelat pel G.P.S., remarcava pas.
 
Arribèron a l’ostal a sièis oras un quart, e sens verbal! Mas, qualques jorns pus tard, lo nebot ne recebèt un de mai pebrat, per un despassament de la velocitat.
 
 
 
 abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article