Divendres, 23.7.2021 03h00
Ausiguèt, lo Guston, al «7/9», un pichòt reportatge sus un «estudi participatiu de sciéncia», lançat per l’INRAE, que portava suls arbres victimas del rescalfament climatic. Los escolans del licèu Condorcet de Bordèu i participavan. Suls casses del pargue Ribièra, avián pausadas falsas rucas en pasta. E de quora en quora los liceans passavan las espepissar. Las qu’èran estadas picorejadas pels aucèls èran emportadas per èsser analisadas. L’ADN de la saliva del aucèls permet de determinar las espècias que se noirisson lo mai d’aquelas rucas que rosigan las fuèlhas, e doncas que son las melhoras gardianas dels casses. Coma pensan que lo rescalfament menarà una multiplicacion de las rucas, es important d’aver aquela informacion per aparar aquelas espècias.
— Tè, çò diguèt lo Guston qu’escotava l’emission, poiriam utilizar l’ADN per saber quines son los galapians que me venon chapar las cerièras, la prunas, las persègas, en analisant los clòscs qu’an escupit.
— Tant que i siás, li tornèt lo vesin, que dejunava ambe el, perqué pas los que son venguts se pausar las cauças darrièr la cabana del potz!
— O tanben los que me daissan bordilhas jol casse del cap de la prada, que s’i arrèstan per pantauletar, ajustèt lo Guston.
— O los qu’escampan las masquetas dins las carrièras!
— O dins los restaurants, en analisant las forquetas dels que son partits sens pagar e poder los perseguir!
— Anem, tornèt préner lo Guston, creses pas que passam l’òsca? Te rendes compte que caldriá analisar e ficar l’ADN de tot lo monde!
— As rason, i sèm pas encara, mas qué te ditz que ne prenèm pas lo camin, e que doman serà pas la realitat, ambe, justament, lo desvelopament de la collècta e de l’estocatge de las «donadas personalas», coma dison?
Comentaris
23 de julh 08.19h
Ambe Pegasus, la lei ePrivacy, lo Pass Sanitari, la societat que se dibuga aquelas darnièras setmanas, ven una estraga granda.
D’espressité los ciutadans son botats dins un cap e cap d’acarament. Cada jorn s’espandis un pauc mai la susveilhança de l’estat sus cadun, e enquèra milhor cada ciutadan es encoratjat de susveilhar los circonvesins, vèire sos quites tanhents.
La libertat s’aprima un pauc mai cada jorn !
Estraga : cauchemar (carcin)
D’espressité : à desseins ... Legir la seguida
Valora aquest comentari:
1
0
1
Comenta
Lo comentari es estat mandat corrèctament
Un comentari
En cargament
Un comentari
Mandar
