Bandièra01 1180x150: Comuna de Tolosa

Opinion

Contraròtles robotizats

Bernat Bergé

Bernat Bergé

Conegut coma lo “Bernat contaire” es escrivan e contaire de contes e ensenhaire retirat

Mai d’informacions
A qualques oras del ressopet, lo Guston, ambe lo vesin qu’èra vengut lo quèrre per marcar lo còp, se presentèt a l’intrada del festenal de las lantèrnas chinesas. Colhonavan pas ambe lo contraròtles: bilhetas, plan segur, furga, e sustot «cuèr còde». Lo Guston èra suau: fasiá tres jorns li avián fait la tresena injeccion e aviá dins la pòcha lo novèl «cuèr còde», a la plaça de l’ancian qu’aviá escampat..
 
Lo Guston lo presentèt, mas res, l’aparelh del contrarotlaire demorèt mut.
 
— A nani, çò diguèt, es pas validat.
 
— Mas ai fait lo rampèl fa tres jorns!
 
— Òc-ben, mas lo vos caliá validar!
 
— Mas me l’an fait a la farmàcia, coma soi pas aluserpit ambe l’informatica lor ac aviái demandat.
 
— Benlèu, mas jo, lo «cuèr còde» es pas valide, vos pòdi pas daissar dintrar.
 
— Mas gaitatz, i tornèt lo Guston en virant la fuèlha, aquí avètz lo certificat de vaccinacion, ambe la data, lo 21.12.21, sabètz pas legir?
 
— Las consignas son claras: lo vòstre «cuèr», «l’aplicacion» lo reconeis pas, vos pòdi pas daissar dintrar! E lor virèt l’esquina.
 
— E ben pauròt, nos demòra pas qu’a nos en tornar! concluguèt lo vesin ambe un renèc.
 
— A, s’aviái sabut, romiava lo Guston, auriái pas escampat l’ancian!
 
Mentre que discutissián, l’atestacion encara pels dets, los contrarotlaires d’una autra cordelada se sarrèron.
 
— Qué vos arriba?
 
Contrarotlèron un còp de mai lo «cuèr còde».
 
— Es vertat, çò diguèron, es pas validat.
 
— Mas gaitatz, aquí, i tornèt lo Guston en virant la fuèlha, i a lo certificat de vaccinacion, la data e tot!
 
— Òc, es vertat. Anem, sètz en règla, podètz dintrar.
 
— Tanplan, se remenava lo Guston, aqueles contraròtles numerics, valon pas los dels umans. Los umans, a la diferéncia dels robòts sabon legir e sustot préner una decision d’aprèp çò qu’an legit.
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

JP St Fadat
2.

E ben avètz plan rason.
E a mai, vòstre biais d'escriure QR m'a plan fait rire.
Òsca!

  • 0
  • 0
QR
1.

QR => Quick Response => Responsa Abrivada / Responsa sul còp
Lo primièr QR fusquèc inventat en 1994 per l’entrepreza japonésa Denso Wave qu'es una filhala de Toyota.
L’entrepreza aviá mestièr de siègre pempilhosament los vehicles e pèças qu’eran a se fabregar.
Es atal que s’escapolèc lo primièr QR per encodar Kanji, Kana, e caractèrs alfanumerics.

Son quatres menas de QR :
1- Numeric pòt caber 7089 caratèrs numerics 0 1 2 3 4 5 6 7 8 9
2- Alfanumeric pòt caber 4096 caractèrs , numerics, alfabetics signes especials
3- Octet (Uèitet) pòt caber 2953 caractèrs es per lo còde ISO-8859-1
4- Kanji per lo japonés (son los japoneses qu’an inventat lo QR. Pòt caber 1817 caractèrs
5- « Querda estructurada » (appel structuré) se pòt legir en repentida 16 QR.
6- FNC1 lo QR foncciona tà lo còde barra GS1


Un QR se legís de naut al debàs e d’esquèrra a drèita

Assiau ! (atencion dins lo carcin) lo QR pòt èsser tanben malvolent e vos menar cap a un sit de « pishing ». Sul « playstore » se troba Kaspersky QR Code Scanner: Analyse & Sécurité, es gratís.

https://play.google.com/store/apps/details?id=com.kaspersky.qrscanner&hl=fr&gl=US

Fabregar un QR = >https://www.unitag.io/fr/qrcode

  • 1
  • 0

Escriu un comentari sus aqueste article