CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 13 de decembre

Cedric Rosseu

Dimècres, 30.3.2016 03h00

Fusions regionalas e maridatges malaüroses


Comentaris 56 comentaris    
Dolent Fluix Bo Molt bo Fabulós (24 vòtes)
carregant En cargament


Fa bèl temps ja que la contèsta raja suls malhums socials sus la denominacion de las nòvas regions sortidas de la lei francesa de reforma de las regions del 16 de genièr de 2015.
 
E al país, la contèsta mai bèla se trapa al nivèl de la fusion Miègjorn-Pirenèus e Lengadòc-Rosselhon, entre los partesans de sonar aquela region “Occitània”, amb la volontat que se pòt entendre de veire enfin lo nom d’Occitània aparéisser sus las mapas oficialas, e los (per pas amagar res, soi d’aqueles) que considèran qu’Occitània es una entitat mai bèla, que la faire dintrar dins lo diccionari amb coma definicion “Nom balhat a la fusion de las regions Miègjorn-Pirenèus e Lengadòc-Rosselhon” seriá un fracàs.
 
Cal pas veire dins aquela segonda posicion una volontat de veire escafada la nocion d’Occitània: pensi tot simplament (e soi pas lo sol) qu’Occitània a d’aparéisser dins aquel contèxte, amb un qualificatiu (Centrala, del Sud, Còr d’Occitània…), per valorizar lo trabalh de tria dels companhs que de Bearn a las Valadas en passant per Provença, e d’Auvèrnhe a Aran en passant per Lemosin e Dalfinat, luchan per la subrevida de la lenga.
 
Passarai sus las contèstas, mai o mens dins l’esperit “Paratge, Convivéncia e Cortesia” e sus lo nombre grand de peticions que se crosèron entre los tenents d’“Occitània” e los d’”Occitania mai quicòm”... encara que.
 
Encara que, una peticion qu’arribèt suls malhums socials aquestes darrièrs jorns me tustèt dins l’uèlh: una peticion adreiçada a Dòna Carole Delga, presidenta de region, als saberuts del “Conselh del nom” nomenat per la region per soscar a aquel nom e als sòcis del Conselh d’Estat e de Govèrn.
 
Titolada “Languedoc-Roussillon-Midi-Pyrénées: les jeunes se mobilisent pour le nom de leur région!”, aquela peticion es cosignada per la Joventut Mondina e “l’Union Jeunes de Provence et du Languedoc pour la défense de nos traditions”.
 
Alavetz, tant coneissi la Joventut Mondina, tant l’autra associacion m’èra desconeguda (e o èra tanben de qualques amics provençaus als quals demandèri) e coma, en bon jornalista, soi curiós… ben soi anat furgar.
 
Bon, trapèri aisidament sul malhum d’informacions sus aquela associacion, que lucha per la subrevida de la tauromaquia e de las tradicions provençalas.
 
En furgant un bocin mai (sabètz, los jornalistas, sèm coma los singlars que cèrcan las trufas: o niflam tot), tombèri sus la pagina Facebook de lor president, Corentin Carpentier, e aquí… ò suspresa!
 
La seuna fòto de perfil nos mòstra l’òme en plena presa de paraula sul tèma “Une jeunesse qui oublie son passé est une jeunesse qui n’a pas d’avenir”... a la protèsta del 24 d’octobre.… adobada en Arle pel Couleitièu Prouvènço, collectiu conegut per militar pel fach que “Provença es pas Occitània”.
 
Òm pòt doncas comprene aisidament ont es l’interès d’aquela associacion de veire Occitània se resumir a la fusion de las regions LR e MP, per fin de poder díser: “Vesètz? Aicí es Provença, Occitània es al costat.”
 
Melhor encara: òm pòt legir un comentari del Jean-Pierre Richard, president del Couletièu Prouvènço que ditz “Plus que jamais nous allons continuer “Gardaren Prouvènço”, seul rempart face à tous ceux qui veulent “coloniser” la culture provençale, à ceux qui sont en passe de tuer la langue provençale.”
 
Alavetz, per èsser clar, vòli pas getar la pèira a la Joventut Mondina (quitament se per aquela istòria de nom soi pas d’acòrdi amb eles, la contèsta es una part essenciala de la democracia e fa avançar tot lo monde), me demandi tot simplament se aqueles joves (benlèu per amistats personalas, benlèu per afinitat politica… o sabi pas) se daissèron enganar e benlèu manipular per de monde qu’aprofechèron lor volontat de marcar Occitània dins los atlasses.
 
Convidi, d’alhors, lo monde de la Joventut Mondina a exercir plenament lo lor dreit de responsa per far lum sus tot aquò, e coma soi òme d’encoratjar los escambis entre las diferentas partidas d’Occitània, lor conselhi, se vòlon trabalhar amb Provença, de se virar puslèu, lo còp que ven, cap a l’Ostau dau País Marselhés, al Collectiu Tapenade, a Fem, a Prouvençau Lengo Vivo o encara a Aquò d’Aquí, que dempuèi d’annadas fan un trabalh de tria per ajudar al desvolopament de l’occitan en Provença. 



 

Les jeunes du Languedoc-Roussillon-Midi-Pyrénées se mobilisent pour que leur voix soit réellement prise en compte par...

Posted by Fabien Ginoux on dijous, 24 / març / 2016



publicitat
BANER1-2-3: DGPL TRADUCTOR



Comentaris

11 d'abril 11.54h

Rectificatiu... M'enganèri en parlant d'autors bearnés qu'evoquèron la crosada. Benlèu que n'i aguèt mai voliáu parlar de la granda Filadèlfa de Gèrda... qu'èra bigordana. E per Provença, entre autrei Fèliç Gras.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

11 d'abril 10.54h

Au perfiech argumentari de Cedric, apondrai que ieu tanben me foti dau nom, dau moment qu’arroïna pas tota la filosofia que porta « Occitània » en se, bòrd qu’es pas una simpla etiqueta banala qu’òm pòt espingolar a l’azard Bautazar sus un parçan dau « sud de França » que n’es que lo terç. Lei que son per aquò, seis escrichs mòstran qu’an pas la mendra cultura de l’istòria comuna dei tèrras occitanas. Seriá que lo sosten dei Marselhés per combatre Simon de Mont... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

10 d'abril 12.02h

#54 Me vau permetre de sortir de la reserva que m'impausi (non pas intervenir sus mos articles fòra de per menar una precision) per respondre a d'aquèla question :

Personalament qu'un nom vòli, sabi pas e per pas res amagar m'en foti ai passada una bèla part de ma vida en "Midi Pyrénées" Pireneas me parla, midi non... Lo nom m'en foti

Per contra sabi çò que vòli pas : per ieu Occitania es un mot que pòrta una lenga e una filòsofia que far que me sentissi a l'ostal, tant a Clarmont... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

9 d'abril 20.33h


Cò que nos espèra a l'ora d'ara :

per PACA benlèu Provença? Grand Sud -Est, mas pas Occitània Orientala
per Aquitaine Poitou Charentes Limousin benlèu Grand Sud Ouest, mas pas Occitània Occidentala.
Per MP- LG aurem probable Languedoc Roussillon , o Pyrénées Languedoc (mens etnic) e non pas Occitània Centrala
Per Rhones Alpes Auvergne es pas aisit , benlèu Gaule Centrale ?, e non pas Occitània Nauta .

Vos demandi: serià una assegurança per fin de mantener l'unitat d... Legir la seguida


Valora aquest comentari:   votar positiu 0   votar negatiu 5
Respondre comentari replica Comentari inadequat   Formulari d'abús de comentari

9 d'abril 12.26h

#52 Los jos-entendut als "piranas" era dirigit contra ieu Josiana. Te pòdi diser qu'aquel article acabet de me faire pas que d'amics dins l'occitanisme mondin, mas bon m'en foti, l'ai pas sortit per esser popular o pas, l'ai sortit per de que pensavi (e o pensi totjorn) qu'era important de sinhalar aquel fach al monde e d'aver responsas.
Regraci lo Clamenç Pech de la Setmana per son article plan fach coma de costuma (amb notadament aquel famos NDR) e teni de precisar una causa a mai.
Quora ai... Legir la seguida


Valora aquest comentari:   votar positiu 4   votar negatiu 4
Respondre comentari replica Comentari inadequat   Formulari d'abús de comentari

9 d'abril 11.25h

#49 E non Matieu, vòlon ren comprene !! Per orguèlh e pretencion d'èstre "l'occitània canal istoric" (aquela es pebrada !) a eu tot solets. Quin mesprètz de l'autre !
L'escapatòri de dire que tot biais "Occitània" passarà pas es...qu'un escapatòri. L'afar es mai que grèu en çò que mòstra de qué son capables d'unei gens dins l'occitanisme : lèsts de l'esquinçar sens vergonha a un moment onte siam mai que jamai espotits e mespresats per l'estat, qu'a pas plus manco besonh de ren... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

6 d'abril 09.50h

Ne'vs poish pas explicar las causas miélher que lo Mathieu Castel. Segur quan demoratz en Biarn o en Provença, que sabetz de que e vòu parlar. A lor com a noste qu'avem de har cap aus antioccitanistes que's regaudeishen de véder l'etiqueta "Occitanie" pegada sus MPLR ("Que-p abem dit qué lou nouste parsâ n'ère pas en Outsitanie", "Outsitanie qu'ey ue inbencioû de toulousencs", "L'Outsitanie qu'ey sounque lou Lenguedo" e patati e patata...).
Après, se ne voletz pas compréner...


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

5 d'abril 18.53h

#47
Encara un còp cal comprene que la decision nos aparten pas!
Podèm sonque somiar lo nom que nos agradarià lo mai.
A ièu m'agrada pas Pyrenées Languedoc, o Grand SUD , Ovalie...
M'agradi Occitània e quitament" Occitanià Canal Istorica" serià encara melhora se volètz .
Mas seriai content qu'una (au mens) de las cinc regions istoricas d'òc se sonèsse Occitània.
Levat LRMP ne'n vesi pas una autra possibla. E cal que lo nòstre nom paresca enfin!
Mas crenhi fòrt que se... Legir la seguida


Valora aquest comentari:   votar positiu 0   votar negatiu 2
Respondre comentari replica Comentari inadequat   Formulari d'abús de comentari

5 d'abril 08.57h

#46 Avètz pas comprés que ç que pausa problèma es l'aligança vergonhosa entre "d'occitanistas" e leis adversaris absoluts de la quita idèa d'occitanisme per d'interés politico-regionaus ?



Lo nom de la region es pas tant la question aicí (me demandi pasmens çò qu'es lo problèma amb l'apelacion "Languedoc-Pyrénées" que me sembla ben pus corrècte que non pas "Occitanie" per aquesta nòva region).


Valora aquest comentari:   votar positiu 18   votar negatiu 1
Respondre comentari replica Comentari inadequat   Formulari d'abús de comentari

5 d'abril 00.57h

#45 Mens d'1€ per estatjan... Aprèp cal esperar que los occitanistas de MP prendran de los de LR lo fach de demandar "X € per estrajan" puslèu que "X % del budgecte de la cultura" coma foguèt lo cas en MP pel passat


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3
-
4
-
5
-
...6 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Cedric Rosseu

Cedric Rosseu logo rss

Originari de la Val de l’Arièja, es jornalista independent, animator de ràdio e amator de la musica Ròck

mai d'informacions

contactar l'autor

Mai d'articles

Archius




Etiquetas

mèdias   occitanisme   rosseu  

D'autres articles


Jornalet, gaseta occitana d'informacions