CAPÇALERA: Eth Ligam occitan Youtube

Jornalet, gaseta occitana d'informacions

Diluns, 10 d'agost

Cedric Vergalh

Dimars, 14.7.2020 03h00

Manganas (VIII)


Comentaris Un comentari    
Dolent Fluix Bo Molt bo Fabulós (3 vòtes)
carregant En cargament


Mas vaquí que lo monde bolèga a man drecha. Lo que s’apròcha e que ven de dintrar lo reconeissi. Mas son nom... Fa de television. Vòl anar fins al bar saludar una conoissença, lo patron de segur. Aquò fach se trapa cap e cap amb Sofià. La vesem li parlar a l’aurelha, escotar sa responsa, rire en pausar sa man sus son braç e li presentar Kenza. Lo tipe lor fa un signe del cap abans de començar de traucar la molonada e èlas seguisson. Fins a l’escalièr bèl. Las daissa passar davant. En tot montar lo salòp pòt espiar s’an de culòtas, de tangàs o d’estring. O pas res.
 
De luènh las seguissem a bèls uèlhs se’n anar fins al carrat VIP onte son presentadas a de monde que las saludan tant coma l’animator tèle. Lor fan plaça sus las banquetas de velors e demest las personas que se son levadas per aquò far me sembla ne veire un que reconeissi còp-sec. Sofià atanben çò sembla. Se tròba còsta èl e li demanda de far un selfie. Se levan, li pausa la man sus l’espatla e cliqueja. Se tornan sietar, brindan e ausissi bronzinar lo telefonilhet del Filon. Me mòstra la fòto: es el. L’aïssable.
 
Los que se permeton de dire de causas, que fan pròva de marrida fe de lor tribuna estant, qu’espandisson de messorgas coma se rondupejavan lo debat e l’escambi, totes aqueles tipes t’an pas de fàcia. Se trufan de longa, fan un retrach de nosautres, de nòstras amiras, de nòstras pensadas qu’es a l’encontra de nòstra umanitat e de nòstra sapiéncia. E vaquí que l’una d’aquestas lengas de pelha se trobava en çò nòstre, a se’n creire, a superar los que badavan sa plaça, a venir sus las tèrras d’aqueles que mespresava encara dins sa cronica tèle fa una setmana.
 
E jamai digús per lor far la replica a l’entorn del micrò, remarcaratz. A, per rebecar sus de causas essencialas coma lo retard dels trens en periòde de cauma o l’engenh de tal jogaire de fotbòl, aquí òc, i aviá de monde. Mas per çò qu’es de las acusacions gratuitas, sus la bestiesa presumida, sul comunautarisme brandit, sus l’inutilitat sociala exprimida, èran totes d’acòrdi, i aviá pas de presompcion d’innocéncia e la senténcia tombava: colpables!
 
 
 
abonar los amics de Jornalet
 
 


 



publicitat
BANER1: Amics campanha covid



Comentaris

14 de julh 07.28h

Vos fan pas gaire de comentaris los legeires. Vaquì un per vos faire coneisser que m'agrada plan lo vòstre biaìs d'escriure .Contunhatz! Que volem saber com acabarà tòt aquò. (se es que s' acaba)


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions