Bandièra01 1180x150: Comuna de Tolosa

Opinion

Manganas (XXXI)

Tornamai partissèm. Per camins improbables. Conoissi pas lo canton. Me demòra pas que de seguir. Anam cap al sud, cap a Andalosia: aquò me conven.
 
L’ai vist parlar al telefòn. Al Jefe, de segur. De qué se son diches? De qué ne pensa de tot aquò? Qual es aquel tipe? Sembla un espontáneo que se mesclariá a la faena, al trabalh del matador, per fin de se far conóisser. El Cordobés! Mas un rescat...
 
Qual es lo mai en dangièr? Lo Z., aquò segur!
 
Ieu? Ai pas cap d’informacion sul personatge, sus las intencions del Jef’, sus nòstre encaminament, nòstra destinacion. Mai que tot tèni pas d’arma. Poiriai partir endacòm ara qu’ai fach lo plen. Seriá lo perdre de vista...
 
Lo tipe? Lo raubatòri del Z., de la veitura, los reguènhs: crenta mai que mai la polìcia. Ajudar los cònhos? Serià me perdre...
 
L’organizacion? I aurà de rambalh sus Bordèu, aquò segur. Aquí basta de mesclar pas aquesta istoèra a nosautres. E de netejar darrièr, tot cande, tot polit, coma sabem faire. La teoria del lop solitari convendrà a la polícia e als jornalistas...
 
Quora vesi un panèl marcat “CUENCA 53” trantalhi pas e i vau. Me dalha de seguir aquel pelhandron.
 
Conoisses la faula de la granhòta e de l’escorpiu? E ben vaquí, i sèm en plen.
 
Me vau petaçar per sonar El Jef’: amb sas conexions al dintre de la polìcia... Mas vaquí que lo tipe es a me corsar!
 
I a pas que nautres sus aquela rota. Quichi sus la pedala. Enteni pas res a tot aquò. De qué vòl? La veitura? Ma pel?
 
Vau mai viste qu’èl, a riscar l’accident e subte es pas mai dins lo retrò. De qué far? Contunhi. Me cal trapar una vila, una aglomeracion, gausarà pas m’atacar demest las gents e la circulacion.
 
Lo monde al revèrs! Soi ieu qu’ai la peta. Lo caçaire se fa salvatgina. Calrà cambiar lo biais de far, riscar pas mai de se trobar a la mercé d’un simple emplegat. Putanièr! Tusti lo volant. Gaiti tornamai dins lo retrò, a cada crotz de camin, pas res, quitament a l’intrada de Cuenca.
 
Ara i sèm.
 


abonar los amics de Jornalet

 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article