Lo tram en occitan a Montpelhièr es possible. Dempuèi un pauc mai d’un an ara, d’estudiants de licéncia d’occitan de l’universitat Pau Valèri de Montpelhièr trabalhan a l’entorn d’un projècte sociolingüistic. Lo tram en òc a Montpelhièr ara… genèsi d’un projècte.
 
L’an passat d’estudiants de segonda annada de licéncia d’occitan decidiguèron dins l’encastre d’un cors de lingüistica de trabalhar sul projècte d’un tram en lenga occitana coma pel mètro de Tolosa. A la debuta èra solament un trabalh a l’entorn dels noms de totas las estacions de la linha 1 que religa al nòrd los barris de la Mosson cap al sud lo quartièr d’Odysseum. Qualques estudiants rescontrèron a l’epòca l’ancian president de l’aglomeracion de Montpelhièr qu’èra vertadièrament estrambordat per aquel projècte pels transpòrts que son d’excellents supòrts culturals o socials e que la lenga occitana i podiá trobar sa plaça. La tòca èra pel el de soscar a d’anóncias en occitan que vendrián completar las anóncias en francés. Mas coma sovent las causas pòdan cambiar en politica. Entre-temps lo conse de la vila de Montpelhièr cambièt e los estudiants rescontrèron l’adjonch novèl a la comuna e a l’aglomeracion qu’es tanben delegat a la cultura occitana. La discutida s’orientèt subretot a l’entorn de l’occitanizacion dels transpòrts de la vila. Cal dire que i a de trams que se passejan a Montpelhièr dempuèi 13 ans e que i a pas una sola linha qu’aja d’anóncias en occitan.
 
Alara serà lèu lo tram de Montpelhièr en occitan? La novèla còla municipala es d’acòrdi mas d’en primièr sus la linha 4 qu’es pas encara acabada e que son interés es de passar en centre-vila. L’aglomeracion voldriá enregistrar una votz per presentar las estacions en occitan. Doncas vaquí una nòva de las bonas per l’avenidor… Aqueste projècte deuriá veire lo jorn tre l’an que ven qu’aquela linha serà completament acabada. Mas es pas tot, cal apondre que la comuna voldriá soscar a la dobla denominacion de las carrièras grandas del centre-vila. La linha 4 del tram a Montpelhièr.
 
Cal precisar tanben que ja la SNCF e la Region fan ausir la lenga dins las cinc linhas TER. a 1 èuro de Lengadòc-Rosselhon. Alara perque pas lo Tram? L’occitan, lo cal trobar dins la vida publica. Aquò vòl dire que la lenga nòstra pòsca viure e que totes aqueles que o desiran la pòscan emplegar. Aqueste projècte a besonh de segur de la pugnacitat de las associacions occitanas de la vila e de l’aglomeracion. Es ensemble que capitarem.