CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dijòus, 12 de decembre

Dàvid Grosclaude

Dimècres, 13.4.2016 03h00

Regions: nos batèm per un nom o per una lenga?


Comentaris 10 comentaris    
Dolent Fluix Bo Molt bo Fabulós (8 vòtes)
carregant En cargament


Quala es l’amira del combat?
 
Los opausants a una vertadièra descentralizacion coneisseràn lèu una novèla victòria! La dels noms de las regions.
 
Ara qu’an ganhat la batalha del retalhatge son a metre la zizania entre nosautres a prepaus del nom de la region mai centrala d’Occitania. E òm vei que lo comitat de sabis qu’èra encargat de far de proposicions a pas prepausat res de satisfasent. S’es acontentat de prepausar de noms que pòdon pas metre l’occitanisme d’acòrd.
 
E finalament òm sap çò qu’arribarà. Òm ditz per rire que lo fotbòl es un jòc que se fa amb 22 jogaires sul terrenh e qu’a la fin es l’Alemanha que ganha. La descentralizacion en França es un pauc parièr. Es un jòc que fa coma se participavan los estatjants de las regions mas a la fin, es totjorn l’Estat central que ganha.
 
Aquelas “consultacions” sul nom de las regions riscan de mal virar. Pel moment son los catalanistas que son contrariats; e los compreni plan. Volián una region a despart e lo resultat es que riscan d’èstre escafats.
 
Puèi son tanben contrariats los autres occitans que vòlon pas que lo nom d’Occitania sol, siá captat per una sola partida del territòri. E pensi coma eles. Occitània es mai que la region centrala. Un adjectiu seriá necessari. Mas quand òm analiza la situacion, finalament la discussion se fa a l’entorn d’una region qu’avèm pas volguda e risca de s’acabar amb un nom que volèm pas e que nos opausarà.
 
S’aquò es pas une situacion que mòstra la perversitat del centralisme me demandi çò que nos cal! E sul nom que nos poiràn donar i aurà pas a trantalhar: serem tots de colhonats!
 
La luta per un nom seriá francament interessanta foguèsse per ua region (o puslèu per de regions ) qu’auriam poscut aprovar dins lor retalhatge e qu’aurián un pauc de poder. Es pas lo cas. La reforma es pas satisfasenta sus aqueles dos punts. Volèm batejar de territòris mal formats, sens cap de poder politic e budgetari.
 
Nos demòra lo nom per nos poder carpinhar! I a de monde qu’espèran pas qu’aquò per se trufar un còp de mai d’aqueles provincials qu’an un esperit plan estret. E mancaràn pas de dire que son eles que trencan perqué arribam pas a nos entendre. E soi pas luenh de pensar qu’una bona partida de nòstres capulats regionals qu’an “lors malhums a París”, coma dison, son complicis (e benlèu organizators) de tota aquela confusion.
 
E vos parli pas de las batalhas que se veson pas dins lo gran public entre les administracions regionalas que se baton per saber qual manjarà l’autre e qual comandarà dins tal o tal sector. Qual aurà las amassadas plenièras, ont se faràn las amassadas de comission, etc…
 
E nosautres auriam lo temps de nos dividir per saber se cal apelar una region “Occitanie” ou “Occitanie centrale” o encara “Occitanie-Roussillon” o “Terre d’oc”?
 
Avètz benlèu remarcat que i a pas una sola proposicion de nom en lenga occitana. Metre lo nom del país sus la mapa del monde dins una lenga qu’es pas la del país en question, es una causa que me pausa problèma.
 
Per dire la vertat e ma prioritat, se me caliá causir entre “Occitanie” e un nom en lenga occitana coma “Pirenèus-Lengadòc” seriá lèu fait per ieu: seriá lo segond.
 
La batalha es, de mon punt de vista, de saber se los conselhs regionals prepausaràn, demandaràn, que lo conselh d’Estat prenga en compte los noms dins doas versionso tres segon los cas. Dins lo sondatge a prepaus de la region ont demòri ai prepausat “Aquitània” e non pas “Aquitaine”. De metre lo nom en occitan sembla pas malastrosament a l’òrdre del jorn E, ça que la seriá aquò la vertadièra (r)evolucion. La nos prepausan pas; e o faràn pas.
 
Vos parlariái plan de las discussions sul nom que portaràn los estatjants de las regions novèlas mas francament d’ausir parlar d’aquò n’ai lo sadol. En occitan per designar los que demòran dins un lòc, la màger part deu temps dison “los de …” seguit del nom del lòc.
 
Finalament vesi pas perqué sus la question del nom i auriá una decision dita democratica quand per la question de retalhar las regions se son passats de nòstre punt de vista. Crenti fòrça que las decisons sián ja presas. Donc se devèm perdre, al mens poiriam metre en primièr dins nòstra lista de principis que los noms de nòstras regions se digan tanben oficialament DINS LOR LENGA .
 
 
 
 



Article publicat lo 10 d’abril passat sus david-grosclaude.com



publicitat
BANER1-2-3: DGPL DICTADES



Comentaris

14 d'abril 01.19h

#9
Soi d'acòrdi dins l'ensèm çaquelà i vesi tanben d'unas causas de mai que son malerusas per nosautres.

La primièra es qu'aqueste debat faguèt sortir de lor cauna los occitanistas nombrilistes que veson solament lor pichon parçan d'Occitània e lor pichon ròtle dins l'occitanism. Son los que son fièrs coma de gals de veire "Occitània" soleta prepausada pel nom de la region. E coma de gals que cantan totjorn los pes dins la mièrda, aquestes contunhan lor serenada fierament dins los... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

13 d'abril 23.13h

"Avètz benlèu remarcat que i a pas una sola proposicion de nom en lenga occitana. Metre lo nom del país sus la mapa del monde dins una lenga qu’es pas la del país en question, es una causa que me pausa problèma"

> S'agís del nom d'una region administrativa Francesa : normal que lo nom sia en Francés. Escossia, sus las mapas, es escriut "Scottland", es a díser del nom anglés, pas "Alba". Catalonha es escriut "Cataluña", en espanhòu, pas "Calalunya". E se jamès la region deveng "O... Legir la seguida


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

13 d'abril 22.50h

#7 front d'goch ?


Valora aquest comentari:   votar positiu 3   votar negatiu 4
Respondre comentari replica Comentari inadequat   Formulari d'abús de comentari

13 d'abril 20.34h

#4 Un Front... Tot es dich...


Valora aquest comentari:   votar positiu 1   votar negatiu 7
Respondre comentari replica Comentari inadequat   Formulari d'abús de comentari

13 d'abril 13.36h

Causíssi amb qual te vas maridar, mas te daissi lo drech de demandar a la familha cossi vòlon que s'apèle la nena o lo nenon, fruch de l'union; s'aquò 's pas una concession democratica, de qu'es aquò!
----
E aqui nòstres médias, de ventres dins la fanga, s' aplatussant davant l'egemonia politico-culturala, per lançar una campanha mediatic per causir un nom, sens maitas ambicions que de far vendre lors cabessals de papier
Basta per "PIrenèus- Lengadòc", benlèu lo mens piéger, mas mè... Legir la seguida


Valora aquest comentari:   votar positiu 12   votar negatiu 6
Respondre comentari replica Comentari inadequat   Formulari d'abús de comentari

13 d'abril 11.32h

Plan bona analisa de David Grosclaude.
Mas, Nòra me fendes lo còr. Si voles esser princessa de Tososa chau aprener a far daus potons pas daus bisons que lo monde de Tolosa coneissan lo poton pas lo bison.
Te!... Tolosa a mesme oblidat qu'autre còp, fai pas tant de temps, l'òm fasia daus potons.

Chau pas far de partit politic; l'òm sap ren sur çò que vai devenir la politica en Franca. La cultura occitanista, quò es nos, occitanistes que la portan e degun d'autre. Alaidonc, chau crear en... Legir la seguida


Valora aquest comentari:   votar positiu 2   votar negatiu 4
Respondre comentari replica Comentari inadequat   Formulari d'abús de comentari

13 d'abril 10.34h

Sus aqueste punt David Grosclaude a rason.

Cal tre ara aprestar las eleccions regionalas de 2021 e començar de constituir un Front Democratic Occitan independent de las fòrças politicas francesas o francistas.

Quand aurem d'elegits clarament identificats occitanistas farem recuolar LO MESPRETZ


Valora aquest comentari:   votar positiu 7   votar negatiu 2
Respondre comentari replica Comentari inadequat   Formulari d'abús de comentari

13 d'abril 09.35h

#2 Correccion de la 1ra partida del mieu commentari (vos ai mal legit mila excusas).
Demòra que los movements politics se fan pas solets, donc soi segur que i a de monde politizats que vos espèran, car masdiset !


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

13 d'abril 09.28h

#1
Quant de còps caldrà dire que ARAN ES OCCITÀNIA, tron de Diu!
Donc aquò significa (d'après vòstres calculets) que sus dotze articles, n'i a cinc que parlan dels païses occitans. Per los movements politics (e la rèsta) i a pas qu'una causa de far, sortir de l'attentisme e se bolegar puslèu que d'agachar passar lo trin (en romegant que va pas pro aviat).


Valora aquest comentari:   votar positiu 9   votar negatiu 0
Respondre comentari replica Comentari inadequat   Formulari d'abús de comentari

13 d'abril 08.50h

Ende se pas héser colhonar com cada còp, çò que manca es una possibilitat de respónder damb un rapòrt de fòrça. un puple conscientizat, donc. e d'aquò ne som lunh, e nos mancan los utís end'ic desvelopar. pas d'ensenhament massiu de la lenga o en la lenga, pas de medià interessant, pas de movement politic que prepausi grand causa... l'estat n'a pas qu'a se servir e daunejar com vòu.
Dens Jornalet en tres jorns, dotze articles de jornalet, tres parlan d'Occitània, dont dus d'Aran.... Legir la seguida


Valora aquest comentari:   votar positiu 2   votar negatiu 13
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Dàvid Grosclaude

Dàvid Grosclaude logo rss

Jornalista e politician. Participèt a la creacion dels primièrs programas de France 3, Ràdio País e La Setmana entre d'autres. Es delegat a la politica lingüistica en favor de las lengas basca e occitània al Conselh Regional d’Aquitània.

mai d'informacions

contactar l'autor

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions