CAPÇALERA2 DINTRADA2018

Jornalet, gaseta occitana d'informacions

Dissabte, 22 de setembre

D'estudiants d'occitan de Montpelhièr

Dimècres, 12.9.2018 03h00

Un còp èra l’Universitat


Comentaris 9 comentaris    
Dolent Fluix Bo Molt bo Fabulós (8 vòtes)
carregant En cargament





Lo jaune l’aimam dins nòstres gòts, pas dins nòstras facs

 
Nautres, estudiant·a·s del departament d’occitan de l’universitat Paul-Valéry, inscrich·e·a·s en licéncia, màster o doctorat, mobilisat·da·s e non mobilisat·a·s contra la lei Orientation et Réussite des Étudiants (ORE) e ParcourSup, avèm sentit lo besonh de comunicar sus lo movement social en cors a l’universitat, coma endacòm mai, dempuèi de meses. Aquel movement s’opausa a la politica de brigalhatge del servici public mesa en plaça a granda rapiditat (e quasi d’escondons) per l’Elisèu, Matignon e Companhiá©.
 
Volèm partejar amb vautres nòstra experiéncia, entamenar amb vautres una discutida, per qu’aquel movement s’areste pas mas al contrari se precise, se renfòrce, resista, e ganhe.
 
Se legissètz aquel tèxt, es fòrt probable que siá per çò que vos interessatz a la diversitat culturala o alara a la lenga occitana, en tot cas a las luchas socialas. Coma estudiant·a·s, de la filièra “Langues, Littératures et Civilisations Étrangères et Régionales (LLCER) Occitan”, desiram aquí exprimir clarament las nòstras inquietuds quant a las repercussions dangierosas que l’ensemble d’aquela politica liberala e anti-sociala fa pesar sus l’ensenhament superior public en general, mas tanben sus l’ensenhament de l’occitan. L’abséncia de comunicacion e la manca de discutidas collectivas nos an butat·da·s a reagir e a escriure aquelas linhas.
 
Vist que d’informacions totalament biaissadas circulan dins los mèdias coma dins las salas de professors o sus las rets dichas socialas, anam començar per far nòstre pròpre raconte dels eveniments…
 
 
1) Raconte d’un movement social
 
La mesa en plaça de la seleccion per tiratge al sòrt dempuèi la Loi Relative aux libertés et responsabilités des Universités (LRU) metiá ja en evidéncia los problèmas de capacitat d’acuèlh de las universitats. L’arribada d’una classa d’atge mai nombrosa rend efectivament encara mai visibla la manca de mejans investits dins l’ensenhament superior public.
 
En aquela annada 2018, lo 8 de març, la lei Orientation et Réussite des Étudiants (ORE), portada per la ministra de l’Ensenhament superior, de la Recèrca e de l’Innovacion Frédérique Vidal, es estada adoptada en urgéncia e sens debats vertadièrs. Dins las universitats, mantuna assemblada generala es estada tenguda afin d’informar sus los dangièrs d’aquela lei qu’introdutz o puslèu exacèrba la seleccion sociala a l’entrada de l’universitat e la concurréncia entre los establiments. Es clar qu’aquela lei respond pas cap al besonh de mejans suplementaris necessaris al sistèma educatiu. Al contrari, anóncia un desengatjament, un desinterès encara mai grand per l’ensenhament superior. Mas las entrepresas bavejan davant aquel mercat, las bancas fremisson… la quita Marion Maréchal Le Pen crèa una escòla superiora. De qué va venir l’ensenhament superior public? Aquela lei sabona la pòst a aqueles liquidators.
 
Los servicis publics que concernisson los transpòrts e la santat son atacats del meteis biais. Lo·a·s caminòt·a·s riscan de pèrdre lor estatut conquesit e mantengut fins ara per fòrça luchas. Se baton contra la dubertura del camin de fèrre a las entrepresas privadas e contra la barradura de las pichòtas linhas. La manca de mejans alarmanta dins los espitals met en dangièr lo·a·s trabalhaire·a·s coma la practica.
 
Al meteis moment, en aquela debuta d’annada 2018, amb la lei Asile et Immigration, l’Estat francés renfòrça encara sas possibilitats d’embarrar las personas privadas de papièrs, per la sola rason que son privadas de papièrs… Dempuèi l’introduccion de l’estat d’urgéncia dins lo drech comun, per tota persona vivent dins aquel país, la privacion de libertat ven causa de mai en mai normala emai recomandada, causa admesa. La guèrra als paures s’intensifica d’en pertot. Los barris populars son enrodats per una polícia comola de bavaduras e d’impunitat. Los centre-vilas son envasits de camèras, de bling-bling, de misèria e de publicitats. Mentretant, la lei sus lo secret dels afars es votada: los capitalistas pòdon créisser en patz!
 
Las luchas son plan aquí per refusar tot aquò.
 
Per çò que concernís lo campus de Paul-Valéry: lo 15 de febrièr lo·a·s estudiant·a·s blòcan l’universitat, l’Assemblada Generala del meteis jorn, qu’amassèt gaireben 1000 personas (alara que las precedentas penavan a despassar la centena) decidís de contunhar lo blocatge. Un emplec del temps substitutiu e una cantina populara son meses en plaça. Los estudiant mobilisats analisan, difusan, comunican, assajan de crear lo rapòrt de fòrça per far abrogar la lei e aumentar los mejans de l’universitat. En occitan, son mai o mens mobilisats.
 
Mas de qu’es un “emplec del temps substitutiu”? Es una organizacion que permet de propausar d’ensenhaments o de talhièrs, segon l’especialitat de cadun, dins los luòcs ocupats e dubèrts per los militans. Mantun professor de Montpelhièr e d’endacòm mai, mas tanben d’estudiant·a·s, an dispensat aital de corses o de talhièrs. D’estudiants d’occitan an pogut donar un cors sus las luchas viticòlas e lo movement occitan dins las annadas 70, seguit d’un cors de dialectologia occitana per la canson de lucha (Los carbonièrs de la Sala de Joan Bodon, cantat per Mans de Breish, en occitan lengadocian, e Ai Mamà de Uèi, en occitan provençal). Aquel cors es estat boicotat per la directritz del departament d’occitan qu’indiquèt que, essent contra lo blocatge, fariá pas circular d’informacion a prepaus d’aquel eveniment. Pr’aquò, aquel cors dintrava dins lo quadre dels ensenhaments de la LLCER occitan! Amai, auriá pogut èsser l’escasença de recampar nòstre pichòt departament “familial”! Aquel boicòt nos menèt a una reflexion a prepaus del campus de Paul-Valéry, d’autant que nòstre·a·s professor·a·s s’inquiètan de pas mai aver de nòvas d’una partida de lors estudiant·a·s e atribuisson la desercion del campus a l’ocupacion e al movement social. Desiram far remarcar que la vida sus lo campus es abandonada dempuèi d’annadas. Lo·a·s estudiant·a·s van en cors puèi tòrnan a l’ostal. Perqué? Per çò que las condicions d’acuèlh a l’universitat son degalhadas per causa d’òbras interminablas, d’una administracion borlesca, de congrès de banquièrs o de la Cambra de Comèrci Internacionala (CCI) que remplaçan los concèrts, de l’acompanhament de la vida associativa descoratjanta, etc. Caldriá benlèu pensar a çò qu’interessa un·a estudiant·a a l’ora d’ara sus lo campus. S’òm vòl plan i soscar un brieu, fa pas mestièr incriminar l’ocupacion e lo movement social per comprene aquela desercion organizada.
 
Dempuèi ja longtemps, d’une·a·s assajan de resistir a aquel estat de fach.
 
Rapelam l’existéncia d’una associacion sus lo campus, lo Med’òc dau Clapàs, qu’es un motor de mobilizacion (exemple: dubertura de pòstes al CAPES dins las annadas 90), de publicitat de la licéncia d’occitan, de professionalizacion dels e de las estudiant·a·s (sector associatiu, musical, mèdias, quasernet d’adreiças plan provesit) tant coma del plaser de s’investir sus son campus. Podèm pas que regretar la manca d’interès e d’investiment, quitament lo mesprés, de la màger part dels e de las professor·a·s del departament d’occitan en regard del Med’òc.
 
 
2) Repression
 
Coma tot movement social, mantuna critica foguèt facha als e a las grevistas. Per nòstra part, nos semblèt important de parlar de la repression patida, que pòt explicar en partida las criticas exprimidas contra lo movement.
 
 
A. Repression fisica:
 
— Ataca fascista per de personas protegidas per la securitat e la polícia a la fac de drech, lo 22 de març de 2018, en seguida de l’Assemblada Generala qu’aguèt luòc dins l’amfi A e que votèt l’ocupacion per la nuèch.
 
— Violéncia policièra e estatala amb la rafla realizada a la fin de la manifestacion del 14 d’abril, cridada per lo·a·s estudiant·a·s. Mentre tornavan montar a Paul-Valéry afin d’organizar l’acamp de Coordination Nationale des Luttes (CNL), foguèron enrodat·da·s puèi cargat·da·s, çò que donèt luòc a 51 interpellacions (dos buses de la TAM èran estats requisicionats per l’escasença). D’unes foguèron literalament trigossats pel sòl. D’unes foguèron grèvament nafrats mentre que la Brigada Anti-Criminalitat (BAC) escrachava los estudiants contra las grasilhas del parcatge del Carrefour City (entre autre, un collèga aguèt las mans traucadas), tot aquò gaujosament saupicat de gasatge e maçugatge. Se comptavan quatre personas inconscientas aprèp la carga de polícia. Un estudiant passa en procès alara que res li pòt pas èsser reprochat e risca a l’ora d’ara entre un e tres ans de prison.
 
 
B. Repression mediatica:
 
— La màger part dels mèdias transmetent pas que de buzz sus fond de patòs trachan mai que mai de las “violéncias” talas coma “brigalhatge de veirinas”, tags, o encara “vandalisme de servidors informatics”. Per çò que concernís aqueles famoses servidors, rapelam qu’en realitat tot tornava foncionar qualques oras mai tard. Mas aquel episòdi, qualificat inicialament de sabotatge, es vengut puèi de “vandalisme” dins Midi Libre, per acabar en “sacatge, destruccion” dins nòstras bóstias mèls, perpetrats per de violents anarquistas, de personas exterioras…
 
— Los mèls quotidians e fòrça partisans, mandats per lo president de l’universitat Patrick Gilli a l’ensemble dels e de las estudiant·a·s e personals, an assajat de devesir al maximum la comunautat universitària. Es atal qu’aquel president, malgrat son pauc de carisme, a participat a la repression del movement,  podent pas comptar sus una vertadièra intervencion de la polícia sus lo campus malgrat mantuna demanda, aquelas essent estadas refusadas per lo prefècte. La polícia acabarà per intervenir pendent las vacanças, mentre que lo campus èra vuège.
 
 
C. Repression sus lo campus:
 
— Emplec d’una agéncia de securitat privada (en mai de la securitat de l’universitat e de la societat Prosegur en contracte amb l’universitat), sens ensenha, que protegissián lo president amb de cans. Aqueles gròsses braces protectors tant coma los de Prosegur aguèron d’alhors l’amabilitat de contrarotlar las cartas d’estudiant·a·s e de personals a l’entrada de l’universitat e quitament de ne servar d’unas a l’entrada dels bastiments (entradas filtradas!). Mas anarem pas fins a bramar a delicte de faciès...
 
— Barradura dels amfis A, B e C (lo A es clavat de l’interior). La CGT Université Montpellier aguèt doncas pas accès a son local pendent gaireben dos meses e d’aquel temps la direccion refusava al sindicat de li provesir de salas per aculhir d’acamps. L’amfi H tanplan clavat, alara que cap de degradacion i foguèt pas comés dedins, es dempuèi tornamai dubèrt.
 
— Un ancian estudiant, actualament personal a la Maison des Étudiant·e·s e sindicat a Sud Éducation, Thomas Levy, s’es vist enebir l’accès al campus pendent 30 jorns e passarà lèu en conselh de disciplina per lo motiu messorguièr d’aver dubèrt lo portanèl de la grasilha d’entrada de la fac, portanèl del qual a pas las claus. Rapelam qu’a l’escasença de la venguda de la ministra Frédérique Vidal a Sant-Carles 2 (autre site de l’universitat) lo 12 d’octòbre de 2017, Thomas es estat sortit del luòc sens motiu, acompanhat per dos policièrs, a la demanda de la Direction des Moyens Généraux. Lo meteis auvari es arribat a un estudiant d’occitan que la preséncia èra pr’aquò obligatòria sus lo site, puèi que deviá assistir a un collòqui dins l’encastre de son màster. 
 
Sembla qu’aquela practica aja agradat a la presidéncia: un autre sindicalista del Syndicat de Combat Universitaire Montpellier (SCUM) s’es vist enebir lo campus pendent 30 jorns, valent a dire pendent lo periòde de sos ragantatges.
 
 
D. Nacionalament:
 
Mantuna expulsion musclada e d’autras atacas fascistas aguèron luòc dins las universitats o pendent las manifestacions (véser los ligams en anèxa). Entre autres, una centena de personas, demest las qualas fòrça licean·a·s, foguèron plaçadas en garda a vista d’un biais escandalós, tractadas coma de terroristas, aprèp la manifestacion e l’ocupacion del licèu Arago a Paris lo 22 de mai, jorn de manifestacion nacionala de la foncion publica e tanben de las primièras resultas de ParcourSup.
 
Debanarem pas aquí la longa tièra pauc gloriosa de la repression fisica e psicologica mas vos encoratjam a vos entresenhar per los vòstres pròpris mejans (BFM TV es pas una sorsa fisabla!!!).
 
 
3) Examèns
 
L’anóncia dels examèns en linha per lo segond semèstre es estat una virada importanta dins lo movement a Montpelhièr. En efècte, la presidéncia a fach la causida de desmaterializar la màger part dels parcials mercé a la plata-forma en linha de l’universitat: Moodle. Se parle doncas de mai de 700 examèns desmaterializats e d’autres deslocalizats dins de licèus de Montpelhièr, susvelhats per una trentena de camions de CRS que contrarotlavan e furgavan las sacas a l’entrada. Aital, jos lo pretèxt enganaire de pas devaluar los examèns en acceptant lo 10 melhorable revendicat per lo·a·s estudiant·a·s mobilizat·da·s (acceptacion de metre 10/20 minimum contra desblocatge parcial permetent de realizar los examèns sus taula), an doncas autorizat l’impensable. Lo·a·s professor·a·s, non consultat·da·s per la màger part, an degut seguir aquelas directivas mentre que gaire d’entre eles e elas èran estats corrèctament format·da·s al logicial Moodle. Aquò a lèu causat mantun problèma: 
 
 
aspècte pratic:
 
— Tot lo monde a pas un accès a internet e per los e las que l’an, lor material, de saupre l’ordenador, demòra un amic pauc fisable e per consequent un otís instable (risca de pana, de bug, de problèma al moment del depaus...). 
 
— La modalitat “trabalh a cò sieu” implica de compausar dins un endrech non apropriat, sovent brusent e gaire propici a la concentracion.
 
— Los estudiants s pòdon profechar d’una ajuda exteriora: de collègas, amic·ga·s o parents an pogut passar l’examèn amb d’unes (injustícia sociala doncas). D’autres an quitament pagat de mond per que passen lor examèn.  
 
— Tricha: sol·a·s, tote·a·s pòdon aver una man sus lors corses, sens comptar qu’internet es ja la pòrta d’entrada sus la tricha intergalactica.
 
— D’estudiants devián far d’esperele·a·s lo trabalh de comunicacion dels professors quand eles e elas capitavan pas a contactar un estudiant.
 
— Manca d’anonimat de las còpias.
 
— Cavalcament dels oraris de mantun examèn, çò que, dins aquela situacion de trebolum, alimentèt encara l’estrès e lo confle general.
 
— D’unes recebèron pas jamai los subjèctes.
 
— D’unes professors demandavan los examèns en fichièr jos de formats especifics pagants que tot lo mond a pas, o en PDF non modificable d’estampar, emplenar, numerizar, tornar mandar. D’autres, al contrari, an enebit aquò a los e las que podiá ajudar! 
 
Aquela organizacion es estada demontrada coma essent illegala per los sindicats d’ensenhaire·a·s, personals e estudiant·a·s Sud éducation, CGT université, Solidaires étudiant·e·s. Per exemple, lo luòc, la data e l’ora de l’examèn son censats èsser comunicats doas setmanas abans un parcial.
 
 
Aspècte moral:
 
— Manca de consultacion e de comunicacion, entre personals e amb los estudiants.
 
— Situacion injusta entre los estudiants qu’an passat los examèns a distància e los que son obligats de los passar sus plaça al ragantatge. Los e las que son passats al ragantatge an pas agut lo meteis accès a una ajuda exteriora (internet, diccionari, collèga, etc.) que lors camaradas que los an passats a cò sieu. Amai, mantun professor a donat mai de temps (d’oras, de jorns, quitament de setmanas en mai) a aqueles estudiants qu’an passat los examèns en linha. Los estudiants al ragantatge an pas mantuna setmana per acabar lors espròvas.
 
— Lo non respècte de las modalitats previstas per lo contracte pedagogic signat entre l’estudiant·a e l’universitat. Las modalitats e datas de contraròtle son fixadas a la debuta de l’annada escolara, çò que vòl dire que sonque lo·a·s estudiant·a·s qu’an passat los examèns en ragantatge sus plaça auràn passat los examèns dins la legalitat. Las modalitats dels contraròtles inegalitaris son doncas invalidas.
 
— La desmaterializacion dels examèns nos donèron d’inquietuds tre la debuta. Nos demandàvem: s’òm comença, perqué l’universitat contunhariá pas sus aquela via? Perqué pas desmaterializar tanplan los corses? La prefectura desmaterializa las proceduras, Pôle Emploi tanben, los guichets de gara barran… perqué l’universitat seguiriá pas? 
 
E EN EFÈCTE, aguèrem rason de nos inquietar. Vaquí un extrach edificant de l’entrevista de Patrick Gilli a Midi Libre a aquel prepaus: 
 
“La panique des débuts a laissé place, par endroits, à la découverte d’un logiciel mal ou pas du tout connu, Moodle. Est-ce une bonne surprise?
 
C’est le rare point positif du mouvement, de voir se développer la solidarité et le dialogue entre les services. La découverte de la potentialité de la plate-forme a été l’un des grands acquis de cette situation de crise. Beaucoup de collègues se disent prêts à continuer l’an prochain, dans un cadre plus serein bien sûr. Faire passer des examens à distance, c’était innovant et pédagogiquement intéressant. Par exemple, la capsule où l’on peut s’enregistrer et poster ensuite sa vidéo comme une réponse à un sujet a séduit.
 
Et Montpellier était pilote en la matière. Vous a-t-on observé de loin?
 
Aucune université n’a fait de switch d’une telle ampleur. Des collègues m’ont contacté pour m’interroger. On a pu mesurer la réactivité de nos services, l’intérêt pour l’action pédagogique. Ils ont découvert la plate-forme entière, comme les cours en ligne, et la manière de les scénariser. Finalement, cela nous a peut-être fait gagner du temps dans l’enjeu numérique!”
 
http://www.midilibre.fr/2018/05/15/universite-de-montpellier-3-pour-patrick-gilli-tout-est-encore-tres-fragile,1671223.php
 
En afortissent que los parcials desmaterializats èran una capitada, la presidéncia a establit un precedent dangierós. S’òm pretend que los parcials desmaterializats inegalitaris se son plan passats un còp, res poirà pas empachar l’universitat de tornar far aquela mena d’evaluacion dins l’avenir, çò que podriá menar dins un avenidor fòrça pròche a una universitat totalament desmaterializada.
 
Dins aquela universitat, faràn pas mai mestièr ni professor·a·s, ni campus. En plaça, i aurà un ordenador omnipotent que decidirà de la sòrt dels e de las estudiant·a·s. Mèfi!
 
 
Los estudiants reagisson
 
De nòstre costat, fàcia a aquela situacion tibada, nos sèm fin finala acampat·da·s entre estudiant·a·s d’occitan (demest los quals los mobilizats èran mai comunicatius que los professors), las precedentas proposicions d’acamp essent totas estadas refusadas per la directritz del departament (que d’alhors respondrà sola gaireben sistematicament a las nòstras questions, alara que voliam totjorn aver lo vejaire de l’ensemble dels professors). Avèm discutit amassa de la situacion: l’anóncia dels examèns en linha e la vision dels professors sus los eveniments de la “marcha de desblocatge” en seguida del “sabotatge” dels servidors nos an fòrça decebuts, trucats, e èrem talament confuses qu’avèm degut redigir un mèl un pauc fèrme per demandar als e a las professor·a·s de plan voler nos rescontrar, amb la tòca que cadun comunique sas opinions a prepaus dels examèns. Aprèp qualques escambis pro tibats, aquel acamp foguèt finalament organizat lo 3 de mai de 2018. Del nòstre costat, avèm presentat nòstras dificultats fàcia a aqueles examèns, tal coma nòstras analisis. De l’autre, avèm agut mai que mai lo vejaire de la directritz del departament d’occitan que se limitava grossièrament a la critica del blocatge, empachant doncas de soscar d’un biais constructiu a d’autres subjèctes! Avèm per exemple demandat que s’abòrde lo subjècte de ParcourSup e l’occitan. Aquò inquietava pas brica lo·a·s professor·a·s, que semblavan quitament puslèu content·a·s d’aver recebut 39 candidaturas. Las doas oras d’argumentacion dels e de las estudiant·a·s an pas recebut qu’una riseta de la directritz qui semblava encantada d’escotar d’enfantons manhacs de solidaritat. 
 
Pauc aprèp, sèm estats un còp de mai trucats d’aprendre que fin finala, los examèns dels e de las Estudiant·a·s a Distància, normalament previstes a Paul-Valéry, èran deslocalizats al centre de l’Abbé de l’Épée dins lo barri Botonet. Un còp de mai l’anóncia n’es estada facha sens consultacion e al darrièr moment. Es estonant d’aver ausit tante·a·s professor·a·s romegar per tornar trobar lor burèu pendent lo blocatge de l’universitat, e acceptar uèi sens quincar de deslocalizar d’examèns, mentre que l’Assemblada Generala intersectoriala de Paul-Valéry es estada pro clara sus lo fach qu’aqueles examèns (EADs e ragantatges) serián pas blocats, e que lo departament d’occitan aviá demandat oficialament a la ierarquia qu’aqueles examèns ajan luòc sus lo “territòri” d’occitan, pròche de la bibliotèca d’occitan. Notam que mentre qu’èran los estudiants que blocavan, las personas que venián sus lo campus podián assistir a de corses, ne donar quitament sens èsser professor·a·s, anar estudiar e legir a la Bibliotèca Universitària, manjar al Restaurant Universitari o a la cantina populara... Los estudiants a distància an doncas pas agut accès a res e an probablament degut se pagar de restaurants o d’entrepans a Botonet, aprèp aver vist lor saca furgada per Prosegur a l’entrada. 
 
E mentretant, sapiatz que de professors d’autras filièras an organizat lors orals via... Messenger, messatjariá instantanèa de Facebook!
 
 
4) Aleujança al rei
 
Sèm doncas estats trucats de la reaccion d’una bona part dels personals que sembla d’aver vodat aleujança a lor ierarquia (per paur? pression? embòrniament? canha? carrierisme?) al punt de quitament pas voler rescontrar lors pròpris estudiant·a·s o collègas d’UFR. S’es possible que d’unes sián somes a una fòrta pression, tals los vacataris o CDD que riscan de pas èsser renovelats, d’unes an d’estatuts non precaris que lor permeton de se mobilizar, o al mens s’autorizar lo temps de la reflexion e del rescontre. Pr’aquò, son fòrça los e las que prenon lo partit de la presidéncia - e relevam un còp per totes que Patrick Gilli es En Marche, e que doncas far lo jòc d’aquela presidéncia es prene partit dins la lucha en cors. Nòstra suspresa es tanben deguda al fach que se nautres, pendent aqueles meses mercé al blocatge, avèm pogut apregondir e analisar la question del brigalhatge de l’universitat publica, e avèm pogut notar que dempuèi d’annadas la situacion se degalha, tant per los joves que per los personals, son fòrça los e las que veson doncas pas que se talhan l’èrba jos lo pè. Çò que los professors riscan de pèrdre en se mobilizant (e los professors titularis, òm se demanda plan çò qu’an a pèrdre) es pas res a costat de çò que tot le mond va patir dins las annadas venentas. Los joves anaràn pas mai a la fac puèi que pòdon tornar de capsulas vidèos coma examèn, deuràn trabalhar encara mai per pagar los fraisses d’estudi e auràn (an ja!) de mens en mens de borsas e d’allocacions lòtjament. Los emplecs seràn mai que mai de servicis civics o de besonhas d’auto-entrepreneire·a·s a la Deliveroo (comprene precaris e/o jos-pagats). Mas non, d’aquel temps, de professor·a·s ploran per tornar trobar lors burèus e laissas.
 
Una tièra non exaustiva de mocions, comunicacions e cridas a la cauma es estada aponduda en anèxa, que vos conselham de consultar amb tant de suènh que la bibliografia d’un memòri.
 
Ne profecham per rapelar qu’es possible de se metre en cauma a quin moment que siá, de preavises de grèva son pausats cada jorn per los sindicats de l’educacion superiora, que cobrisson totes los personals, aderent·a·s o pas, administratius, tecnics o ensenhaire·a·s. Avètz pas a vos declarar en cauma, es a l’administracion de l’universitat de constatar l’abséncia.
 
 
5) Repercussions sus l’occitan
 
D’analisis e de denonciacions de las resultas de ParcourSup florisson d’en pertot, e aimariam véser realizada aquela dels estudis d’occitan puèi que la situacion es particulara e nos inquièta. En efècte, lo departament d’occitan patís d’una manca d’estudiant·a·s. Se dins un primièr temps, se pòt creire que lo fach de recebre 39 candidaturas ParcourSup (23 sus lo site statistiques.parcoursup.fr)  sus 900 000 es simpatic a rapòrt dels e de las 8 inscriche·a·s l’an passat, vaquí d’unas de las nòstras analisis gaire optimistas:
 
— aculhir d’estudiants en occitan mentre qu’avián benlèu causit STAPS o psicologia es pas una crana victòria (puèi que lo·a·s licean·a·s pòdon pas ierarquizar lors vòts!),
 
— la màger part dels e de las estudiant·a·s d’occitan a l’ora d’ara venon d’una autra formacion,
 
— la refòrma del bac e del licèu acabarà, o dins un primièr temps degalharà encara mai las condicions de trabalh dels e de las professor·a·s d’occitan de licèu, e descoratjarà los escasses novels bachelièrs qu’aurián volgut se marcar en occitan per venir professor·a (d’alhors d’unes ressons denóncian de mancaments consequents dins la preparacion del concors del CAPES d’occitan a Montpelhièr)
 
— ParcourSup implica doas seleccions consecutivas: las filièras seleccionan los futurs estudiants (çò que concernís pas lo departament d’occitan vist que i a mai de plaças disponiblas que non pas d’estudiants inscriches), mas abans aquò los futurs estudiants dèvon seleccionar lor filièra per respectar un projècte professional coerent, çò que concernís totalament lo departament d’occitan puèi que sols los SUFCO e los aspirants ensenhaires i van dins l’optica de trobar un trabalh.
 
— se tre la segonda los liceans dèvon pensar lors percorsses per agradar a las entrepresas que finançaràn las escòlas e facs cotadas, causiràn d’opcions professionalizantas e probablament pas d’opcions talas coma l’occitan. Riscan fòrt de pas mai far d’occitan a la fac puèi que, nos illusionem pas, lo plen emplec en occitan existís pas. Mas esperam que nos enganam!
 
Per çò que concernís l’universitat, rapelam qu’una bona part dels e de las estudiant·a·s d’occitan boicotèran los examèns, per de rasons practicas o politicas, al risque de redoblar, passar l’annada seguenta en Ensenhament a Distància a Tolosa, o encara pèrdre lors dreches a Pôle Emploi mentre son en SUFCO. 
 
Mantun professors, universitaris o institucions divèrsas an commemorat mai de 68 a grands còps de collòquis e rescontres de las odors de naftalina, que s’i ausissiá parlar de la revòlta amb nostalgia, illustrada per los tags engatjas d’epòca, en tot descridar del biais mai grotesc los movements en cors. D’alhors, l’occitanisme se vanta del Larzac, simbòl d’una victòria. Perqué a l’escasença dels seminaris sus aquelas luchas, lo ligam es gaire fach amb la ZAD de Notre-Dame des Landes? Aquela victòria sociala contemporanèa merita d’èsser enonciada, e merita tanplan que se denóncie la repression tras que violenta en cors (un zadista a perdut sa man, mas vos aprenèm pas res).
 
Aimariam mai de destecar e enriquesir l’analisi de l’avenidor pròche de l’ensenhament de l’occitan. Aital, apelam lo·a·s estudiant·a·s e professor·a·s de licèu e d’universitat a se rescontrar per far remontar lors resultas e analisis. Apelam tanplan la mobilizacion jos totas las formas, de començar per lo sosten de la mobilizacion dels e de las estudiant·a·s e personals mobilizat·da·s, a la convergéncia de las luchas, dins lo mitan professional, associatiu, al dintre de son sindicat o de son comitat. Desiram tanplan nos inscriure dins la continuitat del movement occitan lançat per los caumaires del CFPO-MP,  que sostenèm qu’es dins totas las nòstras estructuras, professionalas, associativas, educativas, que devèm tornar trobar de vertadièrs foncionaments democratics. Aquò significa una organizacion orizontala e collectiva, dins lo respècte del còdi del trabalh, de se e dels autres. 
 
 
 
 
Signat: d’estudiant·a·s d’occitan desgostat·da·s
 
 
 
 
 

6) Anèxas
 
En primièr luòc vos convidam evidentament a seguir la pagina locala de la mobilizacion: 
 
— Paul Va Lève Toi: https://www.facebook.com/etudiantes.montpellierains.contre.laSelection/ e a consultar los sites e paginas Facebook dels sindicats de l’Educacion nacionala coma Solidaires Etudiants 34: https://www.facebook.com/SolidairesEtu34/
 
— Blòg dels personals mobilizat·da·s de l’UPV: https://montpellier3contrelareforme.blogspot.com/
 
— Pagina Facebook: https://www.facebook.com/montpellier3contrelareformeORE/
 
— D’auto-mèdias coma Le Poing, le Pressoir fan circular las informacions localas: http://www.lepoing.net/
 
— Parcoursupercherie: https://www.facebook.com/parcoursupercherie/
 
— La pagina Facebook Occitans Bolegants fa circular tanben las iniciativas occitanas e/o militantas.
 
ParcourSup:
 
https://www.mediapart.fr/journal/france/240518/la-violence-institutionnelle-de-parcoursup-destabilise-les-lyceens?page_article=2Ugo
 
http://www.liberation.fr/france/2018/05/21/parcoursup-il-y-a-un-cote-hyperviolent-a-operer-un-classement_1651672
 
http://www.liberation.fr/france/2018/05/23/parcoursup-quels-sont-les-principaux-bugs-identifies_1652152
 
— Declaracion de cauma dels ATER, doctorant·a·s contractual·a·s, vacataris, joves cercaire·a·s de l’Universitat Paris Nanterre – 11 de mai de 2018: https://precairesesr.fr/2018/05/19/declaration-de-greve-des-ater-doctorant-e-s-contractuel-le-s-vacataires-jeunes-chercheurs-euses-de-luniversite-paris-nanterre-11-mai-2018/
 
https://france3-regions.francetvinfo.fr/occitanie/haute-garonne/toulouse/toulouse-precaires-universite-jean-jaures-ne-veulent-plus-travailler-etre-payes-1475671.html
 
https://www.mediapart.fr/journal/france/220518/parcoursup-apres-le-jour-j-l-angoisse-va-continuer-pour-les-futurs-bacheliers
 
https://www.mediapart.fr/journal/economie/140418/en-route-vers-la-destruction-de-l-universite
 
http://www.sudeducation34.org/spip.php?article518
 
— Primièras remontadas: http://www.sudeducation.org/Parcoursup-les-premieres-remontees.html
 
— Resultas ParcourSup: https://www.lemonde.fr/idees/article/2018/05/28/parcoursup-pourquoi-un-tel-choc_5305731_3232.html
 
— Vist per lo·a·s licean·a·s: https://www.lemonde.fr/big-browser/article/2018/05/23/c-est-pas-une-fac-c-est-koh-lanta-apres-les-premiers-resultats-parcoursup-des-lyceens-se-defoulent-sur-twitter_5303290_4832693.html
 
— Mitonan: https://www.lemonde.fr/campus/article/2018/05/26/parcoursup-laisse-les-eleves-mijoter-verifier-esperer_5304905_4401467.html
 
— Situacion al 29 de mai: https://www.lejdd.fr/societe/education/parcoursup-pourquoi-seulement-25-des-lyceens-de-terminale-sont-ils-fixes-sur-leur-avenir-3665939
 
— Precaritat en marcha rapida: - http://www.liberation.fr/france/2018/05/29/quand-parcoursup-complique-la-recherche-d-un-logement-social_1655070?utm_campaign=Echobox&utm_medium=Social&utm_source=Facebook#link_time=1527614476
 
Article del Figaro Etudiant ont la solucion propausada als 29000 escolans refusat·da·s d’en pertot es de far apèl o de s’entresenhar sus de formacions fòra ParcourSup “per exemple lo cas d’establiments privats coma las escòlas de comèrci o de mercatica, los CFA (centre de formacion d’aprendisse·a·s) qu’an de BTS”. http://etudiant.lefigaro.fr/article/parcoursup-que-faire-si-j-ai-ete-refuse-dans-tous-mes-voeux-_f8b3878c-5e5b-11e8-a766-42a601762fc5/
 
— Còp de maçuga de ParcourSup: http://m.leparisien.fr/amp/hauts-de-seine-92/au-lycee-maupassant-de-colombes-parcoursup-c-est-un-coup-de-massue-pour-les-eleves-29-05-2018-7742610.php
 
 
Repression:
 
Preséncia policièra a l’universitat/societats privadas de securitat:
 
https://www.politis.fr/articles/2018/04/scenes-de-violences-policieres-inhabituelles-dans-les-universites-38653/
 
https://blogs.mediapart.fr/pascal-maillard/blog/160518/universites-violences-policieres-et-privatisation-de-la-securite
 
http://www.snesup.fr/article/communique-de-presse-du-11-mai-2018-halte-aux-violences-du-gouvernement-sur-les-campus
 
— 101 licean·a·s en garda a vista: https://www.francetvinfo.fr/economie/greve/on-les-a-traites-comme-des-terroristes-la-colere-des-parents-des-jeunes-interpelles-au-lycee-arago-a-paris_2767807.html
 
https://www.mediapart.fr/journal/france/250518/arago-comment-l-arsenal-legislatif-reprime-les-mouvements-sociaux-et-etudiants
 
 
Informacions, analisis:
 
Via Paul-Va Lève-toi: “Le Canard Enchainé nous apprend ce matin, que la ministre de l’Enseignement Supérieur et de la Recherche madame Frédérique Vidal est actuellement visée par une plainte au pénal pour “fraude à des concours publiques” et “harcèlement”. La procédure dort actuellement dans son bastion, au tribunal de Nice. Hier avec sa mise en place de ParcourSup c’est 400 000 lycéen-ne-s qui ont reçu des “non” ou “en attente” se voyant l’accès à l’université refusé. “
 
— Analisi d’un Ensenhaire-cercaire (Mèstre de Conferéncias) en Sciéncias de l’informacion e de la comunicacion: http://affordance.typepad.com/mon_weblog/2018/05/jeune-president-vieux-con.html
 
 
Occitan: 
 
— Canhòta en linha per sosténer la cauma del CFPO - MP: https://www.leetchi.com/c/solidarite-de-salaries-cfpo
 
— L’occitan dins una societat macronista: https://www.jornalet.com/nova/8950/macron-sem-totes-franceses-mentre-que-parlavem-sovent-de-pateses-un-pauc-despariers
 
https://www.jornalet.com/nova/9573/lo-castel-de-villers-cotterets-sera-la-futura-ciutat-de-la-francofonia
 
https://www.jornalet.com/nova/9222/leducacion-publica-francesa-convoca-solament-un-post-per-lagregacion-per-loccitan-2018
 
 
 
 


abonar los amics de Jornalet
 



publicitat



Comentaris

15 de setembre 14.05h

Cal organizar un occitanism politic independent, es la sola solucion.
siquenon es melhor de parlar d'estataument que de nacionaument. Seré deja una rompadura ambe l'ideologia dominanta.
Coratge e fuèc al desgot!


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

12 de setembre 23.08h

Polit rappòrt complet e assabentadís
Sembla que le blocatge fac justifique la desmaterializacion de l'universetat, aital estudis e examéns d'encò sieu estant. Es l'escadència d'experimentar las perspectivas liberalas de desempenhament de l'Estat. La provòca de blocatges es una gestion tactica del degalhatge de l'universetat publica.
Gara que la luita legitima e necita, e sia pas autodestructiva.
Le macronisme es cinic...avisèm!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

12 de setembre 19.05h

Se pòt pas dire Universitat PAU VALÈRI puslèu que d'emplegar aquelas grafias pseudo-inclusivas ridiculas...

"arrestar" pren doas èrras"


Valora aquest comentari:   votar positiu 3   votar negatiu 9
Respondre comentari replica Comentari inadequat   Formulari d'abús de comentari

12 de setembre 19.05h

Se pòt pas dire Universitat PAU VALÈRI puslèu que d'emplegar aquelas grafias pseudo-inclusivas ridiculas...

"arrestar" pren doas èrras"


Valora aquest comentari:   votar positiu 3   votar negatiu 10
Respondre comentari replica Comentari inadequat   Formulari d'abús de comentari

12 de setembre 19.05h

Se pòt pas dire Universitat PAU VALÈRI puslèu que d'emplegar aquelas grafias pseudo-inclusivas ridiculas...

"arrestar" pren doas èrras"


Valora aquest comentari:   votar positiu 3   votar negatiu 10
Respondre comentari replica Comentari inadequat   Formulari d'abús de comentari

12 de setembre 11.53h

Òsca los joves!


Valora aquest comentari:   votar positiu 5   votar negatiu 3
Respondre comentari replica Comentari inadequat   Formulari d'abús de comentari

12 de setembre 10.05h

"lo plen emplec en occitan existís pas"

Òc... Un constat realista. Mas es bòn per la cultura generala, los mestiers dins las arts, lo patrimòni...


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

12 de setembre 06.40h

Au boulot les jeunes!!


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

12 de setembre 06.40h

Au boulot les jeunes!!


Valora aquest comentari:   votar positiu 3   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

D'estudiants d'occitan de Montpelhièr

D'estudiants d'occitan de Montpelhièr logo rss

D'estudiants del departament d’occitan de l'universitat Paul-Valéry, inscriches en licéncia, màster o doctora, recampats per escriure.

mai d'informacions

contactar l'autor

Las mai...


Archius




D'autres articles


Jornalet, gaseta occitana d'informacions