Las ressorças lingüisticas del Congrès Permanent de la Lenga Occitana tornan a la comunautat en dobrissent sas foncions intèrnas. Son API REST es estada publicada dempuèi lo mes d’octobre. L’API es una lista de foncions, qu’anèm sonar “librariá”,  qu’un site web utiliza per trapar l’informacion que li cal per emplenar una pagina. Es evident per consultar un lexíc, l’usatgièr pica lo mot, puèi lo site se vira cap a una basa de donadas per tornar l’informacion. Lo site web presenta l’informacion segon son grat.
 
Amb lo mecanisme REST, l’accès a l’informacion es dirècte, l’usatgièr pòt questionar lo site del Congrès que li tòrne la responsa, puèi l’usatgièr pòt l’alestir coma vòl sens passar per un navigador.
 
L’interès estant dins lo partatge entre dos sites o mai e l’establiment d’un sosmalhum de collaboracion e d'escambís entre eles.
 
Dins lo primièr cas, la bastison d’una applicacion, lo·a desvolopaire·a va quèrre un tròç d’informacion dins un site puèi utiliza las donadas per apasturar un tièira (per un menut espandit) , per completar un camp de formulari o far una causida dins lo caminament de l’aplicacion utilizaira, e un fais d’autres exemples.
 
 
Creacion d’un compte
 
Avans de poder emplegar la librariá de foncions, cal convenir d’una autorizacion amb lo site servidor, jos la forma d’un abonament amb un senhal que torna una clau unica (que servís d’identifiant e que deu demorar secreta) que cal mandar a cada requèsta. Ansi lo servidor se pòt parar d’una utilizacion massissa o incorrècte en limitant, en clavant o en forabandissent l’utilizaire.
 
De pas perdre de vista que l’èime d’una librariá REST es de metre a posita un servici per la comunautat, amb las ressorças de trachament e de calcul necessarias per un servici adeqüat.
 
 
Un exemple simple
 
A la debuta se pòt esprovar en defòra d’un programa, sufís de picar dins una consòla shell o DOS, la comanda:
   
curl es una comanda qu’existís per totes los sistèms operatius. La sortida es dins un format tèxte plan conegut e simple: JSON.
 
Per una applicacion, i a de foncions que fan la meteissa causa que la comanda curl per cada lengatge de programacion. Aprèp l’aplicacion se carga d’interpretar la responsa JSON amb d’otísses de bon utilizar. Per agachar la demonstracion en PHP.
 
Doncas amb l’API REST del Congrès es possible d’adobar de sites que pòdon emplenar sas rubricas o sos menuts amb d’informacions tornadas d’un site de referéncia.
 
 
Emplenar un menut o un camp amb l’autocomplecion
 
Una requèsta REST es sovent emplegada per complir las proposicions dins un camp de sasida de formulari o per emplenar un menut d’un site o d’una applicacion de telefonet. Dempuèi un briu lo contengut occitan sus la telaranha s’espandís, mas raras son los sites que son organizats en malhum e collaboran amb d’autres. Ara es possible de compausar de contengut estable dusca l’estructura plonda del site amb d’informacion forastièra e mai especializada e fisabla, a fin de s’enriquir del compartir. Qualque sites de qualitat dins lo domeni occitan espelisson sus la tela, sembla normal que lors expertisa se delarguèsse per los autres artesans e s'entremesclesse.
 
 
Anar mai luènh amb la collaboracion
 
Fins ara la comanda curl e l’utilizacion d’un navigador fan de requèstas correntas, anar quèrre l’informacion, mas una requèsta pòt far mai d’una accion. Per cada accion i a un vèrb, per quèrre l’informacion lo vèrb es GET.
 
La sal de la tecnologia REST ten dins l’interaccion amb lo servidor, los autres vèrbs permeton d’anar mai luènh e de modificar una ressorça a la bimbòla.
 
Exemple d’utilizacion: un caminaire amb son telefonet pòt botar sa posicion e de comentaris sus sa passejada tot a consultar la toponimia occitana (veire lo trabalh de comission toponimica occitana de l’IEO) e anotar de fòtos e las mandar al site. Se pòt pensar d’enquestaires o de collaborators que pòdon adobar las entresenhas d’un site sul pic.
 
D’autres sites dins lo domeni occitan son a la mudason a la tecnonologia d’unes dison que lo Thesoc es a mand de passar a la tecnologia REST, çò que promet un avenidor fruchós.
 
 

Vèrb	Accion
HEAD	Trapar las metadonadas d’una ressorça
GET	Trapar una ressorça
POST	Apondre/crear una ressorça
PUT	Metre a jorn una ressorça	Remplaçar completament la ressorça
PATCH	Metre a jorn un tròç de la ressorça	Coma un diferencial
DELETE	Escafar la ressorça	Pauc utilizat

 
 
Conclusion
 
Amb las ressorças en numeric occitan que se desvolopan, se pòt envisatjar que los sites de referéncia serviràn coma malhum per avalorar lo contengut proposat a la comunautat que devendrà ela meteissa, actritz de l’informacion producha.
 
Las ressorças son totjorn a jorn perque venon del site productor. Una novèla activitat se pòt desvolopar amb l’integracion d’informacions forastièras mas fisablas e que s’ enriquisson de lor vesinatge.
 
L’aprivadament de las novèlas tecnicas mobilas fan que lo·a ciutadan·a es generator·ritz d’informacion que pòdon servir a bastir e afortir nòstra comunautat pas sonque per las GAFAM.
 
 
Definicions
 
API’quò’s l’ acroním per Application Programming Interface, a la gròssa es lo biais de d’emplegar un molon de foncions informaticas per far un programa. Totas la foncions d’una API es una librariá.
 
REST Representational State Transfer, es lo biais de comunicar amb lo servidor çò qu’es pas important per lo non especialista. Siquenon es simple e velòç.