Bandièra01 1180x150: Comuna de Tolosa

Opinion

Penius...

Eric Astié

Eric Astié

Escrivan. Rugbi, espanhòu, occitan e musica trad en Agen, Lengon e Bordèu. 20 participacions a l'EOE. Professor d'espanhòu e d'occitan.

Mai d’informacions
  1. Los occitans son penius.  
  2. Los òmes, per amor consideran que las hemnas saben pas parlar la lenga.
  3. Las hemnas, per amor vòlen pas parlar se per cas hasossen pècas.
  4. Los vielhs son penius per amor parlan la lenga sonque per non pas estar comprés e los joens son penius per amor son joens!
  5. Occitània es penibla e  penosa la soa cultura.
  6. A la fin de la segonda guèrra mondiala, quauques patriòtas creèn l’Institut d’Estudis Occitans. Peu prumèr còp desempuish quasi un sègle (1854 dab lo Felibrige) l’identitat occitana se gausava afirmar globalament. La causida deu mot “occitan” tradusiva aquesta volentat de consensus qui volèva crear una presa de consciéncia de la part deu pòble. L’IEO es peniu per amor 70 ans après, a pro pena se mobiliza 30000 gents per manifestar cada dus ans, per una populacion de 14 milions de poblants.
  7. Lo pòble es peniu per amor s’estima mei de consumir en ganhar sòus coma un tiracaire e en se desinteressar de sa lenga istorica, quitament si se ditz Laborde, Chastagné o Soubirous.
  8. L’artista occitan es peniu per amor s’aplica a pérder l’accent per parlar coma la ràdio e la television qui son peniblas tanben, per amor imitan la capitala, en se felicitar d’estar de bons mèdias provinciaus que ací saben hèser coma a París.
  9. Lo quadre occitan es peniu per amor pensa que per s’i escàser, compreniam per capitar, la solucion se tròba endacòm mei, que on tribalha, non i pas sonque paisanàs.
  10. Los jornalistas occitans son penius tanben, quin que sia lo lor encastre d’expression per amor renegan e desconeishen lo hèit occitan cada còp que n’an la possibilitat.
  11. Lo suportaire occitan es peniu per amor encoratja sas equipas favoritas en negligir de màver las colors qui hèsen que son deu parçan.
  12. Lo cantaire occitan es peniu per amor canta en totas las lengas manca en occitan.
  13. Los productors occitans son penius per amor s’encapistran a produsir “Sud de...” mentre que seràn totjorn lo sud de quauqu’un, donc infeudats ad aqueth quauqu’un.
  14. Lo sindicat d’iniciativa occitan es peniu per amor presica per la soa parròpia en ic definir tot localament: istòria, lenga, cultura etc.
  15. Los ensenhaires occitans son penius per amor hèsen coma los jornalistas (véser a “jornalistas”).
  16. Los occitanistas son penius per amor an tots rason sus tot çò qui concernís: la Patria, la Nacion, l’Identitat, la Lenga, la Cultura e la se jògan missionaris en se posicionar per çò que pensan eths, contra çò que pòden pensar los autes.
  17. Los occitanistas son hastiaus per amor se son beròi alengats, aquò’s pas d’un biais erotic mes per criticassejar l’arbe e passar a costat de la seuva.
  18. Los autors, cantaires, artistas, cineastas, comedians e jornalistas occitanistas son penius per amor an un public esqueletic çò qui es de maishant gost au país deu bon víver e de la gastronomia.
  19. Los de las Valadas son penius per amor son suberbons dens la marcha a pès.
  20. Los aranés son penius per amor viven dens lo sol parçan on la lenga es oficiala.
  21. Los catalans son penius per amor s’i son escasuts.
  22. Los gascons son penius per amor se pelejan, los lengadocians per amor son au centre, los provençaus per amor son nobelizats, los auvernhats per amor son au nòrd, los alpencs per amor an las mei beròias montanhas e los lemosins per amor son diferents. (lista non exautiva)
 
Donc, los occitans son penius, e jo tanben, per amor ne soi.
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Martèl Montpelhier
1.

Confirmo : los Aupencs an las mai bèlas montanhas (nananèra). Chau dire qu'an força trabalhat per las bastir, elos.

  • 13
  • 0

Escriu un comentari sus aqueste article