CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 22 de novembre

Eric Roulet

Divendres, 19.10.2012 03h00

Lisa


Comentaris Pas cap de comentari    
Dolent Fluix Bo Molt bo Fabulós (7 vòtes)
carregant En cargament


Es pas sonque quan se gahèt los 15 ans, que la petita Lisa comencèt de s’apercéber que la mitat de l’umanitat presentava dab era quauquas diferéncias: los gojats existivan e mei, li agradavan… Enfin, li agradava d’agradar aus gojats.
 
Es atau que la còla de las amigas s’acostumèt de córrer los magasins: una pelha totjorn mei bèra que l’auta, las gojatas prenevan plaser de s’amuishar aus gojats qui, eths, s’acostumèren de córrer darrèir.
 
De hèit, los gojats tanben, s’èran apercebuts que la mitat de l’umanitat presentava dab eths quauquas diferencias: las gojatas exitivan e mei los i agradavan.
 
Atau vira lo monde... Atau s’auré contunhat de virar per la petita Lisa, se pas jamei un jorn, la Clara n’èra vinuda la véser per li contar que dab lo Pau, s’èran apercebuts que s’aimavan e que d’ara en davant, s’avèvan decidit de sortir amassa e sols.
 
A la debuta, Lisa ne comprenut pas guaire perqué la Clara se passava atau de córrer dab las amigas, sonque estar dab un dròlle... Mes com passava lo temps, l’idèia li pareishut de mei en mei agradiva.
 
Fau díser que dens los gojats, i avè Matiu: Matiu que s’auré tant aimat de sarrar dens los braç.
 
Mes com har? Com hasèva donc la Clara per atau s’estacar lo Pau?
 
Clara? Egau una gojata que n’avè pas arrés de mei que non pas las autas... Pui se preneva per una star! Tota la jornada a cantar las cançons de mòda!
 
A mens que siï aquò! Los gojats s’agradan d’escotar las cançons navèras.
 
E lo lendoman la Lisa se crompava un legidor MP4 deus darrèirs sortits deu mercat. Los gojats, esbaudits, voluren tots escotar las darrèiras cançons de mòda e la petita Lisa s’agradèt tant d’us véser virolejar a l’entorn.
 
Mes un còp escotadas las cançons, tots que s’eslunhèren e la petita Lisa que damorèt sola.
 
Pertant, dens los gojats, i avè Matiu: Matiu que s’auré tant volut sarrar dens los braç.
 
Egau, que s’auré desbrombat l’ahar se pas jamei la Nina n’èra vinuda la véser aqueth matin per li anonçar que s’anava maridar dab lo Jan… Era atau, pr’amor que s’aimavan.
 
La coneishetz la Nina! Una aholida de las matematicas, una gojata botonosa que sonque pensa de trabalhar e tornar trabalhar.
 
Mes com hasèva donc per tant agradar a Jan que se la volossi maridar?
 
A mens que siï... Los gojats s’agradan tant d’estar ajudats dens lo trabalh.
 
Lo lendoman la Lisa que se crompava una maquina de calcular que te hasèva tot: i avè pas sonque de prémer sus un boton per que tot se debani automaticament.
 
Tots los gojats esbaudits voluren ensajar lo daquòs navèth, e la petita Lisa s’agradèt tant de los véser virolejar a l’entorn.
 
Mes un còp calculat, tots que s’eslunhèren e la Lisa que damorèt sola.
 
Pertant, dens los gojats, i avè Matiu: Matiu que s’auré tant volut sarrar dens los braç.
 
Quan lo Cristòli li anoncèt que se voleva maridar la Sibila, Lisa n’en damorèt boca-badanta.
 
Cristòli! Lo mei beròi gojat de la còla de las amigas, lo que totas saunejavan!
 
La Sibila! La mei petita, la mei lèda deu grop, la que s’a pas jamei sabut vestir, s’auré podut agradar a un gojat! La Sibila que sonque conta de las istuèras tota la jornada. La Sibila, perduda dens los saunèis.
 
A mens que siï aquò... Los gojats s’agradan d’escotar de las istuèras.
 
E lo lendoman la Lisa se crompava un “home cinemà” de purmèira, un d’aqueth que te pren tota la paret deu salon! Tots los gojats esbaudits voluren véser lo darrèir film sortit de las brembras americanas e Lisa s’agradèt tant de los véser virolejar a l’entorn.
 
Mes un còp ensajat tots que s’eslunhèren e la Lisa damorèt sola.
 
Pertant, dens los gojats, i avè Matiu: Matiu que s’auré tant volut sarrar dens los braç.
 
Lo sèr medish, shèitada dens la cosina, la petita Lisa plorava.
 
“Perqué Mameta?”
 
L’aujòu penchada suu huc de la cosinèira, se virèt e espièt la gojata dens los ulhs: las lagrimas tornèren colar enqüera mei.
 
“Los i èi cantat cançons com la Clara, los i èi hèit lo trabalh com la Nina, los i èi contat istuèras com la Sibila... N’an pas volut de jo...”

... E jo, m’auri tant volut sarrar lo Matiu dens los braçs... Perqué Mamia?”
 
- ”La Clara n’a pas volut cantar cançons:  que canta pr’amor qu’es atau  e atau es, çò responot la dauna  vielha, la Nina n’a pas volut har lo trabalh, que trabalha pr’amor qu’es atau e atau es, la Sibilha n’a volut contar istuèras, que sauneja e pr’amor qu’es atau e atau es... E tu Lisa quan siïs çò que ses?”
 
- ”Jo que l’aimi, Mamia e li vau díser”.



publicitat
BANER1-2-3: DGPL DICTADES



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Eric Roulet

Eric Roulet logo rss

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions