Bandièra01 1180x150: Comuna de Tolosa

Opinion

Los elegits e l’occitan

Eric Roulet

Eric Roulet

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

Mai d’informacions
La Ministre de la Cultura ven de nomenar una “comission de las lengas regionaus”…
 
Una comission de mei, solide, d’aqueras comissions que s’amassan de temps en quan, per tant de díser …
 
En generau, s’i passa pas arren , mes los que son dehens, deisharén pas la plaça: se senten, enfin, importants e reconeshuts…
 
Nosauts, gents dau tarrenc, que tota la jornada parlam e ensajam de héser víver la cultura nòsta, aqueras rencontras de notables de l’occitan nos alaissan e nos encoleran.
 
Nos alaissan pr’amor qu’avem coneishut tant d’aqueras conversas inutilas que n’i cresem pas mei.
 
Nos encoleran pr’amor que: de quau drèit, tots aqueths “politics,  especialistas e autes tecnocratas” autoproclamats, nos representan e parlan en nòste nom?
 
Se i avè pas ajut dempui annadas daus militants per bastir la cultura d’òc, i a bèra pausa que la lenga seré mòrta e que tots aqueths Mossurs n’auren pas arren de se contar.
 
Enqüera, se pas jamei, davant d’anar a las comissions,  hasèvan una consulta de tots, se puiré benlèu los i balhar una paraula de portar, mes basta! N’èi pas jamei vist una consulta atau dempui que me maini de cultura d’òc. Los “elegits” son plan tròp gloriós de lor privilègi…
 
Fin finau, tot es discutit hòra los que hésen víver la cultura, mes en lor nom: aquò se sona “democracia participativa”.
 
Un còp de mei la navèra comission serà atau. Dus representants de l’occitan, dus biarnés: una senatora e un elegit regionau  de la region  Aquitània. Perqué? Com son estats causits?
 
A l’ora d’ara, nada consulta de digun (au mens a la nòsta coneishença)…
 
Solide, çò que vivi, jo, sau tarrenc tota la jornada en Gironda, on los problemas son hòrt diferents que non pas los dau Biarn, qu’ic saben pas briga!
 
L’experiéncia mancada de “l’Amassada” de la region Aquitània, a pro amuishat la mauescasuda de la consulta dau tarrenc!
 
Dauna Ministra de la Cultura, existís, darrèir  lo vòste monde “convengut”, un aute monde, vertadèir aqueth, on cada jorn fau trobar una plaça au mitan dau mesprètz: vorritz pas venir en viatge au país daus “sauvatges”?
 
E pui i a los auts, los elegits dau tarrenc: lo maire de la petita comuna dau Medoc, que dempui tres ans,  mia la batalha per la classa bilingua, la conselhèira dau departament, sola dens l’amassada a deféner l’Occitan au mitan de las trufandisas, lo responsable de l’Ofici de Torisme que va convéncer lo public de venir au concèrt gascon…
 
Aqueths tres e mei tant d’auts, que pas jamei n’an balhat leçons d’occitanisme, que s’aucupan d’una tropa d’autas causas, mes que, a còps, s’apassionan un chiconet per la dauna vielha dau canton qu’es vasuda la cultura nòsta.
 
Aqueths elegits son de nosauts: dab eths qu’auram de bastir  las ideias que haràn espelir la cultura occitana, dab eths se puirà miar las experiéncias navèras.
 
Mes son escampilhats un chic de pertot, tròp escampilhats per se poder parlar o  per se tirar de la soletat: mei d’un se pensa d’estar lo sol.
 
Se pas jamei un jorn s’amistosan, auram una fòrça politica occitana vertadèira: la que ven dau tarrenc e que s’i diu tornar. Aquí èra l’ideia de “l’Associacion daus maires e daus elegits occitans” apitada en d’auts temps per lo maire d’una petita comuna de Gironda. Una ideia de las bèras que benlèu, se puiré reviscolar…Que sèi qu’existis enqüera.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Racionalista matematician
6.

Òsca per aquel article. Lo debat resta dubèrt... Benlèu de monde de l'ACEOC reagiran ?

  • 1
  • 0
garric
5.

Aveire un occitanista militant de primièira borra dins una comission Teodul a París val mièlhs que de pas aveire d'occitanista militant de primièira borra dins una comission Teodul a París. Tot es bon per prendre.

  • 1
  • 0
BOURDON Pau
4.

#1 Que diserí mei: contracarrem l'imperialisme bearnés, demandem l'independéncia de la Gironda ! Seriosament, e credetz qu'aqueths dus elejuts, per estar bearnés, e representan mei o miélher lo monde de la basa en Bearn que lo monde de la basa deus autes parçans ? :-/

  • 2
  • 1
Sauta riba Carròs (País Gavòt)
3.

Dins un collòqui de 2008 http://calenda.org/211805?file=1
es indicat que lo President de l’Associacion dels Conses e dels Elegits Occitans (ACEOC : Association des Maires et Élus Occitans) es M. Roger LASSAQUE (Rogier LASSACA), Maire de Saint-Martin-le-Redon (F – 46700 Lot), Président de l’Institut d'Études Occitanes (IEO) d’Olt (F – 46000)

Un bèl nombre d'articles mòstra/ mostrèt l'importança e la fòrça d'aquela associacion :
http://www.francophonie-avenir.com/presse%20ethno%20Occitans%20en%20congres.htm
http://www.o-p-i.fr/page/cestalire/beluga/beluga_2/beluga2_10.pdf

  • 3
  • 0
Querubin Suspèr
2.

Bèl article !

"Aquí èra l’ideia de “l’Associacion daus maires e daus elegits occitans” apitada en d’auts temps per lo maire d’una petita comuna de Gironda. Una ideia de las bèras que benlèu, se puiré reviscolar…Que sèi qu’existis enqüera."

Tot es dich. Avem seguit dambé grand espèr 'a creacion d'aquela associacion, cf. http://www.journal-officiel.gouv.fr/association/ :

Association : ASSOCIATION DES MAIRES ET DES ELUS OCCITANS.
No de parution : 19990035
Département (Région) : Gironde (Aquitaine)
Lieu parution : Déclaration à la préfecture de la Gironde.
Type d'annonce : ASSOCIATION/CREATION

Déclaration à la préfecture de la Gironde. ASSOCIATION DES MAIRES ET DES ELUS OCCITANS. Objet : regrouper les maires et les élus qui s’engagent à défendre et à promouvoir la langue et la culture occitanes dans un esprit d’humanisme. Siège social : 4, place du Docteur-Abaut, 33550 Langoiran. Date de la déclaration : 9 août 1999.

Aquela associacion creaia 14 ans fa, foguèt presenta a ben d'eveniments (un pauc d'en pertot en Occitània : 'a "Convencion occitana" a Besièrs, en val d'Aran...), mas despúi un cèrt moment, i aguèt silenci e avem jamai capit ce que se passèt e ce que devenguèt.
Benlèu serà l'ocasion de ne'n saber de mai e de tornar lançar de tira 'a dinàmica ? 'O manifèste occitanista qu'adòba 'es eleccions municipalas de 2014 dambé de candidats occitanistas poiria veire aquela associacion de cònsols e d'elegits coma una basa e coma una aisina institucionala duraïssa al tèrme lòng.

  • 6
  • 0

Escriu un comentari sus aqueste article