CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Divendres, 18 d'octòbre

Eric Roulet

Dimècres, 25.9.2013 03h00

Dògma, occitanisme e exclusion


Comentaris 12 comentaris    
Dolent Fluix Bo Molt bo Fabulós (13 vòtes)
carregant En cargament


Je ne suis pas d’accord avec vous,
Mais je me battrai pour que vous puissiez le dire.


(atribuït a Voltaire)
 

A còps, i a daus comentaris  dens lo Jornalet que me hèn dòu…
 
Parli pas sonque daus articles mens, se non tanben, daus articles en generau, quan se tròba que lo cronicaire se tira mei o mens de la “dogmatica” occitanista.
 
Alavetz, estujats per l’anomimat (e en amuishar un coratge daus grans), arrriban sus la tela daus comentaris, agressius, trufandècs e quasi a la limita de l’ataca personau… Trista imatge de balhar aus lectors que, de segur,  esperan una auta ubertura d’esperit dens l’occitanisme.
 
Solide, aqueths maishants comentaris son chic, hòrt chic,  a costats daus centenats de legidors dau Jornalet, mes egau, on son los autes? On son los que vorrin davançar dens la pensada collectiva e contribuir a sa dubertura?  E perqué deishar atau la plaça liura a l’embarrament dens una còla de dògmas, de mei en mei exclusius de la diversitat?
 
De hèit, ací me pareish estar lo problema vertadèir: la pensada occitanista es a se bastir sus una seguida de cresenças, que tota persona qui s’en vuiré tirar serà trufada e excluida.
 
Aqueths dògmas  son a definir una pensada normativa de mei en mei estrèita.
 
Èi tostemps ajut paur daus que se pensan dens la vertat e es pas de bon grat per l’occitanisme, que, au contrari, diuré voler amassar en incluir las diversitats. Una cultura, se diu d’estar, per definicion,  plurau!
 
Deisharèi dab plasèr aus que se “vòlen sheitar per s’espiar  caminar”  lo suenh d’apitar la lista de las pensadas dogmaticas de l’occitanisme, las que se disen e las que se disen pas, en tot damorar a flor de boca. Mes egau, atau d’enriquir la contesta (se pas jamei i a debatuda e non pas ataca trufandèca), ací quauquas vias de pensada:
 
- Dògma: l’occitan es una sola lenga dialectalizada. Solide, i a bonas rasons, lingüisticas e scientificas, per ic pensar, mes egau…
 
Hòrabandits! Los que pensan meilèu las lengas d’Òc e que s’agradan mei de deféner lo parlar locau. Pertant, sèm tots a deféner la medisha lenga, non?
 
-  Dògma: Occitània es una nacion. Una ideia gessida de l’unitat linguistica, que se gausa pas tròp clamar, mes que damòra presenta dens mantua causida: crotz dau Lengadòc coma bandèra de tots, Tolosa  coma capitau d’Occitània eca. Es egau una concepcion nava, shens raiças istoricas. Gatge de reconquista per los uns, realitat umana per los autes, l’ideia de nacion occitana es una causida, una via possibla e pas forçadament la sola.
 
Hòrabandits! Los que pensan nacions redusidas e istoricas: Biarn, Provença, Gasconha, o de ciutat (Marselha, Tolosa o Bordèu). Eliminats tanben, los que refusan tota idèia de nacion e sonque vòlen défener l’unitat culturau.
 
- Dògma: La còla tecnocratica occitanista (elegits, “professionaus” e experts de tota mena), assegura a l’ora d’ara, l’espeliment  de la cultura d’Òc.
 
Tot lo monde sembla d’aver desbrombat que l’ensenhament de l’Òccitan es a cabussar dens mantun lòc on la logica administrativa e politica passa davant lo besunh de la lenga. Tot lo monde semblan de non pas véser que la “creacion culturau occitana”, causida per la Mossurèra (una tota petita còla amistosenca), es a s’embarrar dens un monde talament redusit, que n’an perdut tot ligam dab lo tarrenc e tota progression possibla…
 
Hòrabandits! Tots los autes artistas non amistosencs, mes tanben las associacions e los militants que n’an pas lo grat d’agradar o de servir los ambits …
 
Dògma: Lo folclòre defen una vista passada e trufandèca de la cultura d’Òc. Es curiós que dens una tropa de país europèus, lo folclòre es considerat coma una via sancèira  e viva de l’expression culturau. De pertot, las formacions an  sabut crear en partir de sos utís pròpris…
 
Manca en Òccitania, perqué?
 
Hòrabandits!  Tots los grops folclorics occitans, e… i a una tropa! Egau, defenen pas, eths tanben, un ram de la civilisacion d’Òc?
 
Atau passam de mei en mei, au nom de l’ortodoxia occitanista, d’una cultura de l’incluir a una cultura de l’escluir… E tot aquò dab lo silenci de la majoritat. Benlèu pr’amor qu’a deishat d’i créser?



publicitat
BANER1-2-3: DGPL TRADUCTOR



Comentaris

27 de setembre 12.51h

#11 As ben rason mon bèu...

Lo dògma "Occitània es una nacion" per ieu tanben me pareisse fòrça minoritari, emai siguesse dins lo mitan occitanista... Es estranh d'aguer lo sentit reversat...

Quant a la musica trad... ben, s'apren bessai au fach qu'au bot de 50 versions per 50 gropes diferents dau Boier, dau Se canta, dau Joan Petit, dau Polit mes de mai e companhia, cresi que n'avem un pauc fach lo torn... Compreni lei programators qu'an de besonh de diversificar un pauc çò que meton... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

27 de setembre 11.15h

"Occitània es una nacion", un dògme occitanista ?!!!

Pensi que vivem pas dins lo meteis monde e qu'avem pas rencontrat lei meteissei gens !
Perque la GRANDA majoritat deis actors occitanistas "oficiaus" considèran pas Occitània coma una nacion. Se considèron quasi totei francés e n'en son fièrs.

Aquèu dògme es un pantai, perque es pas que l'òbra de quauquei militants patriòtas occitans, que fòrman benlèu une bèla part dei legidors dau Jornalet, mai que rapòrt ais occitanistas s... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

26 de setembre 10.31h

#8 Òc, o confirmi e o planhi, après de longàs escambis, de còps ben durs, amb lei membres dau Collectiu Provença. Quand parlan de "reconeissença de la lenga provençala", cèrcan pas l'oficialitat dau provençau dins la vida publica (i seriam totei consents) mai l'enebiment de la grafia classica dins l'ensenhament, çò que ja se faguèt sota la pression de seis amics. Preferissi la nòrma classica mai se me caliá chausir entre lo francés de pertot e la preséncia sistematica dau proven... Legir la seguida


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

26 de setembre 00.49h

#6 Òsca, amic Garric ;)


Valora aquest comentari:   votar positiu 5   votar negatiu 2
Respondre comentari replica Comentari inadequat   Formulari d'abús de comentari

26 de setembre 00.38h

Precision importanta. En Provença, aquelei que practican l'exclusion son lei pseudomistralencs partisans d'una pretenduda lenga provençala separada: elei demandan dobèrtament l'interdiccion de la grafia classica e l'imposicion de la sola grafia mistralenca dins l'ensenhament public. Es provat...
Cresi qu'Eric Roulet analisa pas la situacion reala sus lo terren: acusa leis unitaristas quand, en realitat, son lei secessionistas que practican l'exclusion.


Valora aquest comentari:   votar positiu 9   votar negatiu 5
Respondre comentari replica Comentari inadequat   Formulari d'abús de comentari

25 de setembre 21.08h

Ieu, quand pòrti Occitània al còr en gaitar tot a l'entorn de nosautres, lo solet dògma que vesi es lo de la francòrepublica, un dògma impausat. E lo sol fòrabandit que vesi es una fòrabandida: la lenga occitana, fòrabandida pel dògma.


Valora aquest comentari:   votar positiu 17   votar negatiu 1
Respondre comentari replica Comentari inadequat   Formulari d'abús de comentari

25 de setembre 18.10h

Es vertat que los Nacionalistas son los mai actius sul Jornalet, enquèra mai quand son sostenguts per de Catalans. Pr'aquò los tròbi globalement tolerants. Rapèli qu'òm pòt promòure la nacion occitana dins la Republica e sens cap de nacionalisme.

Se i a un dògme occitanista que senhoreja, es lo de la lenga. I a una incapacitat de pensar Occitània fòra la lenga. L'Occitània francofòna sembla un altre mond.


Valora aquest comentari:   votar positiu 9   votar negatiu 1
Respondre comentari replica Comentari inadequat   Formulari d'abús de comentari

25 de setembre 18.05h

#3 Be diu estar simple lo monde per vos... Be dívetz estar urós. Percé, com ac dit lo Didier Super :
"Moi aussi je veux détenir la vérité / car quand on est convaincu qu'on a raison / on n'a plus besoin d'se casser l'cul à reflechir".





Valora aquest comentari:   votar positiu 7   votar negatiu 6
Respondre comentari replica Comentari inadequat   Formulari d'abús de comentari

25 de setembre 17.40h

Felicitacions ad Eric pr'aqueste article clar e coratjos ont me retròbi tot a fèit. Aurés tanben poscut parlar de les aberracions de la grafia etc.

A prepaus de la pluralitat de les lengas d'òc :
diser que l'iranja, lo persèc e lo rasim hèsen tots partida deus fruits es juste ; diser que l'iranja es una iranja es juste tanben. Diser que lo gascon es una lenga contraditz pas dens l'absolut que l'òc n'en es una...


Valora aquest comentari:   votar positiu 11   votar negatiu 7
Respondre comentari replica Comentari inadequat   Formulari d'abús de comentari

25 de setembre 16.45h

Dire qu'Occitània es una nacion, es segurament pas un dògma, au contrari es una posicion coratjosa qu'es encara febla dins l'occitanisme mejan e qu'es a còntracorrent de la pensada dominanta deis estats. L'agressivitat ven de certaneis antinacionalistas primaris, ven pas dei nacionalistas.

Sus l'unitat de la lenga: òm a drech de pretendre que i a plusors "lengaS d'òc", exactament coma òm a drech de pretendre que la Tèrra es plana, que lei piramidas d'Egipte son l'òbra deis extraterrès... Legir la seguida


Valora aquest comentari:   votar positiu 16   votar negatiu 8
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Eric Roulet

Eric Roulet logo rss

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions